تخيلتك و خيالك مكني وسكني...تخيلتك في ليلة فيها القمرة غضبانة و السماء هزى خشمها عليها سكرت بيبانها و خرجتها و حلفت عليها باليمينات لا تبات في احضانها...تخيلتك جيت احذايا في شارع ظلام لا قمرة لا هلال و انا لا حب و لا دلال ..و حبيت تنطق و انا سكتك ...و في هالليلة انا شاهية نمرمدك و نهرب منك اما موش لك نهرب نتجبى بين زناقي المحبة لساقيا نبلت و انا نحاوز فيك فيهم ...و لوج علياو حس بيا قداش ناديتك و ماجيتش ...و بعدت عليك و ماحنينش ..دللتك و ددشت بك كيف الطفل الصغير اليوم شاهية نملص يدي من يدك و نسيبك و نقطع حبل المحبة لاني لك و لك ليا...و لوج عليا ..

شاهية نلعب معاك شدة بالتقعميزة كيف الي لعبتها انتي معايا انا نقربلك و انتي تتكب على دمارك من جديد ...

شاهية نتمد قدام المدبية و نقولهم اقراو عليا و خرجوه مني راهو سكني ...مكني ...و معادش فيا ...و كان مانفعيش نمشي نمشي لسبيطار و نقولهم ولدوني راني حبلت به و كرشي اكبر من جرمو و هو يحب كان لبلايص الضيقة عليه ...و شاهية و شهوت اليوم صعبت عليا ...

شاهية...و شهوة اليوم صعبت عليا ...شهوة اليوم بالف ليلة و ليلة...شاهية نسكر بكلامك ...و مالشيخة نحوس في زناقي و ندق على البيبان نفرق في محبتك ...المحبة لداوي لا توجع و لا تخلي الاهل و الامالي و لا تنكر عشرة ...شاهية نسكر من ريحتك و نترنح على تنفيستك ...و نسبك ..نسبك بالكلام الزايد الكل و نسبك بالكلام الحلو الي ماتفهموش..ماتحسوش...و ماتنطقوش..

شاهية نعصرك و نعمل منك شراب و كل ليلة كي يغلبني الوحش لك نشرب دوزة نسكر بك و نهبل و ندخل لمخي نلوج بين تراكن على بلاصتك ...نفتفتها ...نمرمدها ..نصب عليها من ريحتك و نشعل فيها نار و مالرماد نعاود نصنعها .. شاهية نكتفك في شوني و ناخذ الي فيا فيك ...زرعت من روحي فيك برشة حتى وفيت ...و في هالشيخة شاهية ناخذ و مانعطيش ...اعطيني منك من روحك حتى شوية قطرة منك تكفيني و انتي مشحاحة حتى القطرة ماتعطيهاش ...شاهية ليلة نحطك مخدة نتكى عليك و نحكيلك علي مخبيتو عليك و الي ردمتو الايام و ماتقوليش يزي

و تقص عليا ...شاهية نسكر و نسكرلك فمك انا نحكي و انتي تخزر ...احكي بعينيك كان نجمت تحب ..و عرفت تخرج الكلام انا حكيت بهم ليا سنين و انتي هايشة بكمة ماتفهميش ...عينبك باني عليهم سور عالي اكحل ليل مايبين شي ...و انا شاهية نسكر منك بك و فيك ...