Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
حب تونسي
"doctoura"- الدكتورةكلمني عليها
على سر و خنار في زناقيها
على القلوب الواسعة و الناس الطيبة لي فيها
على تونس الي هازينها اكتاف اماليها
***
نحكيلك على زور يقدح من عينين صغارها
عل العلامة لي خرجتهم على ولادها
على معلم و طبيب و قاضي خرجوا من افادها
على الصيودة الي يحميو في ترابها
على كل من يحبها و ما يقدرشي على فراقها
***
نحكيلك على الكسكسي بالبوري
على بنة الملوخية و فك علينا مالماكلة السوري
نحكيلك على زين مرا في سفساري
و وهرة راجل في جبة خمري
و على زين تونس ملموم في شاشية قرمزي
***
نحكيلك على ريحة الياسمين
على مشموم فل مرشوق في قرن مرا في الخمسين
على كعك ورقة بالنسري و كاس تاي بنين
على ريحة القهوة العربي و كعبة بقلاوة شحورها سايل عالجنبين
***
نحكيلك عالبنة
على حاجة ما تلقاها كان عنا
على حبنا ليها مهما فدت منا
مهما صار فيها..تقعد امنا
***
امك و يجيش تلوحها!!
تشيشة من روحك..ما تنجمش تكرهها
بلادك! عمرك لا تقطعها
تدور تدور..و حاجة فيك تخليك ترجعلها
***
ترجعك ليها
نسمتها في المغرب و دولاشة العشية في زناقيها
بنة اللمة و الضحك و القعدة مع ناسها و اماليها
قانون و عود و مالوف و سهريات مزينة لياليها
العشقة لولى و ايامات حلوة عديتهم فيها
ترجعك..محبتك الكبيرة ليها
***
تونس يمكن لاهي اشب و لا احسن بلاصة في العالم اما البلاصة الوحيدة الي تحسها متاعك 3>
"بقلم "الدكتورة
Website Design Brisbane
Tags: