المحبة ماتهونيش ...ما تتباعيش و ماتتشراش و كان يعملو سوق محبة و يبيعوها بالكيلو كنت نشريها كماين كماين و نهديهالك لك وحدك ....نهديلك المحبة على طبق مالورد مناحي من الشوك و بتبسيمة في القلب ... كنت نحبك ...نعشقك ...

كنت برشة حلمات مصورين فيك ..كنت نراك كتاب مقدس هابط من عند المولى تكتب في سابع ارض و خرج تصور فيك كنت ....حكاية ماتتحكاش ...راجل يعرضك مرة في الدنيا جاي من زمان بوعنبة و كنت فايتني بليلة و كالليلة لفتني بها علمتك الحيلة و اللعب على الكل ...كنت حروفي لنكتبها ...

اما اليوم حيلي تهد ...تعبت عييت ...و تخنقت ...منك موش مالمحبة ...عرص الحب و العشرة هديتهم انتي عرصة و راء اختها ... و غلطة حبيتك بلاش رخصة و هالقلب لعندي دعثر فيك وقت الي توجع مشى لبال باش تقيمو اما زدت كبيت ...و اليوم ايست منك و ايست اني باش نعاود نشم ريحتك ..نحملك ..نبات عندك و كرهت سلامك و كلامك و ملامك ..و حتى حنانتك لولات شوك يوجع ..يجرح ..مايداويش ... وكرهت بوسة خلات رقبتك كي حبيت نبوسهم نلقاهم تعداو علاهم الاف البوسات الجدد ماعادش عندهم مطعم ...

ايست منك كي عطيت وردك لغيري .. لهفتك ...وقتك ..هبالك و فنك ...كل حاجة فيك عطيتها لغيري ..و انا ...

انا شوكك زرعت فيا ... وجعتني قد وجيعتك مالدنيا ....بدلتني ...غيرتني و في الاخر ..نستنى فيك و في يدي هدية لك صانعتها بيديا ساهرة عليها ليالي و المشكلة اني عملت الف سيناريو في مخي كي تراه شنية باش تقول و حضرت برشة كلامك و الف حلمة كتبتها ...خسرت عليا في الاخر باش نبطى اقعد استناني و موش باش تبطى خاطر ترنسبور لا ...باش تبطى خاطر مع فلانة عرفتها جديدة سبقتها عليا و تستنى معاها في تاكسي و عجبتك قعدتها قلت خلي نزيد و انا على رف المسنية كتاب قديم قريت ما ثماش علاش تتلهف عليه و تجيه تجري ...وقتها بذات توضيت بدموع احلامي و مستنيتي و قريت عليك سورة الرحمان وصليت عليك صلاة بلاش لا ركوع و لا سجود ....و مضمضة الاف المرات على كل حلمة نطقها لساني و تبريت منهم .... خليتهم لك و لها ... انا نحلم معاك و نكتب في كراسة و نحسب في الشهرية كيفاش نخلي منها باش نستدعاك على برشة بلايص و انتي قايم اذان احلام وحدك و معاها تسرق في احلامي و تعيش فيهم معاها .... و انا على بنك الاحتياط ...

ايست منك كي وليت نشوف روحي مرا ناقصة و انا معاك ...ناقصة برشة محبة من عندك ناقص برشة لهوة منك ..ناقصة تكون ليا وحدي ماتتقسميش بين الاف البنات معايا ...و تعرف اكثر مرة ريت فيها روحي طروف مطيشة في القاعة وقت الي عرفتها هذيكة الي كي نطلبك و انتي معاها ماهزيش عليا و تقولي نخدم و المرة الوحيدة الي هزيت عليا فيها قتلي هاني في طرف الجنة ملي عرفتها وليت نحل تصويرتها نفركس فيها شنية فيها خير مني اي نسال في روحي و نحكي مع تصويرة ...و الف سؤال يدور على بالي ...فاش تحكيلك ..شنية عندها انا ماعنديش منو ... و بعد فقت و لبست تصويرتنا كفن كي تشققت تصويرة روحي قدام روحي ... كي الداخل ولى مرمة ...قزاز ..زلزال ..كي تنفيسة ولات تخنقني ...كي دمعة تحصرت بين كلامي و كلامك...

كي عرفت و فهمت لانا حبيتك كيف ما تمنيت حد يحبني ...كي حبيتك اكثر مااللازم .. و اكثر مني روحي ...و اكثر مالمحبة بيدها ...كي عبدتك عبادك و قتلك احسبني سجادة و صلي عليا ...كي حبيت نكونلك ماء طهارة يخفف جروحك ...كي شعلتلك عينيا شمعات يضويولك تصويرتك ....كي حطيت روحي بلاصة لبنات لوجوعك و قلت ذنب حواء ماداويه كان حواء و النار لزرعوه فيه بناتها نصبر على ليعات و انا نطفيه ... اما نارك ماهداتش و محبتك ماتت مع صغرك قلبك مع كل طفلة عرفتها و مشات بنيت حجرة صم عليه .. حطيت لحودهم على قلبك حتى ولى جبانة ....

ايست منك كي مديتلك يدي و قتلك اهيا جناح يطيرك اما انتي رميتني على طول يدك و تعديت ...ايست منك كي فهمت لانا و انتي ماقريناش فرد فن و ماتخرجناش من فرد مكتب انا قارية فن محبة و انتي استاذ في فن الوجيعة ... وجيعة الناس...

انتي تعرف توجع و انا نعرف نفرح الناس ...انتي تعرف تبكي و انا نعرف نزرع ضحكة على وجه الميت .. ايست منك كي حبيت نتخاتر معاك شكون يفرح الاخر اكثر و انتي طلعت تتخاتر معايا

شكون يبيع الاخر قبل و شكون يوجع اكثر ...

ايست منك كي عرفت لانتي تبدل لبنات كيف ماتبدل حوايجك و الي لاي وحدى تنجم تاخذ وقتي منك .. اما بعد ماايست منك نحب نقولك حتى وحدى فيهم ماتنجم تكون كيفي ....

اما انا ايست منك كي تتذكرني من غير ماتجي وحيعتك خلاتني ناقف و نفوتك و نفوتها