نحب نقلك إلي وين نغمض عيني نراك، ندور وجهي باش نهرب منك و وين ندور نلقاك، ضعت معاك و تهت في سماك، عشقة على خوف كونو تمهميشة ..

فرحانة أما قلبي دم، نضحك اما موش بعينايا... طيرتني معاك و في السماء تقصو جوانحي، كل مرة تلقفني ما تخلينيش و كل مرة تعطيني جوانح جدد، نفرح.. اما مالا رعبة ماخيبو الخوف،  و ماخيبها الفجعة....و في نفس الوقت محلاها الرمية في شونك، كي تعنقني و نغرق في ريحة فلك و مشمومك، محلاها الراحة إلي نلقاها فيك ، و مخيبها كي نفارق صدرك و نبعد عليك

نحب نقلك زادة الي انا نهرب للسكات، نحكي بعينيا، لا تسمعني انت لا يسمعني الي حذاك، نحكي بعينيا، أما نطلب منك تسمعني و تحل وذنيك مليح، ما تخليش الكلام يريح...

تغيضني كيف الناس ترا القلوب في عينيا و انت تراها غزرة عادية، اغزر مليح، تصنط، نضمنلك لو كان تقرى مليح، تتحنط، تريح و يهزك الريح ، للموجة في عينيا،  للدمعة المتحجرة الصابرة عليك و ساخفة عليا، دمعة واحلة في شهقة، عازة بيا، تصنط مليح مليح راو الجوري كي ما تستحفضش عليه يريح و الورد كي ما تسقيهش يذبل و يموت و قيمتو طيح، راو الورد بشوكو يحمي روحو و انا بيديا نحيت شوكي و ترميت فاحضانك طامعة في دلالك..

.نحبك، وقلبي و عينيا شهادة، نار وقادة، صحيح خرنانة و كعرارة و دموعي على خدودي جرايا، ودادة مدادة تطلب عويناتي تاخذهم يعومو في دميعاتي، لو كان تطلب حتى دميماتي من عروقي نهديك و نسقيك، صدري بوسعي كلو ليك...قلبي كي قلبي ما تلقاش  علاش!، علاش تفركس و أنا كي تناديني ما نبطاش، حتى من رمشة عينيك ، من غزرتك و تنفيستك نسمعك تنادي و على جوابك ما نبطاش، كلي ملكك و ليك و أمر يديك، زيد أسأل روحك، علاش و كيفاش، عاشقة فيك و الا كذابة نظهر في عينيك، زيد أفرز المعاني و بربي ثبت في السكوت قبل ما تثبت في كلامي، بارا لوج و ايجا تو تلقاني كالعادة متربعة غارقة في سكاتي، قاعدة في شباك، أنا زادة نفرز في المعاني،  هاذي تقول يحبني.  و هاذي تقول يحبني أكثر و هاذي تقول في حبي فاني..  من فرط الحب تمهمشت و ضاعو المعاني...  يمشيش فيبالك نتهرب و خايفة بلعاني نبطى باش نجاوب و نتربث كي نخزر لعينيك و باش نكون جملة ناخو وقتي برشا دقايق و ثواني.. موش غموض و موش ظلام، ثبت في يدايا، ريتها ترعش! ريت الشمعة، تاوا ثبت في عينيا، ريت خيالها ريت النار الشاعلة فيا، حب على غيرة على حيرة... شفت سبب ظلالي! بنوتة ضايعة في بحر، موجة تهز موجة تجيب، نشابط مانعرفش نعوم، من نهار الي غرتلك و غرقت في عينيك، تو نحكيلك كيفاش نجيت..
بارا و ايجا ساعة تو تلقاني في هاك الشباك الي يطل على عينيك، نبرد في قلبي الشاعل بغزرة ليك،
حاجة وحدة، عمري ما شكيت في حبي ليك، ساعات حتى نجي باش نقول بالك حلمة بعد نقول منين الأحلام يزي بلا هبال و انت غمضة ما ضقتهاش...

تتفكر! تتفكر هاك الليلة تحت النجوم! تتفكر النسمة ليلتها ما فماش غيوم، تتفكر البرد الي كلاني و حضنك الي جاء عقاب الليل و دفاني!
تتفكر ليلة الدرجيحة و احاسيسنا الي درجحت حتى تشكبنت و تعقدت! و مالعقدة هاذيكا وليت نفنا و نموت على ريحة الريحة، تعلقت منها عاشقة و جريحة فرحانة طايرة، خايفة نبكي تقول ماكلة طريحة...

نحبك، نحب نمسك، نهارت الي طيح بين يدايا نكبش فيك كيما وصيتني، نشد فيك حتى بسنيا، بقوة جهدي بصوابعي ان شاء الله حتى بشوافر عينيا.. نمسك و بين ضلوعي ندسك، نخبيك على العينين، انت ليا وحدي فاش قام غزرة الناس و العينين، فاش قام الماشي و الجاي، و البنات و غزرتهم الي تشعل في قلبي في عوض النار نارين، انت متاعي وحدي نخبيك في مامو العين..

نحب و نحب و نحب اما الوقت كلاني، خلاني... ما تخلينيش انت، امان، استناني،  بين الوجود و العدم حاول تستناني ننضج، نقدّم و نكبر و الا نصغارو الزوز و نرجعو بالعمر لتالي، استناني باش نتعلم نستحفظ عليك و كان نجمنا نتلقاو حتى في ثانية مالثواني، ايجا، حملني، قلي الي انت تحبني، رد بالك تنساني و لو حتى لثواني.. كيفك كيف الاكسجين اما انت تفوتو بالريحة انت بنين، خليك كيف خيالي

استناني