انا هي بنت الليل، خفاش متنكر في مرا ، نجمة طافية في السماء ، ليلي نهار و نهاري ليل

توحشت نحس كيفكم بدفئ الفرشية  في الليل ،توحشت تكون عندي مخدة نرقد عليها موش كل وين نرقد مخدة جديدة

ساعات هي بيدها و ايامات برشة   تتبدل ، نحب نحلم ، نحلم في الليل راقد في فرشي  موش نحلم  فايقة  عنيا محلولين تقول صحافي الترميشة  بحسابها...

تعبت .عينيا، حوقت، حمارة ، كحالة ، بدني تهد، ضعف، ذبل،ذاب و شاح ،معادش حاسة  بيه موش متاعي،  موش ليا ، منيش خالطة نفرح بيه كيف اندادي

توحشتٌ،

توحشت  نخرج معاه و منقولوش نحب نرقد ،نشكي ، نبكي ، ظهري يوجع ، سقايا نبلت تقول عزوزة و انا مزلت ترنكوشة

يديا ولات يدين راجل شايب مجلدة  كينها ارض محروثة

شمسي غربت مالفجر ...

انا هي بنت الليل . بنت المعمل  .    الناس تتكى في فروشاتها  متهنية ،الي راقد ت مع راجلها ، الي تحكي مع صاحبها و الي حاطة  غناء مونسها .

انا .

أنا ...نخرج نخدم مالعشرة متاع الليل لوجوه الصباح

لا غمضة ، لا ترميشة  لا حلمة ،لا كلمة حلوة  تعيني  و دفي برد الليل...

عرفي من كل جهة يعس، على كل تنفيسة و كل تحريكة ،

توحشت نقرى كتاب، نسمع موزيكة و نتفرج في فيلم في الليل ،تي حتى نتفرج في الاخبار متاع  الثمنية ،

توحشت،نشوف بابا  الي نسيت وجهو .خواتي ، امي  الي نعيش مع بعضنا و منعرش حكاياتهم و احلامهم. .. توحشت نسمعهم يحكيو يضحكو و حتى يتعاركو  

محلاه عركهم في وسط هالسكات و الظلام ...

نعرف كان شنية ناقصهم فلوس و قضية ،ميساجاتي معاهم كان  القضية قريب توفى ، و نحب حق روبة و فلوس الايتود و...و...

نحب نحس بدفا العيشة  معاهم

نحب نعرف احساسهم و نشوف حبهم ليا ،

زعمة يحبوني ؟؟؟

انا هي بنت المعمل   

موش من حقي نحلم و لا نعيش ...

كل ليلة نمشي فرد تنية توا سنين و لا نجمت نتهنى و انا متعديا فيها ،قلبي يدق لين نحس روحي كيني شادتو  في يديا كيف حفنة ماء خايفة تشيح قبل ما نوصل بيها، نرعش  ساقيا كيف

ورقة الشجرة صفراء شايحة  في وسط الريح ،ريح الخريف القوية ، مونسيني اربعة حجرات مرميين على حافة الطريق ، و صوت الكلاب  الي تنبح صوتها يفيق الراقدين في الجبانة ،

الظلام ولى عشيري الي  نكرهو   ، راجلي الي عرسّت بيه بسيف

في ليالي الشتاء ترنخني كل ليلة تحسيسني الي انا يتيمة ،

المعمل ولى داري

البلاصة الي نحلم فيها نبني فيها حلمة كيف القمحة في وسط الصحراء ،  نسقيها ،نربيها ،نكبرها  ساعات ندللها  و في لحظة تتوفى بين يديا نكفنها ، ندفنها و نقبل عزاها .

بنت المعمل اسمي ، عمري نسيتو ملي ساقيا عتبت باب المعمل ، نحسبو بعدد الشيبات الي طلعت في شعري

اهـه شعري نسيت وين ولي يوصل كل وين نراه نشوف الشيبات نتربث، نتمهميش، نتذكر

نتذكر ايام  الصغر و المخ الفارغ و نندم على كل حلمة خليتها كي نكبر ، ناكل ظوافري على كل مرة تمنيت فيها نكبر

معادش  يهم  شنية قريت ، لا شنية نحب ،  لا وين نحب نوصل ...

انا هي بنت الليل بنت المعمل ،  حلمتي ولات  قلب حنين راحة قبل الموت ، فرش ندفا فيه و نومة في الليل  ....