برد الحروف يضرب في العضم  وجيعة أقوى من هشاشة العظام ..الدنيا بردت وشتاء سنه وإلي بعدو  وإلى اخر شتاء في حياتي حالفه لا نعديه وحدي ...

ألف حكاية دور في بالي ونحب نعرف ....

كلمتك على قهوة وجيتك نجري... نحب نتغطى بجواباتك وندفى بكلماتك  ....جيتك حفيانة من التخمام ...والاسئلة ضاعت  من بالي ...

جيتك نكركر   في حلماتي ...لبلاصة اخترتها انا ..تخيلت سان و نحب نعيشها ..موش لا زم قهوة و الناس دايرى بينا ...هنا في الكرهبة راكشين على البحر ،... موش باش نشرب  القهوة الكحلة الي بثلاثة سكر حتى لو كان مرة دفلة طوابع سكر ديمة ثلاثة بدلتها بزوز شوكولا شو وطارت من يدياتي ..ركشة منزلية من غير ايتيكات القهاوي ...

سرحنا في المطر  إلي كملت كل شي ...

طقس رومانسي ...

ونسينا بش نعنقو بعضنا ....تلهينا فالمطر  إلي تسيب في تزعبينها على لبحر ...

تقطرعليه قطرة قطرة ... شي كبير يا كبدي ...تزعبين طبيعة ومناخ وفازات احنا مانفهمهوش  ..لبحر هايج مايج  قتلوا الوحش لدفى قطرات لمطر ....كيفي بضبط متوحشى نعنق حروفك وإنت عامل مولى دار مش هوني ...علاش  ها الشر الكل ...هذيك تزعبين مناخ وفهمناه  وقانون طبيعة ما يعنقو بعضهم كان من الشتاء لشتاء...وإنتي  ...زح تي لمطر ساعات يغلبها الوحش وتجي في طمبك اوسو ... وأنتي  لا جيت لا في اوسو  ...لا في ليالي لا سود ولا البيض ؛ حتى غسالة نوادر  جات وفاضت الوديان وحملت ....وإنت بايع طرح ....كشاكشي طالعة ونغلي وحدي ...إلي يسمعني  يقول    مشى في الساقين ... هكاكة  سارحة وعكس الي ستنيتو صار ما نشلق  كان بيديه حللتلي شعري :محلاه شعرك خليه ديمة هابط على أكتافك .
- نقول شيهمك فيه شدتو وإلى مسيبتو ... تي شدني إنتي تاو نسيبو ... نتكلم  وحدي

قالي أحكي : نحكي تعرفني الكلمة هذي تبلوكني مش وقتها جملة ...إي نحب نحكي ...حاسة روحي وحدي ...حد ماهو معايا ...توحشت حاجات صغار تافهين ... توحشت كلمة محلاك ومابنك ....وتعنيقة تنسيني تعب دنيا ....توحشت حد يحبني ويموت عليا ...يكتبلي في نهار ميات  المساجات  ..يسهر معايا لعقابات ليل وأنا نحوز في النوم  ...ونقوم على  صوت ويذكرني بحاجات مزيانين باش نعيشهم  ويذكرني بفطوري باش نهزو .. توحشت  ندور بالشارجور تاليفون في ساكي خايفة  اطيح شارج ومانسمعش  صوت ...

إي توحشت كلمة بنينة نسمعها ....وكلمة رد بالك على  روحك نقولها ...فمي توحش يقول نحبك وخليك معايا ننطقها من غير خوف وتلقى شكون يحسها ...   توحشت عركة ونبدى طالعة لسماء ونحضر في كلامي الماسط وكي نراه ننسى علاش تعاركنا ... ونغار ونقولها نغارعلى حاجة متاعي و حقي و مانحشميش بش نقولها ونحسبها ألف مرة ...توحشت تجيني وردة على غفلة ...ونسرق بوسة فالقهوة ...وفي نهج فارغ ...وفي نهج في عباد تمشي  عكسنا ..ونلف روحي في كبوطك كي تبدا شتاء ...وطبلية شوكلاتة مدسوسة في ساك ومعها ورقة صغرونة مكتوب عليها هذي لسهرية ...حد يقولي محلاها ريحة البرفان  متاعك وكي توفى يشلق بها وكي نبدلها يشرلي عركة ويقلي نحبها كان هيا ..ويشلق بالشيبات لطلعوا في شعري  ..ومن صوتي يفهم أنا شنية حالتي نفسية ...ونطلبو نبكي على القطوسة إلي عرضتني في الشارع ميت ويبقى يسكت فيا ساعة كاملة وميفديش ....ونبكيلو على الروسات متاع طارت إلي نحب نطيبها وجات خايبة ويبقى يخمم معايا شنية لخليها ماجتش كيف مايلزم .....

قداش توحشت حاجات تتحس و صغار حد مايهتملهم  ....توحشت ....وفي وسط لتوحشتو  الكل توحشتك إنتي ومانحب نعيشهم كان معك إنتي ...توحشت نحبك ونقلك بصوت عالي نحبك يا قمعي ويا مضطهد ودكتاتور ..يا حنين وقلبك رهيف ..يا فوضى ..منظمة...مقسمة...توحشت نحبك بهبالك وعقوليتك لتهبط قدام الناس ...ونحكيلك على كبر محبتي لك إلي على قد وجيعتك لمخبية بين فواصل لكلام... ومتركنة في داموس ظلامك ..نكذب عليك كان نقلك عشقت فرحتك كهو  لا لا عشقت ظلامك وتمنيت تجبدني ليه ...نعرف بدفى  قلبي نشعل نار تحرق ليكوي وتضويه....توحشت ميات لاحلام حلمتهم مانحب نعيشهم كان معاك  ...يا قلب ثلج يا إلي عمل فيها ماتحسيش ...ما تحبيش ...والرجل الحديدي ...ويا جبل مايهزك ريح ... ونحبك فن وهبال ومرض و دواء ...عصب وستراس و ضحكة في وسط الغش ..ة برشة حكايات لا تتحكى و لا تتسمع ...و زيد نحبك اكثر كي تصعاب عليك دنيا ..ما نحبيش نخليك ...حتى كان ما تحكيش ...ونحبك في وسط طزازٍن لبنات  إلي دايرين بيك وإلي خلاتك وإلي خليتها...

توحشت نحبك يا بير غارق ...ويا مخبل في كبة...وبسوفنير ك الباهية لعشتها والخايبة لكبتك...وتراس طيحات صغر وطيحات قلبك كي كبرت ..ومازالت مانعرش علاش نحبك والى شنية نحب فيك ...ونحبك كي تخاف من روحك وتتخبي ورى موزيكا تعشقها ...وتوحشتك وهاني حكيت ...وإنت شنية تحب تحكي ....