Zaineb S. - زينب س

خلط عليا ما نجمتش نشد روحي دموعي هبطت ،لبست مرايات شمس و دورت وجهي ،وقفني

-ايجا نتمشاو و وسع بالك ،يزي مالبكا و احكيلي

-هارون يخون فيا

-شنوة هارون ؟! متأكدة

-اي

-شو غالية انا راجلك منطيقوش قبل اما برجولية يضهر يحبك برشا ،كيفاش يعملها ؟؟

-ما نعرفش عليه عملها و اكهو

-ريت كيف قوتلك خوذني هههه

ضحكت بالسيف عليا

-بربي اسكت عليا موسع بالك

-تي اضحك يا بنتي

-باهي عيشك اما لازمني نروح توا معادش بكري عليا ،عيشك عالفطور

-مرحبا ،هاك عرفت لبلاصة خلينا نشوفوك

-ان شاء الله

-هات اعطيني نومروك نحب نطمن عليك

مديتلو و ما حسبتهاش ،حسيتها عيب بش ننبزو و نقولو لا بعد ما فرح بيا هكا ..سلمت عليه و مشيت

كريم ايييه يا حسرة منين طلعلي سنين ما ريتوش ،تعداو اشهرة و انا مع هارون دخول و خروج و جو و برشا حب لين ناداولي شركة و هو شجعني برشا و هزني هو للانترتيان عديت و المرة هذي قبلوني ،فرحت برشا صحيح

شركة كبيرة و شهرية مش طيارة اما قولت ميسالش اما قولت ميسالش هذي مالها الا بداية ،هارون ماللول نبه عليا

-اسمع نقولك هاو من توا لا نحب لا زميلي لا عرفي ،تخدم راسك مطبس و تروح ديراكت

تعداو اشهرة نخدم و في وقت لفطور نهبط لمطعم بحذانا نفطر وحدي خاطر ما عملتش صحاب فالخدمة ،لكلهم اكبر مني ،تعرفت على كريم ولد موله المطعم و هو زادة شادو مع بوه ،كان يراني وحدي يتبسملي يسلم عليا و

يقولي

-عجبك لفطور مدموازال ؟؟

-اي اي عيشك يعطيكم الصحة

وليت كليونت فيدال و بالوقت عرفني و عرفتو محلاه فدلاك و روحو خفيفة ،ولى يستناني يجيب صحنو و يجي يفطر معايا ،نحكيو في كل شي عامة ،ما حكيتش لهارون عليه خفت يبطلني مالخدمة و نخسر الصديق الوحيد اللي

عندي خاطر هارون حرم عليا صحاب الفاك لكل و خلى حياتي لكل مربوطة كان بيه هو ......