كي عطشان ضايع في صحراء... كيما لي ضيع جوهرة نفيسة ما يملكش غيرها، كي مريض الوجيعة تقطع فيه و ما لقاش دواء يخفف عليه، كي طفل ضيع ام..و كيف ما هاذم الكل انا ساهر نلوج عليك.. انت بالنسبة ليا الماء، انت الدواء و انت السماء، انت قلب الام لي يغفر و يسامح، انت كل حاجة غالية!

! شفت مصيبتي مكبرها؟؟ خليتني بعدك صغير بلا قيمة و ما نتراش، خليتني رايح نلوج عليك.. لوجت عليك بجنبي ملقيتكش قلت بالك في الكوجينة كي عادتك قمت تاكل عقاب الليل لوجت عليك في الصالة بالك ساهرة على فيلم والا تقرى في كتاب و تغفص في دموعك شيء ما لقيتكش.. طحت نبربش في قجرات مخي نلقاش ذكرى قديمة منك،

لقيت لي انا خرجت من عشقتي معاك بكدس تصاور متع لحظات مزيانين مخبيهم في مخيلتي خايف عليهم لا هوما زادة يمشيو و وقتها ميقعدلي شيء منك سمعت كلامك كي مرة قتلي كي تبدا في لحظة مزيانة غمض عينيك و خوذ نفس تو تتسجل اللحظة قولش عليك صوّرتها بمصورة و وقت ما تستحقلها عاود غمض عينيك و تفكرها تو تعاود تعيشها و تتبننها..

و كالعادة طلع كلامك صحيح و كي نتوحشك عللخر نجبد اك التصاور لي في مخي و نغمض عينيا و نعاود نعيش اك اللحظة بنفس البنة نتفكر اش لابسين ووين قاعدين و فاش نحكيو و نحسك مزلت متاعي مزلت تحبني و نعاود نحبك من جديد.. امي تقلي يا و ليدي علاه ما تعرسش و تفرحني بيك خوذ مرا تهنيك و تكمل معاها حياتك خوذ بنت عمتك والا بنت خالتك والا بنت فلان والا بنت عم مولى الباش..

. منحب ناخو حد لا بنت خالتي لا بنت عمتي لا بنت جد بو والدين ايامي الكحلة!! ايامي كحلة بعدها يا امي!! الهنا و الفرحة مشاو معاها، هزتهم و طارت، و خلاتني مسلسل بيها.. هي علمتني شمعناها فرحة، شمعناها دنيا، شمعناها نغير و شمعناها نخاف.. حليت عينيا فيها و كي طفل اول مرة يدخل لديزناي لاند كاشخ باهت، كشخت انا فيها، هي عالم بلحق.. تدخل فيه تضيع.. كل شيء عندها مش كالعباد.. تفهم مش كالعباد و ترى الحاجات لي ما يراوهمش لعباد تتبنن الحاجات لي ما يفهموهمش لعباد..

كيفاه تحبني ننساها و بسهولة نعرس و نقسم فرشي مع مرا و انا مخي معاها؟؟؟ لوجت عليها في كل مرا عرفتها بعدها، على نسخة منها، على وحدة تشبهلها، بالك تنسيني وجيعتي!! وشيء!! حاولت نحب اي وحدة اخرى غيرها، لقيت قلبي عندها و متاعها ما خلاتليش قلب بش نحب بيه مرة اخرى! منجمتش ننساها، مع كل مرا نبدا نتعرف عليها يطلعلي وجها هي، نسمع صوت ضحكتها هي، نشم ريحة برفانها هي، و نطيح نقارن بيناتهم.. و ديما هي تربح!!

حد ما عندو شعر كي شعرها والا ريحة كي ريحتها، خدود حمر كي خدودها، قلب طيب كي قلبها، منجمتش ننسى ذكراياتي معاها، لمعة عينيها، دلالها.. لهوتها و خوفها عليا.. توحشتها... و نتمنى نراها من غير خاتم في يدها والا غشير متتلبش فيها والا راجل معنقها...بي اس: يبقى السؤال مطروح فما راجل يحب هكة؟؟