ما نعرفش شنو بالظبط لي حببني فيك...اما ملي عرفتك حسيت الي اخر حكايتنا فراق..و على قد ما كنت نتخيل كيفاه بش توفى لا عمري تخيلتها توفى هكة

تسيبني هنا بين البينين منا نار و منا نار و يمكن  ظلام  ممدود قدامي يهز لدنيا ما فيهاش تبسيمتك..و ثنية ورايا ترجعني للبنيّة الي كنتها قبل..نسيت كيفاه نرجعلها... ما نعرف كان البنية لي كبرتها على يديك و الي تفتحت قدام عينيك..و نسيت كيفاه كانت روحي قبلك..يا روحي..يا شقا العمر..يا غصة في القلب..يا وجيعة بنينة..

وحلت روحي في هالبلاصة وحدي

مش بش نجي اليوم نرمي عليك غلطاتي

انا الي فديت من كذبك انا الي نعرف سيستاماتك

انا الي كي العباد تبدا تسب فيك نقول في قلبي مالا كان نحكيلكم الشيء الي نعرفو انا

انا نحبك

يجيش لبالك

كان نحكي هالكلام لواحد تو يقول مهبولة..انا بالمجد مهبولة..بيك..هذاكا علاه قعدت سنين سري الي ما يعرفو حد..مخبيتك في قلبي و مسكرة عليك..

انا و بالرغم الي نحبك اما نعرف رواندك الكل و نعرف وجوهك الكل

نعرف قلبك الابيض..و الطفل الصغير لي في وسطك..و نعرف حنية الدنيا لي فيك.. و نعرف الي انت شيطان و ساعات ملايكة..

نعرف غزرتك الحنينة وانت خايفني لا نتغشش عليك،و ماخذتك بالخاطر و توسيع البال و السوايع الي تعديهم و انت تسمع في تخرنين طفلة صغيرة، تركيزك مع الديتايات الصغار الي تعرفني نشيخ بيهم و السر الي عطاهولك ربي الي يخليك تنجم ديما تضحكني.. نعرف الكراهب الي تخافهم يضربوني ياخي تاخذني في حضنك..و نعرف البرد الي تخاف عليا منو و تلف عليا بيديك..

نعرف هاذم الكل..اما ما نعرفش انا شنوة بالنسبة ليك.. بيناتنا حاجة لا عمرك سميتها.. و الا كنت خايف تسميها..

لين خليتني نسال..انا شنو بالنسبة ليك؟؟ و يمكن زادة و كي اي انسانة عادية وصلت معاك لهالثنية المسكرة نجم نسالك اما انت علاه تحب تفرحني؟؟صدقني امنيتي ندخل قلبك نشوف انا في اناهو كازيي مكلاسيني..وصلت في التخمام متاعي برشا مرات لثنية مسدودة..نهرب ليك..نلقاك مدور عليا وجهك لبنية اخرى..نجافيك ترجع تبوسلي في كفوف يديا و تخلي لخرى..حاولت الفين مرة ننساك..نرجع من اول الثنية..نحس روحي عطيتك الشيء لي منجمش نكمل بلاش بيه..كيما الي قصولوا قايمة..و بش يقعد طول عمرو يكوع..بش تقعد انت ديما ناقصني..

كرهتك..اي كرهتك..بكبر محبتي ليك كرهتك..قد ما نتفكر كل بنية ضحكتلها في قفايا نكفر بريحتك..على قد ما نسبلك الرادسة متاعك..وعلى قد ما نتحلف فيك و نحلف تلاثة اربعة مرات بش معاش نلوج عليك..في وجوه المتعدين.. على قد ما نقول كرهتك على قد ما يطيح كل شيء كي نسمع صوتك.. و على قد ما يذوب الثلج  لي في قلبي عليك كي تجي عيني في عينيك.. و كي يتعدى طرف صبعك على خدي..نرجع ماللول نحب فيك..على قد ما حلفت يديا بش ماعاش يرعشوا كي يسلموا عليك..و حلفلي قلبي بش يسترجل و ما يرخش كي

يتوحشك..و حلفولي عينيا بش ماعاش يشهلوا فيك.. كل مرة..على قد ما نقول وفيت منك بغزرة نرجعلك..

هكا ضاعوا خمسة سنين من حياتي برشا دموع و فرحات كبار كبار قد السما في اللحظات الي ترضى فيهم انت عليا

ضيعت ايام و ليالي و انا نشمشم كالقطوسة نعس عليك من بعيد في اما لحظة تبدا في صحنك بش نقربلك و نرضى نستنى ادهرة في يديك بش تناديني و نترمى في حضنك و ننسى الي عملتهولي الكل

لابدة في الشيرة الي مقابلتك نستنى في اللحظات الي ترضى عليا فيهم و تدخلني للشيرة لخرى متع الدنيا..و عديت معاك عمري.. لاك شادد فيا لاك مسيبني..لاك ليا لاني مش ليك.. متشعلقة في شوافر عينيك..واحلة في حفر الزين الي في خديك..

لين قلبي فد

ضيعت صغري على خاطرك من غير ما تقلي كلام يرويني ترميلي ساعات كلمة باردة ساردة في وسط الجملة نصبر بيها روحي

شادة قلبي بالحاجات الصغار الي تعملهملي اي و الحاجات الكبار؟

و بلاصتي في حياتك..و الشيء لي بيناتنا..لي لا عمرك سميتو..

انا خاطرني فديت و انا نستنى فيك تنطق، جيتك انا من غير ما نشمشم جيتك مرا مش قطوسة مرا تعرف عليك همك الكل و دوسياتك المسخة

جيتك و رميتلك تحت ساقيك عمري الي جاي نكملو معاك و اعمل فيا اش تحب

انا الوحيدة بينات البنات الي لعبت معاهم الكل الي وصلتك لهنا و حصرتك في تركينة لين نطقتك..

و على خاطرني حصرتك اول مرة تقلي كلام يروي..يروي عطش الاسئلة الي حارقتلي جواجيا..

قتلي برشا كلام

قتلي الشيء الي لا عمري تخيلتك تقولهولي

قتلي الي انت و كي تدور الدنيا ما تلقاش كيفي

لهنا نحسابك بش تعمل السيناريو الي نعرفوه متع الرجال السقاط الكل الي كي تحصرهم يقولولك هالكلمتين و يفصعو

اما انت يمكن على خلافهم..مكش ساقط..و يمكن زادة ما تحبنيش نمشي

انا هكاك فيبالي سايي فاهمتك و وريتني خبثك للّخر اما انت طلعت يمكن..مش خبيث..و يمكن زادة هاذي اول مرة تقول كلام من غير ما تغلفو بالكذب..

و شفت حاجة في عينيك اول مرة نشوفها..كاينك حنثت ايمين حلفتو قبل..

و نطقت

قتلي انا نحبك..... مالكلمة هاذي قلبي وقف و زعّزت فيك عينيا و كان مش حاشمة منك باقي نتحزم نشطح بالوقت، اما حبيت نكمل نعيش لحظة ستنيتها عمر كامل..

نسمع فيك بقلبي و بكل عرق فيا.. ما شطحتش اما قلبي تخمر و نسيت في لحظة  الي عملتهولي الكل و الي نعرفو عليك الكل و سامحتك عالشيء الي انت ما طلبتش عليه السماح 

قتلي نحب نكمل معاك حياتي..و لي الشيء لي ذقتو معايا ماعمرك ماحسيتو مع حتى طفلة ملي خنتني معاهم..قتلي لي انا حاجة اخرى..و لي احلى اياماتك هوما الي عديتهم معايا

قتلي الي عمرك لا حبيت غيري قتلي برشا كلام اكثر ملي ستنيتو ببرشا

برشا عليا هكة انا نرضى و نزهى و نعطيك عمري الكل على كلام اقل من هكة

اما ما عمرك ما تكملي فرحتي للخر..

قتلي اما مستحيل اني نعرس بيك.. وقف عمري و هبطت هبطة وحدة من سابع سما لسابع ارض ترْكزت و تدقدقت كرايمي

انا ملهوني ماعاش نسمع اما ماننساش دموعك و الحزن لي في قاع عينيك..و يديك لي شادتني..يمكن خايف عليا لا يرخ بيا قلبي و نطيح..

قتلي انا ما نجمش نعرس..تعرف الظروف الي تربيت فيها و تعرف وجايع الدنيا لي في قلبي..مانيش متع عرس.. و عمري ما حبيت نستعرف بيني و بين روحي بمحبتي ليك..و عرفت عليك

برشا بنات فماش ما ينسيوني فيك..بلحق..معرفتش..نعنقك و الا نلفك بكف..

معرفتش..نسخف عليك و الا نكرهك.. نكمل على مرمتك و نجي مع الدنيا ضدك و نسيبك..و الا نخبيك من وجايع الدنيا عندي.. برشا وجيعة هكة على قلبي..

انت وجعتني برشا مرات..في كل مرة كنت تغيب فيها عليا بلا سبب..كنت تقص عليا النفس.. و تهبط دموعي في كل مرة لوجت عليك فيها و لقيتك قاعد في بلاصتنا.. مع وحدة جديدة.. و

نموت الف مرة كي نتعدى قدامك و تعمل روحك ما ريتنيش.. و نورمالمون كان جيت عندي شوية عقل راني بعد هذا الكل نقلعك من عروش قلبي..و نفسخ تصويرتك مالديسك دور متع مخي..

اما محبتي ليك..عمية..نساية.. تسامح كي قلب الام.. كل مرة رجعتلي فيها تلقاني نستنى فيك.. و نسامح و نفسخ و نعاود الصفحة من جديد..نقول هاي الدنيا رضات عليا..تذوقني من

جنتك شوية..و ترجع تسود الصفحة الجديدة بعمايلك القدم..معاش خليتلي جهد بش نهز بيه حمل محبتي ليك.. و معاش نجم ندور وجهي على عمايلك..و الا نرجع نحلك يديا كي تجيني

متوحش.. خلي هالمحبة توفى بفيانة. كيما كل حاجة مزيانة وجيعتها ولات اكبر من بنتها.. منجمش نكرهك..انا نجم كان نفهمك..نسامحك.. و نغفرلك و نقول تعمل في الشيء من ورى

قلبك..

انت تحبني..انا نموت على جد والديك.. غادي..في بلاصتنا متع العادة..ضارب في عينيك عقاب ضو جاي مالبعيد..زايد فيهم الشطر..غادي.. في البلاصة لي تشهد على ايامتنا الحلوين..و

على الطفلة الصغيرة الي ددشتها على خطاويك..غادي..سامحتك على كل شيء.. و عطيتك ليستة النصايح..زايدة شوية هالمرة..بزايد محبة..بزايد لهفة..بزايد دموع.. بزايد وجيعة.. ليستة

النصايح لخرة..متع السفر الي مافيهش تسكرة متع روتور.. و رشقت فيك عينيا لاخر مرة.. و مليت بريحتك رواريا..ما يزيني بش نكمل الثنية..و قمت..و دورت ظهري عليك..على كل حاجة فيها

شوية منك.. و مشيت..نكوع..اما مشيت.. بوجيعة رزينة في قلبي و بيد ترعش..حليت صفحة جديدة..ما فيهاش اسمك..

انت ظالمني و الا الدنيا ظالمتك..منعرفش..المهم انا مشيت في الساقين.. انت وجعتك الدنيا ياخي وجعتني انا..

ما خليتلي حتى حل..و قدامي حاجتين تو..وحدة امر ماللخرة..فراقك..و الصبر عليه..

"فراق الحبيب مرار..و الصبر مرار و مرين ياسر عليا..و ما طقت داهم..مرينو الصبر هو دواهم.."