أصبحت اشك ان ليس لي جذور كغيري في الطين... لحظ غاب عني منذ سنين... لواقع يحيط بي و لا يلامسني... لخداع اللمعة في اعين الناظرين... احساس الوردة البلاستيكية في عارضة بلورية... و عطر فل مرشوش...

إحساس الوجود و انعدامه... و احساس تزامنهما معا...

احساس ان تكون و ان لا تكون، ان توجد و تستعمل فقط عند اللزوم، صديق الضيق و الرفيق،

إحساس جفاف المعاملة و اللين بداخلك.. ، إحساس استغبائك و عيناك نظارتين... 

نحب نقلك إلي وين نغمض عيني نراك، ندور وجهي باش نهرب منك و وين ندور نلقاك، ضعت معاك و تهت في سماك، عشقة على خوف كونو تمهميشة ..

فرحانة أما قلبي دم، نضحك اما موش بعينايا... طيرتني معاك و في السماء تقصو جوانحي، كل مرة تلقفني ما تخلينيش و كل مرة تعطيني جوانح جدد، نفرح.. اما مالا رعبة ماخيبو الخوف،  و ماخيبها الفجعة....و في نفس الوقت محلاها الرمية في شونك، كي تعنقني و نغرق في ريحة فلك و مشمومك، محلاها الراحة إلي نلقاها فيك ، و مخيبها كي نفارق صدرك و نبعد عليك

نحب نقلك زادة الي انا نهرب للسكات، نحكي بعينيا، لا تسمعني انت لا يسمعني الي حذاك، نحكي بعينيا، أما نطلب منك تسمعني و تحل وذنيك مليح، ما تخليش الكلام يريح...

في ليلة مزيانة... من بين أغصان  الشجر هايمة و مغرومة نتفرج في النجوم.. نحكيلهم في حكايتي بالعنين موش بالكلام.. سارحة في زينهم و بهائهم ... نربط بين نجمة و نجمة.. نربط بين برشا نجوم .. نرسم في أشكال ...كايني طفلة صغير تخربش على الحيوط بالألوان ... السماء صافية ما فماش غيوم... برشا تصاور في مخي و برشا تصاور بخايلي رسمتهم في الهواء .. سارحة نسمة تهز و نسمة تجيب.. و في خيالي نسمع في موزيكا هي في الحقيقة حس النسمة تتغزل بالشجرة و ساعة ساعة تبعثلها ريح قوية تحس روحها باش طير... الريح يعنق في الشجرة.. الطبيعة تحب بعضها.. الشجرة مالفرحة تضحك بأوراقها  و أغصانها .. يعني كيفنا حتى الشجر يفرح و يضحك من قلبو و جواجيه...

انا بنية نعشق الزينة و الألوان،  شفت قلبك يضوي في برشا ظلام، تصويرة مخلبزة مبلبزة مرسومة بزربة.

قربت قلت نصلح التصويرة ، جبت فوشتي، ألواني و أقلام الزينة، تصويرة قلبك تصويرة طفل صغير،  كلو طاقة  و إيجابية،  طفل في يدو الألوان اما حاير مازال ماهواش رسام ، طفل ظالم و في نفس الوقت مظلوم.. ظلمتو الدنيا و ظلم روحو بصبرو عليها.. في يدك مصباح و دايرين بيك شموع ،علاش قاعد في الظلام! اخرج من جحرك ما تخافش البر امان.. انا نعاونك و نحميك... كنت في الظلام قبلك و ضيعت سنين من عمري.. هذاكا علاش فقت بيك.. اخرج و انا نضوي ليك و عليك.. و نقسم ألواني معاك..

بين العين و رموش العين دمعتين على شفف معلقين...حابسين ... يستناو في كلمة ممكن حتى همسة و إلا ذكرى تعاداو عليها سنين....حِرْت لا عرفت لا نبكي و لا نخبِّي دمعي في قلبي الحزين
ما نجمش نقول الدنيا مخيبها ، نُظلمها. ياما ريت منها حاجات زينة.. و ما هواش الزمان إلي دار .. الوقت يقدّم و ماهواش غدّار ..

اللّوم علينا .. ربي يهدينا الطبع الخايب مترسّخ فينا.. ما نحبو كان رواحنا... الأنانية و الظلم حاجة كبرت معانا و فينا نوجعو بعضنا بالكلام و كيف نقطعو السلام و نقعدو نحسبو زعمة على شكون الملام!  ما تحسبش برشا تبّع الخير إلي فيك ... ماتخسرش وقتك و ناسك.. عيش عمرك و تبّع إحساسك... الدنيا دروس..