"شبيك ساكت؟؟ تكلم.. شبيك واقف؟؟ تحرك.. قدم ولا وخر.. اطلع ولا اهبط.. ماتاقفليش هكاكة !و ما تغزرليش هالغزرة.. تحب حتى صيح.. ولا عيط.. كيما كنا قبل.. نتعاركو و بتعنيقة نتصالحو.. امان شبيك هكا اليوم؟؟!

بالله ما تسكتليش، و بنار سكاتك ما تحرقنيش.. راني جايّة بش نسمعك! تي تكلم!! قلبك كي سالتو آش قلك؟؟ و مخك كي شاورتو لشنوة دلّك؟؟ نعرفو مخك، من اول نهار ما حبنيش، ماحملنيش ما هناكش و ما هنانيش..

اما قلبك..... علّيلي صوتو خنسمع دقّتو خنْشيخ على رنّتو.. خنعرف شكوْتو.." " قلبي ههههه قلبي لي شعلت في حريقة؟؟ قلبي لي هجرتو أشهرة؟!! .. جايّة اليوم و تحبني نتكلم؟!! شتحبني نقلك يا للّاتي و يا احلى حاجة كانت في حياتي قد ما حبيت نكرهك و شيء..لقلب الّي حب ما عمرو ما يكره..و انا قلبي متاعك كيفاه.. ينجم يكرهك!!

قلبي ملّي عرفك و هو عايشلك.. يعزف في موزيكتك..يحلف باسمك..زعمة راح من بالك اول مرة عيني جات في عينك؟؟ ضحكتك.. و الفرحة الي دايرة بيك.. كلامك ..و بلادتك.. انت تحكي،و انا سرحت في ملكك، غرقت في بحرك ،عطشت في صحرتك.. وقفت قدامك... سلطانة!! ..

حسيت روحي انا، لي موقف شركة على ساقيها و معيش عايلة، ... حسيت روحي ضعيف قدامك..نْهارتها ضربْتلي على بيبان قلبي.. حلّيتهولك.. و دْخلت.. و تْربّعت.. و لا انا حبيت نخرجك ،و لا انت خرجت...نْهارتها روّحت بصورتك في قلبي، روحت بيك معايا، و بديت مرحلة جديدة في حياتي!!...........

كان انت نسيتني، انا ما نْسيتكش، و من تراكن حياتي ما خرّجتكش...و جاية ليوم تسال في شصارلي في بُعدك و اش صارلي من بَعْدك!! مقواكم النّسا !! وين كنت يا للاّ؟؟؟؟!!!!!!! لْقيت شكون يعوضك عليا؟؟ ...

المشكلة، لا نجمت نبعد عليك و لا نجمت نكون ليك حاسس روحي مريض بيك خايف عليا و خايف عليك من نهارت الي قتلي اكا الكلام و انا حاير في امري منجّمتش نرجعلك هكّاكة آما ستنيتك تقلي سامحني تقلي نحبك و ارجعلي..سامحتك من قبل ما ترضيني! اما انتي.. ما خلطش عليا لا جيتني ولا درت بيّا !! جايتني اليوم تقلي تكلم!! سامحني ماعاش ننجم نوخر... اليوم ما نجم كان نقلك س..." "اُسسكت!! بالله لا تنطقها... بالله لا تقتلني، و من فمك لا تخرجها!!

انا لا نسيتك ولا بدلتك..لا كرهتك ولا من حياتي خرجتك.. نقوم بيك و نرقد بيك.. ساكن فيا و عايشة بيك.. اما انت جرحتني و بكلامك وجعتني... كسوحيّة راسي و بعدي عليك، بالرّغم الي انا عاشقة فيك، هذي هدرة ما تفهمهاش و مخك ما يستوعبهاش .. هدرة نسا.. حاجة تفهمها كان مرا حبّت،و جرحوها،عشْقت،و هجروها..

اما عمري ما خممت نسلم فيك، لا هجرتك و لا بعدت عليك..انا كنت ستنى فيك تجيني ترضيني،مش انا نرضّيك..اما جيتك اليوم خاطر طولت عليا غيبتك نعرفك تحبني..على هذاكا جيتك بساقيا و قلت نجي نشوفك زعمة مزلت تحب عليّا؟؟! اما بعد لّي سمعتو منّك نجم نقلّك كان سامحني.. و امان عنقني.. و خليني بين يديك.. الدنيا البرة كحلة بلاش بيك .. يا احلى حاجة في حياتي ،و احلى نغمة في غناياتي، يا روحي.. و يا مرايتي".......................................................

كلامي هذا ما ينجم يفهمو كان القلب الّي حب،هو الوحيد الّي يعرف يسامح..ردّ بالكم تضيعوا النّاس لّي تحبكم..الّي قاعد تستنّى فيه ينجّم يكون هو زادة يستنّى فيك !!..

الدكتورة