Zaineb S. - زينب س

وليد ما خلنيش لحظة من غدوة جاتني امو و مهدي خرجوني ، احنا خارجين مالباب و جماعة خارجين يبكيو و مخرجين صنوق ميت انا قلبي تقبض تخيلت روحي في بلاصتو ربي عطاني فرصة اخرى بش انصلح حياتي اما اكثر حاجة وجعتني شفت سيف معاهم وجهو اكحل دموعو هابطة و حالتو حليلة خيال ولا انا تفجعت و دموعي هبطو فهمت اللي هذاكا ولدو بديت نبكي وليد ما فهم شي شدني حملني ..شهرزاد يزي هاني معاك ..

امو و مهدي شدو صحيح بش نروح معاهم عطاوني بيت وايد مسكين و هو يبات فالصالة ..ام وليد تلهات بيا دوايا في وقتو توكل فيا لقيت فيها الام اللي ما لقيتهاش في امي ..وليد يجيني يقعد بحذايا يلعبلي على شعري و كالعادة هو يطبس يبوسني و وليد يصب الزيت هالطفل ما فهمتش شكون محرشو علينا و ساعات يشدنا بالكمشة ههه بديت نرجع نشد صحتي وليت نخرج للفيراندا ندور شوية ....

تفرهدت الراحة فددتني برشا خرجت نلقى وليد و مهدي فالفيراندا يلعبو فالكورة انا خرجت جات في وجهي وليد جاني يجري ..شهرزاد لباس ..ههههه لا لباس..سامحني ما ريتكش ..مهدي : متصدقوش و شد عندك هذي عالحساب مازال الضرب الصحيح بعد العرس ..درت لوليد نحب نفهم شنوة لحكاية ..ضحك و جبدني من يدي و طلعني فالدروج ..مهدي : اووه يا جماعة كان ستحقيتو حاجة انا موجود ..نضحكو دارلو وليد ..والله تخلط المرة هذي نرميك مالسطح ..انا حشمت و قرصت وليد ..طلعنا مازلنا كيف بعدنا و هو حملني من تالي و باسني من خدي ..حطيت يدي عل يديه ..وليد ..يا روحو ..امان ماعادش تخليني والله نموت من بعدك ..بعد الشعر على رقبتي و طبس باسني ..حسيت تقشعيرة في لحمي الكل ..درتلو و شديتو من جنابو ..تعرف فاش نخمم ..مممم قولي ..نعمل غناية عليك ..شنوة بش تسميها ..اش تسوا حياتي بلا بيك ..معقول ..وطبس باسني و بستو و حملتو بالقوي قداش نحبو و انموت عليه ..شهرزاد ..وي ..تاخذني ..وخرت حليت عينيا غزرتلو ..وبعد نقزت تعنكشت فيه نبوس فيه بكولو و انصيح ..مازلت تسأل انت ..يا مهبولة راسي سايس ......

رجعت فيا الروح رجعت لداري نضمتها رجعت لروتين لقديم كل شي في بلاصتو وليد باع ارض بوه و بفلوسها حل صالة سبور كبيرة ليه هو و خوه اما ما خليتوش يبيع الدار نحبها برشا غادي وين بدا حبنا هذيكا الدار اللي لمتنا و فيها عرفت وليد على حقيقتو ..المرة هذي بش نلبس الروبة البيضة اي كيف اي بنية و بش نعمل عرس كبير و انقول لناس الكل هذا حبيبي اللي بش انكمل معاه حياتي الكل....جا نهار العرس كل شي حاضر حاسة روحي كايني اول مرة نعرس و بنسبة ليا هذا اول عرس نعيشو بقلبي و بمخي و روحي و كل نبض فيا ..خرجت مالحجامة و نلقى وليد يستنى فيا ..كوستيم فالابيض مع لحيتو جاتو تفتق ..

غزرلي غزرة ما ننساهاش و عينيه دمعت جاني باسني من راسي و مشينا لصالة و شكون يسوق بينا اكيد مهدي ، فالطريق فالكرهبة حطلنا غتا بالقوي ..مهدي : صحة شهرزاد مبروك ..عيش خويا العاقبة ليك نفرح بيك ..هههه انا لا خاطي خوك ..وليد مش هنا جملة ما هزش عينو عليا ..اوو وليد نحكي معاك ..شبيك اش تحب زادة ..انا نضحك ..منحب شي اما ممكن ياسر نتوحشك الليلة ..وليد ضربو في كتفو .. انا ما عادش انجم بيناتهم بالضحك ..يزي يزيو مكياجي بش يتهلك ..وصلنا لصالة فنانين ممثلين صحابي الناس الكل موجودين ثمة حاجة وحدة وجعتني حسيت ببلاصة امي و بابا و خواتي ليلة تمنيتهم معايا خممت برشا نمشيلهم و نستدعاهم اما ما نجمتش خليتها للوقت يمكن ينجم يداوي جراحي و انسامحهم ...وصلنا للوتيل و ماللي فالاسونسور و وليد يبوس فيا و يحل فالقفافل متع السورية ..يا وليد يزي ..ضحكنا ما يهمنيش نحبك باش تفهم ..هههه اي عاد شبيه اصبر شوية ..سيبنا عاد يزيني ما صبرت ..دخلنا للبيت جبدني باسني الليلة نخليك تصدق ههههه..شهرزاد ..وي ..تعرف اللي اول بوسة هي ابن وحدة ..حشمت ..اي وقتها تفجعت عليك برشا في بالي لسعد السخطة شدك هههه..لا لا مش هذيكا ..ماله؟! ..اللي فالوتيل و انا سكران ..ياااااااا صار انت فايق ..نضرب فيه و هو هارب عليا ..مخليني اكاكا نتبهلل ياااااا ههههه....