قداه عندي ملي ما ريتكش؟ سنين و ادهرة؟ قرون؟ قداه من خريف حزين تعدى عليا من غير ما تزينو طلتك؟ قداه من شتاء بارد تعدى من غير ما تدفيني فيه غزرتك؟ قداه من صيف سخون،هو يكوي ملبرا و نار فراقك تكوي مالداخل؟

قداه من عيد عيدوا فيه الناس و زهاو و انا ما عيدتش؟ انت هلالي و كي ما طلعتليش..قعدت صايمة عمري الكل..الماكلة لي مش من يديك ماسطة..الشوارع لي ما فيهمش خيالك..فارغين..الهوا لي ما تتنفسوش انت..يخنق..

انت هوايا و سمايا و مايا و دنيتي..انت.. انت مشتهي،كي شربة الماء لولى بعد نهار طويل متع صيام ..شارق،كي شمس اول نهار في الربيع..مزيان،كي سماء مرصعة بالنجوم في ليلة ظلمة..حنين،كي نسمة باردة في عقاب نهار من قوايل الرمان..

انت كل حاجة باهية صارتلي انت كل حاجة انا و صلتلها اليوم..حياتي وفات وقتلي خرجت منها انت..انت حياتي..انت لي حليت فيك عنيا،و تعرف مليح شمعناها طفلة صغيرة تحل عينيا في راجل..معناها يوريها الدنيا بعينيه،معناها يقريها الكتب لي هو يحبهم،معناها يسمعها الغنا لي هو يحبو،معناها تتنفس الهوا لي هو يتنفسوا معناها هو دنيتها،معناها تقعد ديما صغيرة قدامو..بالرغم لي عمل منها مرا بالف راجل..لا راجل لا وذني انا بلا بيك حتى شيء!! علاه مشيت؟ علاه خليتني؟ وعدتني بش ما تخلينيش..

نستاناك..و نعرفك مش بش ترجع..لي يمشيو لهاك البلاصة ماعاش يرجعوا..قالوالي لي انت تشوفني..منعرفش..حسيتهم يتمنيكوا عليا كيما ما يتمنكوا عالصغيرات بش يسكتوا! الفايدة انا نشوف فيك،في التراكن الكل..سجادتك لي طويتها و مرجعتهاش في بلاصتها..كبوطك لي جبتوا مالغسالة و مزال في قرطاسو..كتابك لي بديت تقرى فيه و ماكملتوش..كاس قهوتك لي ما تحبنيش نشربلك فيه..اول تصويرة عملناها،لي ديما تتفقدها و تمسح الغبرة على كواتروها،كنت ديما تقلي كان نهار ولى الكواترو بالغبرة..معناها نحنا ماعاش نحبوا بعضنا..تهنى نمسحو في النهار ميتين مرة..بيروك لي عمرك ما خليتني نخملهولك..باكو دخانك الي لاول مرة يعيش اكثر من نهار.،ليه ياسر عايش..يستنى في يدين فيهم حنية الدنيا و شفايف ما يخرجوا كان الكلمة الحلوة..و سدر..كببيييير،سبعة مرات قد الدنيا..

قداه ليه يستنى..عمرو برشة سنين..عمر وجيعتي و جرحي لي ما حبش يبرى..ريت كعبات الشيب لي طلعولي؟ تتفكر وقتلي كنت تقلي نحب نرى شعرك كي يبياض،خلبتو ابيض ما صبغتوش كيما تعمل النسا،فماش ما تحن عليا و تجيني..قداه ستنيتك بش تجيني..طيبتلك قهوتك كل يوم و حطيتلك فيها نكيتة زهر و ما جيتش..و قفتلك في البركون بضحكة كنت تقولي لي هي تنسيك في تعب نهار كامل..و ما جيتش..لبستلك الروبة الزرقاء..لي شريتهالي اول ما عرفتك..و ما جيتش..صليت..دعيت ربي و ترجيت..بكيت..عييت..و القلب لي حبك ما عياش.. ما نساش..كي تجيه الدنيا الكلها،ما يرضاش..هو يحب عليك انت..انت..عينيه لي كان يرى بيهم الدينا،و ملي مشيت..و فات عندو الدنيا..من نهارت الي مشيت..

كل يوم نستاناك و كي بطيت  ما جيتش..قعدت نستنى انا نمشيلك..تعدات سنين..روحك حاستها بحذايا،في كل لحظة معايا..يقولوا لي فراق الحيا اصعب، يكذبوا! يا ليتني جيت نجم نكلمك من نومرو اخر و نسمع صوتك..ياليتني جيت نجم نجيك للخدمة و نراك من بعيد..يا ليتني جيت نجم نعرضك في الشارع بالصدفة..يا ليتك ختني،كرهتني،فديت مني..راني نسيتك..لا لا انت ما تتنساش،اما عالاقل راي ناري بردت..اما انا..النار لاهبة فيا،تتغذى من حطب الايام لي تتعدى..يمكن ترابك برد..اما انا متوحشتك كي اول نهار خليتني فيه...و يمكن اكثر..الله يرحمك..قداه توحشتك..