قمت مالنوم ريقي شايح عطشانة نحب عالماء مديت يدي فالظلام نتلمس ما لقيتش دبوزة درت على جنبي نلقى بلاصة هارون فارغة ،قمت عينيا مغمضة مشيت فالظلام حليت الباب مشيت شوية فالكلوار نسمع في حس و صوت و ضحك هارون ،قربت اكثر نمشي على تراطش صوابعي ،عينيا تحلو و النوم طار ،ريتو متكي فالصالة و التلفون على وذنو يحكي بشوية ..وي ..اممم..حتى انا حبي ..باهي غدوة ماله اوكي ....

ما نعرفش شنوة قال بعد اما اللي حسيتو فاللحظة هذيكا ما يتوصفش ،سكينة و تغرست في قلبي ،النفس طالع هابط حسيت صيحة بش تخرج من فمي ،حطيت يدي على فمي بش نمنع روحي و ما نتكلمش بلعت ريقي ..نسمع فيه ..اوكي باهي ايا نخليك نتقابلو غدوة ..

رجعت نزرب شديت بلاصتي و تغطيت و عملت روحي راقدة ،بعد شوية خلط طلع بجنبي طل عليا يثبت راقدة ولا لا كيف تأكد عطاني بالظهر و رقد ..مصدومة دموعي هابطة وحدها بالساكتة نتهز و نتنفض في بلاصتي خايفة لا يفيق بيا ما نعرفش شنوة اللي سكتني ،علاش ممشيتلوش بردت قلبي فيه نحب نصيح نعيط نبكي نكسر الدار فوق راسو ،ساقط يخون فيا انا مرتو عشيرتو ام ولادو ..جاجة بيني و بين روحي تقولي اسكت غدوة الصباح رباح ،تو نقولك كيفاش يا هارون والله ما نخربها فوق راسك ،نحكي هكا بيني و بين روحي و دموعي هابطة و هو يضرب فالنوم بجنبي ما فاق بشي ،قعدت اكاكا لوجوه الصباح بش نعست شوية ....