Zaineb S. - زينب س

تعدا الوقت 5 سنين كبرو لولاد ،5 سنين نسيت فيهم روحي نسيت حياتي نسيت نوم الليل و نسيت اهم حاجة في دنيتي راجلي عشيري هارون ،برشا يقواو اللي لعرس مقبرة الحب و انا ما كنتش نامن بيها تصورت اللي لعرس اكثر حاجة امان للمرا ماشي في بالي اذا خذيتو و يروحلي كل يوم و نراه و نجيبلو صغار مش بش ينجم يتخلى عليا نسيت اللي مشاعر الانسان تتبدل مع الوقت و ما يحكم فيها لا عرس ولا غيرو ..

هارون ،هارون عشيري عشير عمري عديت معاه لباهي و الخايب كيفاش نجم ينسى كل شي كيفاش نجم يغزر لمرا غيري ،كيفاش بش نجم نعيش منغيرو و هو لهوا اللي نتنفسو ، يا ربي صبرني مش فاهمة شنوة نعمل و لشكون نمشي و ما جا على بالي كان ميما ،ميما غالية ..وصلت لدارنا سلمت على امي و دخلت ديراكت لميما ،بستها من يدها و تكيت في حجرها و اطرشقت بالبكا

-يا بنيتي شبيك اش ثمة ما تحيرنيش عليك

-تاعبة يا ميما تاعبة

-شنوة اللي تعب بنتي

-الدنيا تعبتني و ضلمتني

-يا غالية اش صار لولاد لباس هارون لباس ؟؟

-هارون ،هارون يا ميما سبب دايا فقت بيه يخون فيا عامل عليا صاحبة ،تتخيل يا ميما انا غالية مرتو ام صغارو يخليني و يغزر لغيري

-متأكدة يا بنيتي ؟!

هزيت براسي و دموعي هابطة

حملتني و مسحتلي على شعري

-غالية بنتي اسمعني و اسمع كلام ميما ،رد بالك تحكي لامك و بوك و تكبر لحكاية عيش بنتي خلي اسرارك في دارك

-ميما امي و بابا بش يسمعو ليوم ولا غدوة

-يا بنيتي لعشرة مش ساهلة لازم الدرك بش يطيح على واحد و حلو و مر لين يتعدا لعمر

قمت غزرتلها :

-ميما محلاكم نسا قبل قداش تصبرو و تتحملو احنا مش كيفكم

-بنيتي احنا قبل لا نحبو لا نخرجو و نختارو ،يجيبولنا راجل يقولك هذا بش تاخذو اكهو تلقى روحك في دارو و دار بوك تنساها مهما يصير

-ههههه باهية هذي ....