بين العين و رموش العين دمعتين على شفف معلقين...حابسين ... يستناو في كلمة ممكن حتى همسة و إلا ذكرى تعاداو عليها سنين....حِرْت لا عرفت لا نبكي و لا نخبِّي دمعي في قلبي الحزين
ما نجمش نقول الدنيا مخيبها ، نُظلمها. ياما ريت منها حاجات زينة.. و ما هواش الزمان إلي دار .. الوقت يقدّم و ماهواش غدّار ..

اللّوم علينا .. ربي يهدينا الطبع الخايب مترسّخ فينا.. ما نحبو كان رواحنا... الأنانية و الظلم حاجة كبرت معانا و فينا نوجعو بعضنا بالكلام و كيف نقطعو السلام و نقعدو نحسبو زعمة على شكون الملام!  ما تحسبش برشا تبّع الخير إلي فيك ... ماتخسرش وقتك و ناسك.. عيش عمرك و تبّع إحساسك... الدنيا دروس..

و شكون فينا ماقالش  لاااا انا منحوس فديت من حياتي و عكسياتي ...إنت وجه الخير و ربي إختارك باش تعلّم الناس فِعل الخير ... تعلمهم يعيشو بضمير.. ما تحسبهاش برشا خليك كيما الطفل الصغير.. أضحك للناس الكل.. ما ترد حد و ما تقولش هذا غريب و الآخر دخيل.. خلي بيبانك خيرك محلولة ... و إستنى رحمة ربي تصير... ضحكتك ،دمعتك ،بسمتك مرضتك، طيحتك، عثرتك و تكربيستك ،قومتك وحدك و تركيزتك على وجيعتك ... كلها حكاية لو كان انت تنساها ربي يحياها و يردهالك في وقتها، ترجعلك حكاية على محلاها...

خليكم سماح... الخيوبية مافيها رباح ...ساعات تتكدس هموم الدنيا علينا ... تثقل اكتافنا ، توجعنا قلوبنا و تدمع عينينا. نخرجو كلام و عقلنا موش علينا، نوجعو غيرنا و كيف  تجي فينا نقولو آه اللطف علينا تشوينا  باهي و إلي وجعتو انت و خليتو في تركينة!! غايضو موقفك و كلامك لي جرحتو بيه، الله يهديك و يهديه ، ..الله يهدينا كلنا على بعضنا خلينا في فعل الخير محلانا ، لا كره لا مشاكل لا دوانة.. خلينا ملاح باش ربي يجيبنا في الصلاح...
حبو بعضكم.. ما تخليوش للكره ياخو لقلوبكم ثنية... الحب هو الكل في الكل..  الحبهو النتيجة و  هو الثنية