Zaineb S. - زينب س

حمة مشات للقهوة صحيح أما ما خدمتش برشا تفاهمت مع الروج بش يسكرو على بكري .. مللي دخلت و العينين عليها بش ياكلوها ريقتهم سايلة عليها تقول عمرهم ما شافوها كلام فاروق طلع صحيح هي بيدها ماضهرلي كان بش تنجم تخدم هكا ملي تبدلت هي و حياتها الكل تبدلت معاها توا فهمت كلام فاروق قعدت وحدها ادور في عيناها فالقهوة في كل تركينة فيها ما بدلت شي ملي مات بوها زادت كان تصويرتو ورا الكونتوار ..

كل شي كيف ما خلاه حتى الطواول و الكراسي ضاهرين قدم .. قربت مالتصويرة عدات يدها عليها قعدت تثبت في بوها في غزرتو يقولو اللي هي تشبهلو برشا و عندها غزرة صحيبة كيفو .. تنهدت ... آه يا حاج آش عملت فيا كان تعرف بنتك قداش قاعدة تعاني لا رتحت و هي مسترجلة و لا و هي مرا ... حمة فاش تعمل .. دارت مفجوعة .. عفاف مريم آش مجيبكم .. عفاف : هكا تفرح بينا ... مريم : شفناك كيفاش خرجت متغشة ليوم من عند فاروق جينا انطلو عليك .. حمة جبدت زوز كراسي قعدو عليهم .. أقعدو تو نحكيلكم .. حكاتلهم عالمشكلة .. حمة : هذاكا اللي صار و انا توا حايرة راي قهوة الحاج منجمش نتخلى عليها بالساهل تي تربيت فيها ...

عفاف: بصراحة الزوز عندكم الحق مله وحلة ..

مريم سكتت و بعد صاحت : أنا عندي الحل ..

حمة تحمصت : اتكلم مريم قولي عليه ..

مريم فرحانة كاينها لقات كنز : هو مش متقلق مالرجال ...

حمة : إي أكيد ..

مريم : باهي هي قهوة في الحومة العربي علاش متبدلش فيها و تصلحها و تعملها ميكست يجيوها لبنات و لولاد و هكاكا ماتقعدش بنية وحدك فيها ...

عفاف : إي والله فكرة شو خلي الفايونس و الرخام اللي فيها ياسر حلو و أعمل ديكور تراديسيونال ..

مريم : وي وي بون إدا ، أكاكا حتى التوريست يقعدو فيها ..

حمة فرحت : زعمة لبنات فاروق تعجبو الفكرة ...

عفاف : خليه عليا أنا نقنعو .. حمة : باهي أوكي ....

كملو سهرو فالقهوة وحدهم جاو خارجين

حمة نادات لمريم : مريومماتنساش غدوة كيفما تفاهمنا..

عفاف : تي فهموني لحكاية ...

حمة : تو مريم تفهمك فالدار ..

عفاف عوجت فمها .. هاي هاي وليت انتي و للا مريم قارنين الروس و أنا طلعتوني برانية ..

مريم : ههههه تي هيا تو نحكيلك خليها ترتاح ... نهار جديد ..

طلع الصباح بعد ليلة عداتها حمة تتقلب و ما غمضتلهاش عين .. قلبها يدق بالقوي قادمة على خطوة صعيبة و خطيرة أما متنجمش ماتعملهاش و ماتمشيش فيها لازم لازم اتبرد قلبها ... نهار تعدا طويل غزرت للمنقالة 5 متع لعشية .. تحضر في روحها و مريم و عفاف دخلو ... سلام .. أهلا لبنات أدخلو ..

مريم : هيا حاضرة ...

عفاف قصت عليها و وجها مقلوب : حمة مثبتة روحك ملي قاعدة تعمل فيه أنا ملي حكاتلي مريم و مش موافقة راو ..

حمة : مثبتة إي مثبتة و ما نبرد الا ما نعمل اللي في مخي .

عفاف : حمة راك قاعدة تلعب بالنار و كان يسمع فاروق ميصير خير ..

حمة دخلت بعضها : منين بش يسمع فاروق كونش إذا انتي تحكيلو ..

عفاف : صلي عالنبي من وقتاش انبيعو بعضنا أما أنا انبه فيك خايفة عليك ... حمة : متخافش ميصير شي تو ترا .. مريم تي هيا عاد ماعادش بكري ...

خرجو ركبو في كرهبة مريم عفاف بجنبها و حمة من تالي ... وصلو قدام مركز الحومة راكشين فالكرهبة يعسو من بعيد .. شافت أنيس خارج من بعيد قلبها ضرب مازال كيفما هو نفس الوهرة و الشبوبية غمضت عيناها و خذات نفس قوي .. طلع في كرهبتو ..

مريم دارت لحمة : حاضرة...

حمة حلت عينها .. إي إي امشي فيسع تبعو ، شدو ثنيتهم يتبعو في كرهبتو .....