Zaineb S. - زينب س

حمة نحات الصباط ساقيها منفوخين من كثرة المشي اللي مشاتو اليوم هبطت يدها تمسد فيهم .. أي أي ساقي بش نموت بتعب السماح كنت مرتاحة على روحي ..عفاف : هذاكا خاطر ستانست ديما تعفس في سبادري تو تستانس و زيد عزيزتي أذاكا الشوبينق ماله في بالك ساهلة الأنوثة ..

مريم : هههههه تو ترا فاروق كيف يشوفك بالحوايج الجدد يهبل ... حمة تبسمت تحسست الخاتم في يدها تلعب بيه في صوابعها ... عفاف : ها ها وين سرحت أيا برا قوم قيس الدبش خلي نشوفوه عليك .. حمة غزرتلها مفجوعة : فك عليا ماو قستو فالبوتيك قداش من مرة ..

مريم : بصراحة لبنات حتى أنا تعبت ليوم سمعت شوبينق فرحت ياخي طلع حاجة أخرى ياسر ناس و دز و لز و كيف تتعدا من قدام بوتيك اللي يبيع يبدا قريب بش يخطفك .. عفاف اطرشقت بالضحك هيا و حمة .. حمة : ماشي في بالك في باريس راك في تونس كان حصلت و دخلت لبوتيم لازمك تشري منو بالسيف عليك حتى كان ماعجبك شي .. عفاف : و البياع تبدا انتي ادور و هو وراك يحسك اللي جاي بش تسرقو و يشكك في روحك .. مريم قامت ... أنا بش نمشي نرقد شوية .. عفاف : هزني معاك ماعادش فيا أنا زادة ... حمة تململت : لبنات نمشي معاكم بش تخلوني وحدي حتى صابرة تغرم في زمانها نساتني .. مريم و عفاف يضحكو : يا وحيدة تتونس بينا ولا توحشت فاروق ..حمة حمارت : تي سيبونا عاد متركزوش هههه ... وصلو لدار فاروق .. عفاف : أمي أمي وينك ... فاروق صاح من بيتو ...يزي مالصياح مخيب صوتك خرجت تقضي أمك ... عفاف دارت لحمة : أيا برا أهوكا في بيتو فرصتك .. حمة عضت على شفايفها .. تي يزي عفاف فاش تحكي ...

عفاف : ههههه آه آه مالحب صحة ليكم وقتاش أنا أكا السخطة يخطبني ... مريم جبدت عفاف من يدها ... أووووه عفاف قداش تكبش هيا هيا اجا معايا أحكيلي على شنوة هو قلت ... عفاف : السخطة .. أوكي أحكيلي عليه .. مريم هزت عفاف و غمزت حمة و مشات .. حميدة وجها أحمر قلبها يدق يامه هدت عليه في بيتو أما مللي ولات تحبو كل شي تبدل و أي حركة تعملها تحسها مش عادية .. وصلت لبيتو دقت الباب ...

صاح مالداخل : يا عفاف والله بش نخرج انكسرلك راسك .. حلت الباب و دخلت تلقاه متكي على كرشو لابس شورت قصير و عريان مالفوق رامي لمخدة فوق راسو جات بش ترجع منين جات ، دار يلقاها هي جا واقف جرا شدها من يديها و سكر الباب .. فاروق : صارة هو انتي ماشي في بالي المرجة عفاف ..حمة ضحكت .. هاو طلعت مراجة أخرى .. ضحك صوتو مزال بنوم و عينيه منفوخين و شعرو داخل بعضو فيه برشا اغراء ... جبدها ليه بالقوي لصقت فيه و هو صدرو عريان .. حبيبي أحلى مراجة ..

دزتو و عملت روحها متغشة ... معنتها أنا مراجة يعطيك الصحة .. جات بش اتحل الباب سبقها دور فيه المفتاح و اتكا عالباب و غزرلها تكلم برشا حنية في صوتو و عينيه على شفايفها ... في بالك عندي 3 أيام مللي تخطبنا متفاضيتش بيك و انتي كل يوم في بلاصة تشري فالدبش ... فهمتو شنوة يحب غزرت للمفتاح تخمم كيفاش تخرج حطت يدها عليه .. حط يدو على يدها جبدها و لوا يدها ورا ضهرها ...

حمة : أي أي وجعتني فاروق سيبني ...

فاروق : منسيبكش مرتي نعمل فيك اللي نحب ... حمة تتململ تحب تفك روحها منو و شدها الضحك ...

فاروق شبيك هبلت تي كان تجي أمك توا شنوة تقول علينا .. فاروق قربها ليه و و يدها مزالت ملوية زاد شدها من يدها لخرى و سكر عليها أي طريقة لدفاع.. حط راسو على شعرها و وشوشلها في وذنها ...تهنى منجية متجيش توا بش تتعدا تعشي بحذا أختها ..

حمة : ولو سيبني عفاف و مريم فالدار كان نسيت .. زاد كبس على يدها ، صاحت : آييي فاروق وجعتني ..

فاروق طبس باسها من رقبتها : يزي مالصياح راك تزيد تغري فيا ... ضحكت خاطر تتشوكع بلعاني أصلا هو شدها بسياسة و تنجم تفك روحها منو ..

حمة : باهي سيبني بش مانغريكش ..

فاروق : منجمش .. هههه علاش .. قالتها بدلال زاد هبلو .. النفس متاعو حستو في رقبتها سخون وشوشلها .. خاطر نحبك ما عادش نصبر عليك .. عدا يدو ورا ضهرها حملها من قدام و حط راسو على كتفها باسها من خدها بوسة مرصوصة .. هبط لوذنها لرقبتها و بدا يمشي في يدو و يجيب على كرشها لين طلع لصدرها ..

حمة : فاروق فاش تعمل هبلت .. فاروق صوتو ترخف .. هبلت بيك .. بعدت عليه و وجها أحمر .. ما عادش بكري بش نمشي للقهوة مللي بدا العرس هملتها لروج ..

فاروق وجهو تقلب جبد باكو دخان من فوق الطاولة حط سيقارو في فمو و حل الشباك ..

حمة : فاروق شبيك شبيك تقلبت ... فاروق يغزل .. لا شي .. قربت منو ...ياخي أنا منعرفكش جيتني جديد .. جبد نفس مالسيقارو و غزر مالشباك عرق الغش متاعو اللي في جبينو ضهر معناها ثمة حكاية و جدية زادة ..

حمة : فاروق ما تتعاملش معايا هكا يا قولي آش ثمة يا خليني نمشي .. نفخ ... أوووف حمة تحب الصحيح ... عقدت يدها قدام صدرها .. إي نحب الصحيح تعمل مزية ... غزرلها غزرة تحدي ... خدمتك في قهوة كلها رجال ماعادش مساعدتني ... حمة تصدمت عمرها متصورت اللي يجي نهار و ينقدها على خدمتها .. خدمتها اللي ورثتها بو على جد هذا اللي مقراتلوش حساب ... فاروق فاش تحكي هذيكا خدمتي عايشة منها أنا و عايلتي و مانيش مستعارة منها .. ميساعدنيش ميساعدنيش لمرا اللي بش تولي على إسمي تعدي نهار كامل بين الرجال و زيد انتي توا تبدلت على قبل وليت مرا و الرجال تطمع فيك ... حمة حلت فمها : أمان فاروق و قبل ماكنتش مرا ماله انت حبيتني كيف تبدلت ماحبيتنيش من قبل كيفما قلت ... فاروق قرب منها شدها من راسها نطرتلو يدو ..

حمة ما قصدتش هذا الناس الكل تعرفني نحبك من قبل أما توا وليت على ذمتي و هكا ماعادش يساعدني ... حمة حاولت تتمالك عصابها و تتكلم ببرود .. باهي شدها انت ماو قتلك 1000 مرة اخدم معايا ...طيش السيقارو مالشباك و تلفتلها ... إسمها الصحيح اخدم عندي مش اخدم معايا ... حمة صاحت : أوووه يا ربي منين انشدك ماله شنوة الحل .. سكت شوية كاينو عندو الحل ... قربت منو .. فاروق انكلم فيك كان عندك حل قولو ... فاروق هز راسو قعد يثبت فيها شوية كاينو خايف من ردة فعلها ... الحل تبيع القهوة ..


حمة : شنوة ؟!!! .. ولات ترعش مالعصب .. تحبني انبيع قهوة الجدود القهوة اللي نشم عليها في ريحة بابا و خواتي و أمي اللي عندهم باي فيها ما خممتش فيهم ... فاروق عدا يدو في شعرو بالغزول : حمة هذا آخر كلام عندي و انتي أمورك اتصرف .. حمة خرجت من سينتها : تعرف انت واحد أناني و ما تحب كان روحك و انا القهوة مش بايعتهة و توا ماشية نخدم على روحي و انت أقعد أضرب النوم ... تصدم في كلامها و هي خرجت و خلاتو ...