Zaineb S. - زينب س

ما نلقى روحي كان قدام دارو هبط بديت اندق فالباب انوقز بالقوي و انصيح سيييييف يا سيف اخرج ..خرجلي السورية محلولة شطر داخل فالسروال و شطر لاخر خارج و عينيه حمرة دزيتو و دخلت ..ابعد يا ساقط يا كلب ويني ويني مرتك خلي نحكي معاها و انقولها ماخذة شكون ..خلط عليا حافي و في يدو دبوزة ..

جبدني حملني بقيت باهتة شوية و بعد دزيتو ..تي ابعدني بعد يديك لمسخين عليا ..نلقاه يبكي ..ويني مرتك اتكلم اتكلم ، شديتو من مرفقو انرج فيه ..شنوة تحب مني تحب تفضحني تقول اللي انا كنت خديمة برا تحب تقول على عملتك لمسودة برا ما عاد يهمني شي شي سمعت ما عاد عندي ما نخسر ..ولدي ....شنوة ؟! ..ولدي فالسبيطار قاعد يموت ..قعد فالقاع عمل فم مالدبوزة و دموعو هابطة ..غزرلي ..زعمة ربي يعاقب ..انا تصدمت ملقيت منقول جيت ماشية ..سمعتو قال سامحني سامحني و اطرق بالبكاء ....

روحت لدار مأيسة محطمة داري كالعدة ظلام ما فيها حد رجعت لصفر رجعت وحيدة ما عندي حد قداش قداش بش نقعد نخلص قداش الدنيا بش تضلمني علاش حياتي علاش عايشة انا الناس يقولو صحة ليها فنانة مشهورة عندها كل شي و انا ما نحب مالدنيا كان وليد ستخسروه عليا شنوة ذنبي فاللي صارلي الكل غلطت شكون ما يغلطش علاش انا علاش يا ربي ..قاعدة انشوف فيه في كل تركينة تذكرت اول نهار جاني فيه تذكرت الفيلم اللي تفرجنا فيه لقطانية الطايرة فالكوجينة و احنا نضحكو ، دموعي هابطة جبدت حرابش اللي عندي فالدار حطيتهم حطيت قدامي كاس ماء و بقيت سارحة تفكرت صغري دارنا امي بابا خواتي اول مرا خدمت عندها راجلها سي مختار زبيدة سيف وليد ..وليد وليد قهرني شواني قتلني خذيت تعميت فاللحظة هذيكا عقلي غاب عليا دنيا هذي ما عملتش معايا الباهي من كف لكف تعبت عييت يزي يزي يزيني اكهو ..جبدت لحرابش حطيتهم في يديا و شربتهم الكل شوية و انرا فالدنيا فلو الحيط قدامي يمشي و يجي و ما نعرفش بعد شنوة صار ....

ما نعرفش قداش تعدا وقت و لا شنوة صار اما بديت نحل في عيني بشوية ثمة ضبابة قدام عيني ثمة خيالات تتحرك ما فهمت شي بديت نحل في عيني بشوية بشوية نرى في وليد قاعد مقابلني و شاد راسو بين يديه و لحية مسيبة ثمة واحد اخر مهدي شافني حليت عينيا نغزر باهتة صاح ..وليد وليد ..وليد هز راسو ..فاقت يا وليد ..جاني يجري شدني من يدي ..شهرزاد كلمني اش تحس في روحك كلمني امان امان ..ما نجمتش انقول حتى كلمة مهدي خرج ينادي لطبيب ..وليد شدلي يدي يبوس فيها ..جا الطبيب بدا يحلي في عينيا و بعد حط استيتو على سدري شافني منا و منا و بعد قالي ..ايا حمدلله مدام مدام شهرزاد هكا تفجعنا عليك ..دكتور شنوة صارلي نتكلم بالسيف بشوية ..شربة دوزة كبيرو حرابش من حسن الحظ الدوا اللي شربتو يعطي مفعولو بعد ساعتين  غسلنالك معدتك و ان شاء الله لباس ..قام وليد :دكتور عيشك وقتاش نجمو نخرجوها ..تكمل اليوم تحت رعايتنا و غدوة تروحو بيها ..عيشك ..تبسم الطبيب و مشى....

جاني مهدي حمدلله على سلامتك و خرج بقيت انا و وليد ..وليد شنوة صار شكون جابني ..يا ربي يعني لا دنيا تحبني لا الموت يحبني ..اس ما تحكيش هكا ..علاش علاش ما خليتنيش نموت شكون قالك اجا ..بعد ما جيتني لدار بقيت وحدي نخمم و عصابي تحرقت نكذب عليك كيف قوتلك كرهتك و اللي بيناتنا وفى حاجتي بيك حبيت وقتها نحملك نخليك عندي نقولك اسكت ما تبكيش ما نجمتش حاجة اقوى مني ..نغزرلو و دموعي هابطة ..جيتك خلط عليك بش نحكي معاك نلقاك دايخة و باكو لحرابش فالقاع هبلت في مخي طرت بيك طريق كامل بش ندخل فالكراهب وصلت بيك هنا و انتي مش فايقة جملة ضربت روحي هبلت شنوة بش نعمل كان صارتلك حاجة كيفاش بش انعيش من بعدك كيفاش بش نسامح روحي عندك 3 ايام يعديولك فالسيروم و دويات و ثلاث ايام فالنهر نموت الف موتة عرفت من غيرك ما نجمش انعيش ..جبدت يدو بستها و دموعي هابطة...