Zaineb S. - زينب س

.. فاروق خدم الكرهبة .. مريم اتهنى عليها ... حمة دورت وجها لشباك هازة خشمها و ماحبتش تغزرلو .. باهي ازرب خلي نخلطو عالكورتاج ...فاروق حط غنا بالقوي نسمة مطيرة خسلات من شعر حميدة و شادة الثنية يتبعو فالكراهب فاروق ما قال حتى كلمة يسوق ساكت سكاتو خوفها ما يطمنش كيف الهدوء اللي يسبق العاصفة و شكها كان في بلاصتو قريب يوصلو لصالة فاروق بدل الثنية .. حمة : فاروق شبيك وين ماشي ...فاروق نكلم فيك رجعني توا ...فاروق يسوق و غزرت إنتصار في عينيه

حمة : فاروق تي فاروق مش وقت تفدليك راو صابرة تو تفقدني ..فاروق : ههههه صابرة متصدرة بجنب راجلها مزالت تلوج عليك انتي ..

حمة سكتت تعرف فاروق كيف يحط حاجة في مخو ، هي بيدها كانت فرحانة ..حاسة روحها الاميرة اللي خطفها حبيبها من سهرية ..فرحانة و هي بجنبو حاسة بؤنثتها كاملة ..كانت عندها ثيقة كاملة فيه و معاه تمشي و عيناها مغمضة ما خافتش و ما خمتش حتى وين ماشين ولا شنوة بش يصير ..وصلو لبلاصة مزيانة عالبحر مافيهاش برشا ناس وقف الكرهبة و دارلها ما قال حتى كلمة تبسم و شد يدها هزها لشفايفو بشوية و باسها من كفها ..

حميدة كيفها كيف النساء الكل يتمنعنا و هن راغبات ، جبدت يدها حبت تزيد تعذبو و تدلل عليه بش تغطي على حشمتها ... سيبني سيبلي يدي و قولي توا علاش جبتني هوني ..فاروق كانت عينيه تلمع يثبت في كل تفصيل فيها شفايفها أول مرة يراهم محمرين هكا هبلوه ...عدا يدو على شعرها ..مزينك أزين مرا ريتها في حياتي .. يدو هبطت على خدهة حست بتقشعيرة خفيفة و بنينة .. انت زادة محلاك فالكوستيم ..هههه نعرف حبي ... مغرور ..مغرور بيك ... رجع لتالي شوية استوا قعدتو ..حمة ركز معايا توا برسمي ... باهي أما معادش تقولي حمة أنا ماليوم حميدة ..

دزها من راسها ..تي برا زمر بش تعملهم عليا أنا توا .. آي آي بشوية مشطي .. هههه باهي أسمعني .. غزرلها في عيناها و تنهد .. حمة أنا مللي حليت عيني عالدنيا نلقاك قدامي ديما نحس روحي مسؤل عليك كنت نتصور اللي نحس فيه عشرة معزة أما لا أنا نحبك و نموت عليك و ناس الكل فايقين بيا كان أنا و مش مستحق ليوم لمكياج و الرةبة بش نعرف اللي انتي مزيانة حياتي الكل نرا فيك أزين النساء و ميهمنيش الناس شنوة يشوفو ... حمة كانت تسمع مش مصدقة أحلى كلام سمعتو في حياتها و شنوة أحلى من ان الراجل اللي تحبو يراك مزيانة و تحس بؤنثتك كيف ما انتي انتي و اكهو .. ترمات في حضنو منغير ما تشعر كبشت فيه ... باسها من راسها .. فارو.. قص عليها ..أسكت خليني انكمل .. ضحكت ..باهي كمل ..

فاروق : حميدة نحبك نحب نكمل حياتي معاك و كلمت أمي اليوم بش تكلم أمك و تخطبك منها .. بعدت عليه غزرتلو و عيناها وساعت .. فاروق معنتها تحب تخطبني .. ههههه إي نعرف اللي أنا طيارة و ماتلقاش كيفي أما ارزن شوية ميجيش هكا .. حميدة نقزت عليه .. نحبك نحبك نموت عليك ... جات تبوسو في خدو جات في رقبتو هبل قرب منها باش يبوسها .. حمة بعدت أمان فاروق لا مش توا تفسدلي مكياجي ..مزلت بش نصبر عليك أنا .. جبدها باسها بوسة قوية حاولت تقاومو منجمتش اتقاوم مشاعرها و رغبتها و فرحتها بيه ما خلاوهاش ... فالثنية حميدة تشوف في روحها فالمراية ... فاروق شو شعري كيفاش فرعستو .. دارلها و عض على شفايفو غزرلها لشفايفها .. انا قاعد نشوف في حميرك اللي طلع لخشمك ..

حمارت بالحشمة جبدت روج عاودتو .. فاروق : ههههه رد بالك قاعدة تغري فيا توا بش نزيد انحيهولك .. حميدة غزرتلو بخوف ... لا لا بربي أمان والله أمي تقتلني كان تفقدني و ما تلقانيش ... شدها من يدها و باسها .. باهي خلي يوفا العرس تو نتفاضى بيك ... وصلو لصالة حميدة حاشمة و عينين مريم و عفاف كلاوها يضحكو و يتغامزو عليها .. شافت فاروق يكلم في أمو و بعد شافت منجية مشات لأمها تحكي معاها و بعد شافتها تزغرط و الفرحة صارت فرحتين .....