Zaineb S. - زينب س

كملنا رجعنا لطالة قعدنا نتفرجو ساكتين شوية و انا بيدي وليت نتثاوب الفجر قريب يطلع و هو مسكين باين تاعب ، شافني هكاكا قام قالي ايا سامحني توا نخليك ترتاح ..باهي اوكي حتى انت راك تعبت ..

جا ماشي ناديتلو ..وليد ..وي ..عيشك ..تبسملي و مشا ..رقدت ديراكت ما فقت كان من غدوة لعشية ..قمت اندور فالدار نلقى الفاست متع وليد شديتها شميتها امممم مابن ريحتها ، خرجت مشيتلو دقيت الباب ملقيتوش مازلت انلوج عليه نلقاه داخل يحكي فالتلفون و يضحك (هي هاو يعرف يتكلم و يضحك بيني و بين روحي غزلت) شافني قال ..باهي اوكي تو بعد انكلمك و علق..اهلا شهرزاد ..اهلا هذي الفاست متاعك انسيتها البارح..

خذاها قالي يعيشك ..قوتلو: بربيوليد تلفونك ما تخليوش occupé برشا خاطر ممكن نستحقك ..قعد يغزرلي و انا هزيت روحي و مشيت نستنى وقتاش نتخبى على نظرو ..اووه شنوة هذا اللي قولتهولو و انا اش يهمني فيه الراجل يتكلم ولا يقعد وووه يا شهرزاد قداش فديت على روحي و قعدت باقي النهار انغزل ...

تعداو ايامات ساعات انبرف مع الفرقة اكهو ولا فالدار نوم و ماكلة ، وليد كيف يبدا ما عنديش خدمة انقولو تنجم تروح مش مشكلة..فالويكاند جاتني خدمة في وتيل **** ريزيرفاسيون ل 2 اشخاص نهارين قراتوي خالصة من عند موله لوتيل ، اكهو حضرت الفليجة متاعي خرجت نلقى وليد يستنى فيا ، خذا عليا الفليجة حطها فالكرهبة طلعت بجنبو من قدام فالثنية انبربش فالسيديات طريق طويلة اش بش يعديه ، نحكي بصوت عالي ..دارلي وليد ..فنانة و تلوج على cd غني انتي (اول مرة يطلب مني انغني) .. انا ..اي انتي ..اممم باهي شنوة تحب نسمعك ..ما نعرفش على ذوقك اما انا نحب لقديم ..اوكي ..احم احم ..تبسملي على جنب ..غنيت حاجة حاسة بيها 《رجعوني عنيك لايامي اللي راحو علموني اندم على الماضي و جراحو .اللي شفته قبل ما تشوفك عينيه عمر ضايع يحسبوم ازاي عليا...كملت قالي ..برافو ياسر حلوة ..باهي توا يزي خلي صوتي مرتاح لسهرية

..اوكي ..حطيت cd فيه طرب زادة قعدنا نسمعو و ساكتين كالعادة غلب عليا انا لساني ما نجمتش نشدو و هو نهار كامل كلمة و قص ..وليد ..وي ..احكيلي شوية على روحك ..شنوة تحب تعرف ..ما نعرفش، عايلتك خواتك ..ما ثماش حاجة سبسيال عايلة تونسية كيف العايلات الكل ..سكت و احسن خاطر كان هو سألني شنوة بش نحكي و شنوة بش نخبي ......