Zaineb S. - زينب س

نهارين تعداو حمة ما شافش فيهم فاروق حوسة العرس بش تهبلها كل شي عليها حمة هز حمة جيب حمة هات الدار من شيرة و القهوة من شيرة أخرى هز ساق تغطس لخرى خرجت للحومة سروالها مطشوش بالدهن و سبادري و كاسكيت لتالي كالعادة قصدت ربي لقهوة لسمر حبت اتشوف فاروق وصلت تلقاه  لبرا يسربي.. فاروق الله يعينك ..حمة آش تعمل هنا .. شبيك انطل عليك .. براس أمك لا تجبدلي عالخدمة معاك .. برا زمر ماك بعتني عاد .. اوووف باهي شد بلاصة شنوة انجيبلك ..

هي جات بش تقعد و ترا في جماعة القهوة لكلها اطل و عينيهم بش تخرج فاروق لداخل طلت معاهم شافت وحدة هبطت من كرهبة كبيرة كحلة سيري متع فرنسا.. يضهورلي فيها قاوريه شورت دجين قصير ساقين أبيض مالحليب شعر قصير مستصفر عينين كبار شهل و شوية نمش مفرق تحت عينيها زايد فيها الشطر بودي أبيض جنب طايح على كتفها اللي فيه وشمة صغيرة فراشة ، هبطت اتوقف في ناس و تسأل على شكون لين وصلت للقهوة ، فاروق شاف جماعة القهوة محضبين خرج يشوف آش ثمة هي شافتو و جرات نقزت عليه ..

فارووووق توحشتتتتك .. ما كانش مالعاكسين حملها و دار بيها فالهواء كاينو ما ثمه حد غيرهم ..حمة حلت فمها مصدومة مش فاهمة شي يا ربي قتلك طيحو بما خير مني أما مش لهالدرجة ترا فيهم معنكشين في بعضهم و هو بش يطير بالفرحة و جماعة القهوة يعيطو ... صحة لمو مله**** .. حالة مع ولد منجية ...مله قمبلة يا معلم ... حست قلبها اوجعها و طاحلها السكر بالوقت شربت كاس الماء اللي قدامها الكل .. غزرت لروحها شو حالتها تجي كل شي كان أنثى إنت فين و الحب فين حبت تخرج تمشي تتخبى جات ماشية و تسمع في فاروق نادالها ...حمة إجى اجى ..تمنات لرض تنشق و تبلعها علاش يناديلها بش يزيد يغزلها شاورتلو بيدها على أساس مزروبة و مروحه ...و الصدمة كانت الطفلة ناداتها ... حمه إاااجى ...يعجبكشي منين تعرفني هذي ، مشات ساقيها يضربو في بعضهم قداش حاشمة بروحها وصلت بجنبهم نحات الكاسكيت حطتها في يدها . فاروق امدور يدو على الطفلة .. حمة طلع شكون .بقات تغزرلها ... ضربتها الطفلة في كتفها .. حمة أنا مريم بنت عم فاروق تي شبيك تتفكر كنت انجي انعدي الفاكونس هوني..مريم ميريام ..... هههه اي مزلت تتفكر ...

مريم حملتها و باستها ...مريم فالحقيقة اسمها مريم بوها عم فاروق و أمها فرانساوية كانت صغيرة تجي مع بوها فالصيف و تقعد في دار فاروق ماللي ماتت أمها ما عاودوش رجعو لتونس و استقرو في فرنسا ... تتكلم بطريقة اتضحك تحاول تتكلم بالعربي بسيف .. حمة حمة انتي متبدلتش هههه... ضحكتلها حمة ضحكة صفراء ... هههه أما انتي تبارك الله تبدلت برشاااا.. هههه حتى هوما 9 سنين تعداو مش شوية يا حمة... دارلها فاروق يتململ فالوقفه ...مريومة أيا يزي مالوقفة قدام القهوة لكلها شايشه فيك أيا انروحو لمنجيه ... حمة اتصدمت غاير عليها و ايبعد فيها على عينين الرجال و هي حياتها كاملة بيناتهم متكلمش .. فاروق : أيا امشي انوصلوك .. لا لا مزلت أنا براو انتوما.. اوكي سايس روحك ..شديتو مريم من يدو و مشاو يضحكو و يفدلكو طلعو فالكرهبه و تعداو من جنبها خلاو وراهم كان الغبرة و حمة واقفة تغزر مش مصدقه منين طلعتلها هذي باينه بش تهبل على فاروق ... إي عاد شبيه و هي آش يهمها فيه بالعكس عشيرها تفرحلو . أووووف تفرحلو مع طفلة عادية مش كيف هاذي القهوة الكل اتهتري بيها أول مرة اتحس بغيرة مرا من مرا أول مرة تكره حوايجها و روحها اللي عامه فيها عزري  روحت اتكركر في ساقيها و اتخمم في فاروق و مريم اللي ادور معاه فرد دار بالشةرت هذاكا مله ساقين عليها تي هي بنيه و بهتت فيها ماله فاروق كيفاش أمورو يبهت و لا يقعد يا ربي راني بش نهبل مش فاهمه شي ...

مريم طلعت لأمها ملامح غربيه أما بروح عربيه حية و مش ماسطة روحها خفيفة مالللي وصلت لدار فاروق قلبتها عفاف طارت بالفرحة عمها روح مالجامع قعد يبوس ويحمل مالصغرة كانو لربعه فاروق و عفاف و حمة و مريم يلعبو مع بعضهم يعملو المشاكل تصدم حمة و فاروق و يهربو مريم و عفاف ... ملمومين عالعشاء يسترجعو في ذكريات الصغرة و يضحكو ..مريم طلعت بش ترقد تاعبة مالسفر و حمة عدات ليله تغلي ماللي روحت تعدات للخزانه جبدت دبشها الكل ملقاتش حاجه تصلح تلبسها عندها كان دجين و مراول واسعين متع ولاد مالغزول قعدت بجنبهم تبكي ..دخلت صابرة شافتها اتفجعت ... حمة شبيك آش صار علاش دبشك في القاع هكا .. صابرة مخيبني الناس الكل حاسبيني راجل فديت فديت ...قعدت بجنبها فالقاع و عنقتها ..يا حمة وخيتي ماو انتي اتحب هكا و بابا ربي يسامحو حطلك الفكرة هذي في مخك و ردك راجل قال شنوة بش ترد بالك علينا علاش متبدلش من روحك ...مسحت دموعها ... عندو الحق بابا كان جيت كيفكم راو كلاوني الذيوبه كيفاش بش انجم نخدم فالقهوة في وسط رجال كان لزم نتخبا بش انجمو انعيشو ... باهي هانا كبرنا و أنا بش انعرس و انشد داري لوقتاش بش اتضحي على خاطرنا خمم في روحك و اسمع كلامي مرة .. فاش نسمع كلامك ..أسمع و أكهو .....