ما نعرفش شنو بالظبط لي وصلنا للحظة هاذي...و على قد ما كنت نتخيل كيفاه بش توفى حكايتنا لا عمري تخيلتها تاقف هنا

تسيبني هنا بين البينين منا نار و منا نار و يمكن قدامي طريق ضيق كلو حفر ممدود قدامي ما نعرفش لوين يوصل..و ثنية ورايا ترجعني للبنيّة الي كنتها قبل، مسكرة بباب فيه قفل طيشت مفتاحو عندك من نهارت الي حبيتك

وحلت روحي في هالبلاصة وحدي

مش بش نجي اليوم نرمي عليك غلطاتي

انا غلطت يآاسر و على خلافك انت الي تغلط مع العباد و تظلم و تبكي و تهز و طّلع قولش عليه مصير هالناس و رقابيهم بيديك

على خلافك انت انا ما غلطت كان مع روحي و ما ظلمت كان روحي و ما بكاتني كان الناس الي خليتهم انا يبكيوني

انت اولهم

انا عقدت خرطة في رقبتي و مديتلك الحبل

شنو نستنى من واحد يشهدولو الناس بالتسوقيط و يضربوا بيه المثل في التخوبيث و ما عمري ما ريت خيال اوسع من خيالو في الكذب

انا الي فديت من كذبك انا الي نعرف سيستاماتك

انا الي كي العباد تبدا تسب فيك نقول في قلبي مالا كان نحكيلكم الشيء الي نعرفو انا

!!انا نحبك

!!يجيش لبالك

كان نحكي هالكلام لواحد ما ما نعرفوش تو يقول مهبولة و الا ممسوسة في مخها

انا و بالرغم الي نحبك اما نعرف رواندك الكل و نعرف وجوهك الكل

الوجه البريء الي حبيتك على خاطرو الي لقيتو مالو الي وجه مرمي في قجر وسط برشا وجوه و سياتك تبدل و تتفنن

غزرتك الحنينة وانت خايفني لا نتغشش عليك، ماخذتك بالخاطر في التفاهات الي نحب نعملهم كان معاك، توسيع البال و السوايع الي تعديهم و انت تسمع في تخرنين طفلة صغيرة، تركيزك مع الديتايات الصغار الي تعرفني نشيخ بيهم و السر الي عطاهولك ربي الي يخليك تنجم تضحكني ديما..هاذم حاجات موجودين فيك ما تكذبش و انت تعمل فيهم، تعمل فيهم من قلبك و تفضحك لمعة عينيك كي تراني فرحانة

اما نرجع و نسال.. انا شنو بالنسبة ليك؟؟ و يمكن زادة و كي اي انسانة عادية وصلت معاك لهالثنية المسكرة جرة هالشوية حاجات الي هبلتني بيهم  نجم نسالك سؤال بديهي.. اما انت علاه تحب تفرحني؟؟صدقني امنيتي نلقى جواب  مقنع

هو فما جواب واحد اما ما يقابلشي

خاطر فعايلك..كلامك.. عمايلك مع البنات لخرين كي نحطهم قدامي و معاهم لمعة عينيك و نزيد عليهم احساسي و فوقهم امل يشعل في جاشي من نهارت الي عرفتك.. كي نحط هاذم الكل مبعضهم صدقني لا نجم نحلها.. الشيء مش مطابق بعضو و كلو تناقضات ما جاتنيش الجراة بش نشوف شنية الحاجة الغالطة بيناتهم

خفت لا الحاجات الي مخليتني نقوم الصباح هالسنين الكل يطلعوا كذب خفت لا الفرحات يطلعوا كذب خفت لا نكون ضيعت سنين من هالعمر مع واحد عمرو ما ما حبني
ماصعبها كي تخْرج ما نحبش نقولها ما نحبش نصدقها و نبدى نكذب و ننسي بش ما نخممش فيها و نبدى نركز في التفاهات الصغار الي تعملهملي و نباقق بيهم روحي و نمدهملها حجة قوية كي نتعارك معاها و تقلي هي راهو ما يحبكش تقتلني بيها هالكلمة

كيفاه ما يحبنيش؟!! و الي حكيتهولك هذا الكل

و في مكثر المرات ما نكملش حديثي معها نخافها لا تحصرني في كوان و تعميلي عينيا بالادلة متاعها و تتطلع انت بلحق ما تحبنيش

هكا ضاعوا خمسة سنين من حياتي حجج واهية و شوية احلام مستحيلة برشا دموع و فرحات كبار كبار قد السما في اللحظات الي ترضى فيهم انت عليا

ضيعت ايام و ليالي و انا نشمشم كالقطوسة نعس عليك من بعيد في اما لحظة تبدا في صحنك بش نقربلك و نرضى نستنى ادهرة في يديك بش تناديني و نترمى في حضنك و ننسى الي عملتهولي الكل

عيشتني كيما اكثر حيوان نكرهو في حياتي و يمكن نكره روحي كي نبدى كيفو اما شيء اقوى مني يخليني لابدة في الشيرة الي مقابلتك نستنى في اللحظات الي ترضى عليا فيهم و تدخلني للشيرة لخرى متع الدنيا

لين قلبي فد

ضحّكت عليا العباد و ضيعت صغري على خاطرك من غير ما تقلي كلام يرويني ترميلي ساعات كلمة باردة ساردة في وسط الجملة نصبر بيها روحي

شادة قلبي بالحاجات الصغار الي تعملهملي اي و الحاجات الكبار؟؟

و الساس؟؟

و البنية متاعنا ويني؟؟

حاصرني في جنّة بلا سقف بلا حيوط و وقت ما يظهرلك تسيبني

لوقتاه؟؟

انا خاطرني فديت و انا نستنى فيك تنطق، جيتك انا من غير ما نشمشم جيتك مرا مش قطوسة مرا تعرف عليك همك الكل و دوسياتك المسخة و كيفاه تطلع يدياتك نظاف و تعرف الطفل الصغير الي في وسطك الي حبّبها فيك

جيتك و رميتلك على وجهك طرف الحاجات الي خلاوني نحبك مطمّنة قلبي بكذبة انك تحبني حاجة مش موجودة كان في خيالي وفي عينيك الكذابين دخلتهالي انت في مخي بش تغلف بيها خوفك الكبير لا تضيع من يديك مرا بهلولة كيفي

جيتك و رميتلك تحت ساقيك عمري الي جاي نكملو معاك و اعمل فيا اش تحب

و مديتلك الحبل و كيما ما كنت ديما ساقط تسوقطت معايا كيما ما عمرك ما تسوقتط على بنت مرا

انا الوحيدة بينات البنات الي لعبت معاهم الكل الي وصلتك لهنا و حصرتك في تركينة لين طلّعت عليا خباثتك الكل و قطرتلي ترهدينك و كذبك و وريتني قداه تبعد عليك الرجولية بالظبط
و على خاطرني حصرتك وليت تفرفط قدامي كالدجاجة المذبوحة

قتلي برشا كلام

قتلي الشيء الي لا عمري تخيلتك تقولهولي

اما قبل هذا قتلي الي انت و كي تدور الدنيا ما تلقاش كيفي و الي انا ياسر طيارة و زمارة

لهنا نحسابك بش تعمل السيناريو الي نعرفوه متع الرجال السقاط الكل الي كي تحصرهم يقولولك هالكلمتين و يفصعوا

اما انت تسوقيطك سبيسيال و تحب كي تمشي تمشي بنظافة بش حتى كي نجي نتشكى منك ما نلقى ما نقول و ما يفهمني حد

و اكثر من هك انت ما تحبنيش نمشي

انا هكاك فيبالي سايي فاهمتك و وريتني خبثك للّخر اما انت طلعت اخبث من هكة

كان وقفنا هنا راني ما توجعتش خاطر الشيء هذا نتوقعو منك علخر

و يمكن راني كملت حياتي وانا عايشة على امل ترجعلي

اما انت قلبت عليا المشامية و قلبتها على روحك من غير ما تفيق

و رميتلي الكورة عندي في بالك بروحك مهف و ملي كنا في حديث فراق و في حزن في قلبي على اني بش نضيعك

!! نطقت

قتلي انا نحبك..... مالكلمة هاذي قلبي وقف و زعّزت فيك عينيا و كان مش حاشمة منك باقي نتحزم نشطح بالوقت، اما حبيت نكمل نركّز في كلامك نقرى فيه في شفايفك قبل ما

نسمعو.. نسمع فيك بقلبي و بكل عرق فيا.. ما شطحتش اما قلبي تخمر و نسيت في لحظة  الي عملتهولي الكل و الي نعرفو عليك الكل و سامحتك عالشيء الي انت ما طلبتش عليه السماح  قتلي نحب نكمل معاك حياتي و ما نجمش ما نخممش فيك هكة و مهبول الي بش يسيبك من يديه و الي احلى اياماتك هوما الي عديتهم معايا

قتلي الي عمري لا حبيت غيرك قتلي برشا كلام اكثر ملي ستنيتو ببرشا

برشا عليا هكة انا نرضى و نزهى و نعطيك عمري الكل على كلام اقل من هكة

كلامك  طيرني للسما و دخلني للجنة و وراني الوان جديدة و حسسني الي انت تستحق سماحي ليك وتستحق الليالي الي تخيّلتك فيهم مدخلني و انا بروبة بيضا

انا هكاك و سيادتك ابدعت و طيشتلي على وجهي احلامي و سنيني الي ضاعت

قتلي اما مستحيل اني نعرس بيك.. وقف عمري و هبطت هبطة وحدة من سابع سما لسابع ارض ترْكزت و تدقدقت كرايمي و كليت اقوى كف ينجم يعطيه راجل لمرا كليت طيحة للحظة قلت مستحيل نقوم منها

انا ملهوني ماعاش نسمع اما ماننساش كلامك تخضريطك و تفرفيطك توكويكك و هزانك و نفضانك

قتلي انا ما نجمش نعرس تو و انت تعرف ظروف دارنا و ما نجمش نخليك تستنى و نقعد معاك و حرام و ما يجيش..... و انت طفلة قداه بش تستناني زايد هذا الكل و كان فما مكتوب تو يلاقينا

انت في بالك فرشتني اما يمكن تسوقيطك لي سنستني بيه خلاني قوية و ما فلتش لحظة كيما هاذي و من غير ما نشعر فرتت عليك كرشة

اما حرام هو فما حرام اكثر من هكة اماهو دين هذا الي يحرم عليك تقعد تحبني الدين متاعك انا كافرة بيه

و انت خايف عليا لا نستنى و ما خفتش عليا من عمري الي ضاع و من الناس اش تقول عليا

ما خفتش على قلبي الي ولى كي ورقة البقلاوة انت تقطع و انا نرقع

انت تحبني كيفاه تحبني؟؟ كيفاه تتجرا و تقولها؟؟ ما صح رقعتك تحبني ياخي تسيّبني ؟؟ حتى بعد ما قتلك مش لازم نعرسوا و نقعدوا نحبوا بعضنا لين يفرجها ربي؟؟

كيفاه الدفينيسيون متاعك للحب؟؟ تلعي تلعب تلعب و تخونني و تسيّبني و قتلي تحب و تجيبني وقتلي تحب؟؟

نهار تفرحني و ايامات تبيّتني نبكي؟؟

كيفاه الحب عندك؟؟ كيفاه الحرام عندك؟؟ انت من انو طينة؟؟ منين جيتني ؟؟ شكون رماك على خلقتي؟؟

وليت تصيح و تعيط تصور انت تعيط عليا، انت الي كنت تخافني نتغشش كان نطلبك و ما تهزش وينو الطفل الصغير الي في وسطك؟؟ يمكن هو الوحيد الي يحبني

اليوم وريتني وجوهك لخرين و انا متاكدة الي الطفل الي في وسطك قاعد يبكي وريتني تسوقيطك للخر و تخوبيثك وين ينجم يوصلك

الي يحب ما يسيبش حْبيبو يتلوّى و ما يخليهش يتقلى و انت شعلتلي حريقة في قلبي مش عارفة كيفاه نطفيها

اما نشكرك الي وصلتني لهنا قتلت فيا الامل اني نلْبسلك ليك الروبة البيضا و وريتني الي سنين من عمري عديتهم بش نوصل نفهم الي فما عباد سقاط هكة

اما حاجة وحدة مامشاتش كيما تحب انت و اول مرة انا ما نطاوعكش انت حبيت تخليني في حياتك بلاش عنوان و نقعد نستنى و نتلوى و شوف قداه بش نزيد نضيّع من احلى سنين في عمري حبيتني نفيق وقتلي يفوت الفوت و فاللخر بش تلوحني كيما لوحتني كل مرة و تتعنكش في مرا اخرى تحطها تاج فوق راسك و تلوحني انا و تخليني مطيشة رهينة في تركينة
اما دويو فما ربي و فما عباد بعثهملي ربي خلاوني نفيق مّخر اما مش برشة

حياتي ليا تو و سنين عمري الشابة مزلت ما عشتهمش

نحسبك قضا و الا ابتلاء من عند ربي و انا حامدتو على ما هْبط عليا نشالله يجي نهار و نقابل راجل في حياتي و نقول  الي عرفتك انت بش كي يجيني راجل كيما هكة نعرف قيمتو
ما نقلك شيء و ماعاش بش نضيع وقتي معاك امّا حسيبك للزمن