أول مرة لمدة جمعتين نحط الستيلو فوق الورقة و نقعدو الزوز ساكتين.. مستانسة في راسي جوجمة، برشا حديث، نعبر عليه بضحكة، بملام، بخزرة، بتذبيلة، بعركة مالحيط،  بشعر و إلا بأي كلام.. ليوم و لبارح و لمدة برشا أيام،  ضاع عليا الكلام...

ستانست نشكي للورقة كيف يصعب عليا الكلام، كان حب، كان وحشة، كان خنقة، كان كره ، كان ظلم، كان ملام... نحط يدي على الورقة و الستيلو ما يخلي في قلبي حتى كلام... هل المرة سبقتني دموعي.. كل شي ضاع، تسمرت قدام الورقة و عكشو يديا هل مرة ما نجموش يوصفو الي بيا...

مقهورة، حسيت روحي كنت شعلة و تاوا وليت شمعة مطفية...

طول عمري كنت البنية الرومنسية إلي الحب ما لقالهاش ثنية... مسكرة على قلبها بلمفتاح فيبالها باش يعدي عمرو مرتاح.. ، الحب قراتو كان في الكتب، اساطير قدم و جدد، شافتو في عينين الناس، سمعتو من عند أصحابها،  في مخي حاجة خيالية باش تقعد ديما بعيدة عليا...

كنت نشوف في روحي قوية، موش كيما اي بنية ، ما يأثرش فيا الكلام، موش معناها قلبي حجر! نحس و نبكي و احن مني ما فماش، اما نوزن مليح كلام الناس و ما نتبعش قلبي و الإحساس،  ديما عقلي سابقني، هو الساس و عليه العمدة و القياس..

حتى جاء نهار ، جيت نشوف نلقى قلبي موش ليا، حل الباب و شد الثنية،  ثنية الحب إلي قلت عليها موش ليا.. حل الباب و ما شاورنيش.. و انا تاوا في حيرة و ظلال، باش نخلط عليه و نسايرو و نعيش الحب في الدنيا موش كيما ستانست بيه في الكتب و الا ناقفلو و نخاف عليه و نحكم عقلي و من نص الثنية نرجع بيه..

هو إحساس محلاه.. مصعبو و مقساه، الحب الي قلبي المسكين ليوما ربي بلاه، حب كبير قد صفحات الكتب، قد دموع العشاق الي بين الورق، قد الحكايات الي تحكاو، قد النجوم و الغيوم،  قد الصحاري،  قد البحور ، قد السماء و ما فيها من مجهول.. حبي كبيير

حبي يكفينا أحنا الزوز ، المشكلة ، المؤسف و إلي يضحك انك ما تلاحظنيش.. ممكن تراني شوكة في وردة،  عصفورة في قفص، غناية سمعت الموسيقى و ما ركزتش مع الكلام.. حاجة عابرة.. نسمة.. ريحة بنينة.  اما ما تقعدش تتذكرها.. على القليلة موش كيما انا نتذكرك... ما تلاحظنيش و ممكن ختى ما ترانيش... أما انا نراك كل يوم، نراك في اليقظة و المنام، ديما على بالي ساكن عقلي و فكري أيام و ليالي.. تسمع بيها " نخترعك في خيالي و بيك نعيش!" هاذي هي..

للأسف قد ما قريت كتب و نصحت ناس، جا نهار و طاح الفاس في الراس، في روحي ضاعو الحروف،  تعقد لساني، شنعمل في حبي ليك! نخاف نقلك تضيعني من بين يديك، و إذا ضيعتني،.. ما نخممش خير....

خليك حلمة من غير منام، بطبيعتو النوم جافاني.. كلامي موش ملام، أنا حبيتك و ضاع الكلام، خليك نسمة، وشمة، ذكرى،  خليك حاجة بنينة،  حتى دمعة موش لازم تبسيمة..

الحروف شويا عليا.. زيدوني في الأبجدية،  حبي اكبر مالكلام.. اكبر مالورقة .. لا عربية و لا حتى لغة أخرى تنصفني.. حبي اكبر مالكلام.. خليك في قلبي و السلام..