"doctoura"- دكتورة


بطلت ماعادش!! يزي قتلكم فكو علي قتلي!!!! بطلت.. ماعادش قارية كتب ،و سيديات ام كلثوم بش نمشي نرفسهم بساقيا ... علاش؟؟؟؟؟؟؟ تحبو تعرفو علاش؟؟ انا بيدي ما نعرفش و هو ما فسرليش قلت نبطلها ام كلثوم فماش ما يرجعلي

..
البارح انا ما سالتوس علاش هو قراها في عينيا..سمعها في غزرتي قراها في شفايفي.. و قالي:"كل حد على روحو" بعد 5 سنين ... وطاح يخرف شطر الكلام ما سمعتوس خاطر كل حاجة في كانت تصيح: "علاش " قالي انت مكش متع عرس امي ماحبتكش و قاتلي اخو سهير بنت جارتنا الطفلة حط فم تلقى فم

حتى دموعي ما حبوش يهبطو تثلجو..كي قلبي..
"انت ضحاكة برشا، و امي تحب وحدة راسها مالقاع ما تهزوش"..
"انا راجل نحب على مرا كي نقحرلها ما تخرجليش من عنييها اكا الطفلة الصغيرة الساكنة فيك!! تقتلني هككاكه.. ما نجمش" ..


"بابا ما يحبش وحدة تعدي سوايع قاعدة تبحلق في البحر.. اش يقولو علينا الناس؟؟ كنّتنا ينقصلها "؟؟
"

ما نحبش ناخو وحدة حافضتلي درويش و نزار و تميم ..و قارية القصص الكل تع المكتبة العمومية الّي في حومتهم!! منحبش النسا الي يقراو برشا..يخوفوني!!".. "قتلك يزي من قراية القصص رام شيهبلوك!! قتلك ما تحلمش والدنيا ماهاش روز كيما سيادتك تحساب!! قتلك خلي ساقيك عالقاع ..قتلي يدي في يدك و هاي نطيرو مع بعضنا.. منجمش نطير انا !!مْسلْسلْ!! جوانحي مقصوصة"..
"


منجمش ناخو مرا لازم نشدّلها يدها بش تقص الكياس، وتنغغ كي الصغيرات كي نبدا نصيح عليها..و تولي تبكي كي نخليها وحدها !! اتّعبني و نضعف قدام غزرتك و تكشبيرتك و دلالك"..


"انت طفلة تكره الروتين تحب كل يوم غناية و كل يوم حكاية انت طرت و خليتني.. علاه خليتني؟؟ كنت احلى حاجة في حياتي!! كنت التبسيمة الحلوة.. نعشقك كي تبدا تاكل و كي تبدى تمشي و كي تبدا تصيح و كي تبدا تبكي و تذوب الصيد الي فيا، تمشمشو، تاكلّو قلبو ..شيقولو عليا الرجال؟؟.. و كي تبدا تغني.. حبّبتني في ام كلثوم.. و على خاطرك سمعتها 3 سوايع و هي تكعرر" .." الدنيا الروز الي كنت معيشتني فيها و الفرحة و البراءة و الضحكة ما يحلوش دار و ما يربيوش صغار و ما يطيبوش ملوخية


"..
"انت طفلة معبية بالتناقضات.. انا ما فهمتكش سوري والا عربي ؟؟ تحب الازانيا والا الحلالم ؟؟طبيبة والا شاعرة؟؟ تي السخطة تفهم في كل شي !!دين ..ساسة.. تاريخ.. فن.. كتب ..شخليت بلله" ؟؟ كل شي عندك منو ومنين ندورك تدورلي..نخاف منك..تغلبني و تبهذل بحالي

"
............................................................
فهتو تو علاه؟؟ رتحتو!! شفتونيش قداه سعدي مكبوب؟؟ انا ..اي نعم انا تعرفوني شكون انا؟؟


انا الطفلة للي الولاد يشتهيوها اما ما ياخذوهاش ،يحبوها اما ما يعرسوش بيها، انا الطفلة للي نعجبهم و ما نعجبهمش!!


انا الطفلة للي الولاد يشيخوا عليها، على تمهميشتها على هبلتها على ترهويجتها على هبالها و اللّمعة الّي في عينيها.. على ذكاها و شطارتها..انا يحبوني اما ما يعرسوش بيا

دكتورة