نسيتك. .وبماء البحر غسلت ثنايا قلبي و تراكن سبعة مرات دعيت الرب ننساك.. ..وصليت عليك في المغارب صلاة الوحش و النسيان و دفنتك في طرطوشة شمس هاربة مالظلام. ..

نسيتك اما ريحتك تتسرسب في عروقي. ..ومازلت كيف ماتعرفني مالحبة نبني قبة محبة ومن تصويره في العقل منسية نلبس أحلامي ونتوسد كلامك وكلامي. ..وناديك تجيني ورعدك يضرب في كنيني ومطر وجيعتك تصب في مامو عيني. ..

نسيتك وباش نفطم قلبي على حبك عمتلو المر و الصبر. ..ولاحاك المر في حلاوة بوستك. ..ولاحاك الصبر لتصبيري. ...

أما ماتنساش نسيتك وفي كل تركينة كتبت اسمك وعلقت تصويرتك. ..وتعلمت نتكيف خيالك مع كل نفس ...ونشرب ضحكاتك يرويولي جواجيا. ..

أما أنا حق الي بعث فينا نفس نسيتك. ...أما مازلت كيف ماتعرفني بنوتة صغرونة كي تتوحشك تتخبى في حكة سوفنيرها كالحكة لخرجتها منها مالجنة لنار نسيانك. ..

البارح مع الفجر قمت بردانة من دفاك. ...و عجاج قلبي فز وشجرة محبتك في قلبي عروقها تقلعت. ...جريت. ..و عيطت. .صحت. ..بكيت، تكبيت نفضت دم ركايب قلبي وعاودت جريت. .حبيت نشدها قبل ماتتردم في وسط جبل قلبي. ..حبيت نحملها ونعاود نزرعها وفي ليالي البيض نبنن بها ونسهر على عودها الراقد وفي ليالي السود نسهر على تفتيح عود محبتك ونعنق إحساسك. ..ونسقيك من ريقي. .ونكبرك في شوني. ..وفي ايام العزارة نحبك ونتحمل هبالك...أما ثانية وحدة. ...جبدان نفس يبدل كل شي. .وشجرة حبك في نار بعدك ولات فحم رماد زين ايامي. ...

نسيتك. ...أما وحق الي رفع السماء و بنى الأرض في سبعة أيام مانسيتكش. ....

مانسيتكش...