Zaineb S. - زينب س

روحت من عند ميما ،فالثنية كلمت الخدمة عديت كونجي ،ما عنديش جهد ،وصلت رميت روحي عالفرش نحيت صباطي بسقية و رقدت قمت كان المغرب على صوت هارون و لولاد ، ما قمتش ،دخل هارون رما الفاست فوق الكرسي

-غالية ،غالية ما تقوليش مالصباح لتوا ما فقتش مالفرش

-لا خرجت

-وين مشيت ؟؟

-لدارنا

-لباس عليهم ؟؟

-الحمدلله

-ايا باهي ثمة عشا

-ما طيبتش

-تي علاش بربي تعرفني ماكلة الشارع متوالمنيش

-برا طيب

-باللهي غالية

-واللهي

دخلو لولاد يتجاراو طلعو فوق لفرش و ترماو فوقي

-ماما ،ماما

-يعقوب مرام اهبطو عليا

ما سمعوش كلامي ،قمت قعدت

-بفففف يا ربي ،وحدة ما ترتاحش فالدار هذي

هارون يغزرلي مش فاهم شي

-شبيك غالية لباس !!

-لباس ما بيا شي و توا اخرجو عليا لكل نحب نرقد

ما زاد حتى كلمة خطف الفاست اللي نحاها و خرج و لولاد مشاو لبيتهم ،ما عيني في شي نحب نرقد ،نهرب للفرش ننسى كل شي مخي بش يتحرق

تعداو نهارين نفس الروتين راقدة نهار لكل ،نبخل حتى بش نقوم نجيب شربة ماء لروحي ،شعري داخل بعضو ،حواج نوم مريول واسع و سروال كيف كيف و نازلة عالماكلة شوكولا بسكوي تشيبس على بعضو و في اي وقت ،

جبدت البوم عرسنا قعدت نتفرج احلى نهار في حياتي بقيت نثبت في غزرتنا لبعضنا شبيها طفات هكا قداش كانت حية شبي ضحكتنا ولات صفرة بعد ما كانت مليانة فرحة شنوة اللي صارلنا اش عملت فينا الدنيا ،رميت الالبوم

من يدي و رجعت رقدت ،نسمع في باب الدار تحل ماشي في بالي نحلم ،حليت عينيا بالسيف ثمة شباك تحل و الضو دخل حطيت يدي على عينيا نخبي فيهم مالشمس بديت نستوعب بالشوية نلقى كريمة اختي قدامي

حليت عينيا

-كريمة اش تعمل هوني كيفاش دخلت

-قوم قوم

جبدت عليا لغطاء

-تي سيب شبيك منين جبت لمفتاح

-اوووه غالية هذا اللي يهمك

رمات لمفتاح عليا

-هاو مفتاحك ماو انتي مديتهولي فالعطلة بش نجي نطل عالاولاد و انتي فالخدمة

-اه نسيت باهي سكر الشباك عيش اختي نحب نرقد

-انا نوم متاعك ،يزيتش توا ميما حكاتلي كل شي راو

قمت قعدت

-امبوسيبل شبيها هكا ميما

-بربي يزي مالافلام تطلب فيك ما تهزش تفجعت عليك ،كلمتني انا و حكاتلي اش فيها

-امي سمعت ؟؟

-لا ما قولت لحد

-احسن

حكيت عينيا ،شديت راسي بيدي

-اااي راسي رزين بش يطرشق

-هذاكا من كثرة النوم

قعدت بجنبي عالفرش دارتلي بنصها

-غالية شنوة ناوية تعمل توا ؟؟

غزرت للقاع

-ما نعرفش

-لازمك تعرف الى متى هاربة هكا لازمك تواجه راك بش تضيع دارك و صغارك ،انا نحب نفهم شكوني بنت لحرام هذي كان نشدها الا ماااا...

قصيت عليها

-يزي كريمة بربي ياخي ضربتو على يدو ! بالك يرضع في صبعو هو ؟

-اي اما كان ما جاش ثمة بنات همال يصوحبو فالرجال لمعرسين كيفها راو هذا ما يصيرش

-انا معادش يهمني ربي يهنيها بيه

-نعم للا ،شبيك هبلت ،شبيك نعجة هكا ياكلولك عشاك و انتي تتفرج بكة ديما تقعد بكة

-بربي كريمة علاش تسميع لكلام هذا ،اللي فيا مكفيني

-غالية عيش اختي دافع شوية على روحك كان مش على خاطرك على خاطر اولادك مستحقين امهم و بوهم

اطرشقت بالبكا

-اش تحبني نعملو بوهم ،نقولو ارجع حبني بالسيف ،سمعتو بوذني يقولها حبي ،مخي بش يتحرق نحب نعرف وين وصل معاها يا ربي علاش هكا

جاتني كريم حملتني

-اس يزي مالبكا ،صدقني نزوة و يتعداو بيها الرجال لكل

-والله نموت يا كريمة اختي كان يبعد عليا امبوسيبل مرا اخرى تاخذو مني

-غالية اغزرلي الرجال ما يحبوش لمرا لبكاية اللي تقعد تندب عليهم ،يحبو لمرا لقوية

-منين بش تجيني لقوة بربي

-هاني معاك مالة باش اختك ،هيا ليوم نخرجو و نعملو جو ننساو كل شي .....