و تعداو نهارين..منعرفش كيفاه تعداو اما تعداو..نقوم نمشي نخدم نرجع ناكل نرقد..اول ما نحل عيني طول نتفقد تاليفوني باكلشي رجعلك شاهد العقل و بعثتلي مساج بش ترضيني..شيء..نلوح ساقيا عالقاع و نهز روحي هزان..قدام المرايا نرى خيالك ورايا..بزوز يدين حنان معنقني لافف بيهم وسطي.. تستويلي في خصلة هابطة على عري..مبنك..

قدامي قهوتي.. كملتها و قلبتها بش نقرى فنجاني طلعلي وجهك..ماحنك حليت الباب..حسيتك سبقتني مخدم الكرهبة و تزمر..خرجت نلقى الكرهبة واقفة و انا لي بش نسوق.. يديا باردين كي يدين الميت..قلبي ثلج ابرد من سيبيريا..روحي شايحة..غزرتي طافية وعينيا طايحة..كسرت فيا حاجة من داخل و خليتني كل طرف في بلاصة..ماخيبك..

في الثنية الغناية لي نحطها تفكرني في سماك..الضو لي ناقف فيه نشوف وجهك عوض الاحمر و ندهش و يشعل الضو اخضر و انا باهتة لين يزمروا عليا الكراهب..يا دايخة..عمية ما تراش..كرهتك..

ننساك كان كي نعتب باب الخدمة غادي منلقالكش وقت..اما كومام ما نايسش و نشعل تاليفوني كل شوية..و كل تنوقيزة نقول انت..شيء..مشومك..

في الفطور..نلعب بكعبات المقرونة..يحبني ما يحبنيش..نساني ما نسانيش..نعشقك اخر العشية..قدام التلفزة فاقدتك..  عقاب الليل..متفكرتك..

اليوم خير شوية..قعدت ساعتين ما خممتش فيك..و كي تفكرتك عوض نبكيك قلت نكتبك..و نكتب ليك..كومة اوراق كتبتهملك كان نتصالحو تو نقراهملك..توحشتك..

مش بش تجي تسامحني و تقلي يزي مالخرم وايجا عندي و نتزعبن انا و نقلك لا لا متغششة عليك و تعمل هكة بيديك تخطفني و تسرق بوسة بالسيف عليا و تدورني دورتين في الهوا تدوخني..شبيك هالمرة قول تستنى فيها..قول فرحان..مخيبك مكش بش تجي..ايجا..مسامحتك..معاش نخرنن و معاش نغير..ايجا برك..حاولت ننساك..فسخت نومروك من تاليفوني لقيت روحي ننسى وقتاه تولدت و ما ننساهش.. فسخت تصاورك و كي غمضت عينيا في اليل تحليتلي تصويرتك كبر الحيط.. حلفت بش ما نهزش عليك و كي سكت صوت تاليفوني تكلمتلي انت..نلقى صوتك ساكن فيا..

ايجا برك..ملغير ما تلحلح سامحتك..و من غير ما تحلف صدقتك..و ملغير ما تفسر فاهمتك..نتزعبن عليك..و منجمتش روحي بلاش بيك..ناقصني و فاقدتك..ايجا برك..

الصباح كي حليت باب الدار حسبت روحي نحلم..قلت كبر بيا الهبال و لازمني بسي..انت..واقف لابس سوريتك الحمرا كاروات هازز وردات حمر في يدك و وجهك يضحكلي..منيش مصدقة..خطفتني ببوستين و تعنيقة..ظاهرلي نحلم..اقرصني.. و مع كل كلمة تقولها نحس في نوار في وسطي قاعد يفتح..كاني نحلم فيقني.. و عرفت لي عملتو الكل طاح في الماء وبكلمتين و من غير ما نقاومك رجعتني ليك..انا طول عمري ليك..يا عمري..نحبك..