قمت م نوم كلي موش ڨد بعضي درى شبيا كايني كنت مخدرة .. نلقى دبشي كلو مفروت و اوراقي مطيشين ، البيت معقمه ريحت دوايات ، شثمة ياخي شكون مريض ..

عاندت روحي بسيف لبست و هزيت ساكي و خارجه عرضتني امي وجهها أصفر و عيونها دم بدموع .. وراها زوز صحباتي و خواتي بنات خﻻتي .. شبيهم ملمومين من على الصباح هو صحيح ليوم عرسي لكن مزال بكري و شبيهم ما زينوش ملبسوش الجديد و ما يضحطوش ..

《 اه يبناويت عرست و باش نشد دويرتي مع الحب و نخليكم ..》

و بدات امي تبكي ..

《ي ما تبكيش مدامني فرحانه تهني علياَّ تبكيش علياَّ ماشية لعند راجل يحبني عمرو ﻻ يبكيني ﻻ يخليني .. ياما بالله ﻻ توتريني هاي خنمشي سيبيني .. 》

شدتني و درى شقتلي ماسمعتهاش هربت منها و منهم ماستنيتهاش .. ماكم تعرفو حساسية الام نهار العرس ..

خذيت اول تكسي و مشيت للحجامه الي تفاهمت معاها في ثنيتي نطلب في لموﻻت الروبة باش منبطاش ماهزتش علياَّ يجي خمسين مرة عاد قلت والله لما نمشي نكري روبة جديدة اصﻻ أخرى ماحبيتهاش و محزوقة ياسر و الحب مغيار تو ما تعجبوش .. هاي مشيت و اخترت اعز روبة و هزيتها للحجامه ..

دخلت ندعثر فرحانه نرعش تڨول بردانه و انا عيوني تبكي بالدموع مليانه ..

دموع الفرحة تو سنينْ في هالنهار نستنى وقتاش نملي عليه دارو .. تو سنين ليا نستنى يخدم و يلم ف فلوس الدارر و العرس و الصغار .. فرحانه و الكون نرى فيه يتلون و الناس يورو بيا .. شواية لدخت شديت روحيِّ

شافتني المرى جتني تجري جابت لي الما شربتني هدتني .. نضحك نضحك و نڨلها

《سامحيني فرحانه و جيت مزروبة هاي فيدي الروبة و هربت من دارنا و صحباتي يبكو و ينغنغوو امي درى شباها مصدومه .. ڨلب لميما نهار عرس كبدتها ماك عارفه ..

هايا نبدو بالله ما تبطيش ﻻ نخلط مخر يمشو اكا البناوبت و يخلوني ههه .. 》

درى شتحكي مافهمتهاش في عيونها كﻻم حزين .. ڨتلها

《 نحب نخرج محﻻني نفاجؤو بزيني و دﻻلي .. توحشتو من نهارين ماريتوش ﻻ كلمتو ﻻ كلمني .. اووه هاني خرجت مزروبة ماجبتش تاليفوني و اﻻ راني كلمتو تزعبت عليه ديماا عاملة فيه ..

نجننو بحكاياتي و هو يشيخ غير يسمع ضحكاتي ..

ي وخيتي مرزنو الوقت الحمدلله كملت و حضرت نلبس الروبة و نجيكم نوريكم العروسة ههه تلونت و لبيض لبست ..

نحب نسمعهم اش قالو عليا محﻻني و اﻻ دونية مانيش نفهم اصوات بﻻ كﻻم شبيا ي ربي سيدي يمشيش ندوخ بحذاه نفجعوو عليا .. هايا شدي روحك عاد .. 》

باستني المرى تاع الحجامة و ندريش شقتلي بدموع العين ..

تلميت في بعضي مبهاني ي ربي سيدي و محﻻني .. و أخيراً ي ربي باش نملي عليه الدار و نجيبو كدس صغار الحلمه معادش حلمه هاو جا النهار الي تحققت .. راو يستنى فيا على الجمر

..

نجري ناخو تاكسي نروح للدار ..

دخلت نزغرط و نادي

《ياما هايا هاني جيت . ياما قولي علياَّ كلمتين باهين .. نززززغرط و نضحك من ڨلبي يقولو لي تزغرط في عرسها سعدها قوي .. و انا مقوى سعدي بيه لي نحبوو شنعرس بيه ..

دخلت ملقاهم مازالو كيما هما ..

شبيكم لتوة ﻻ لبستووو مخيبكم تعملو علياَّ بالعاني ي بناويت احشمووو راو نهار عرسي موش وقت فازات و لعب صغار .. ياما هاي البسي روبتك الصفرى الذهبي و لمي خاﻻتي و هزولي

دبشي باش نمشي ياما هايا بوسيني شوفي محﻻني و مبهاني ... أدعيلي نملي عينيه و نفرح ڨلبو و نهنيه .

تغششت و بديت نرعش و دموعي غالبتي .. عﻻش هكا تعملو معايا هاو مكياجي باش يفسد .. ياما ميمتي خليتاها بيا نهار عرسي و تبعي في البنات يغزلو فيا ..

ياما ڨومي عليهم اضربيهم .. 》

قربتلي امي حملتني و مدافا ميمتي .. باستني في كتفي و جبيني محنها ميمتي ..

شدتني من كتافي و غزرتلي في عيني و بحرقة صوتها في وذنايا نادتني ..

" ي بنيتي فيقي ! ، ي بنيتي فيقي تعبتيني عﻻش هاكا تخليني " ..

نغزر في عيونها نلوج على تفسير مافهمتش .. 《ياما نهاري هذا .. ياما شوفي صحباتي تلمو على جالي و الخليل يستنى فيا .. ياما شبيكي تبكيش ..》

"ي بنيتي فيقي هديتيني .. تو هذا ثالث يوم على هالحال .. حرت فيك و غلبتيني ي بنيتي يزي ما عملتي في روحك ي بنتي ارحمي نفسك حرام عليك والله حرام .."

《انت الي حرام عليك و انتم ااكل حرام عليكم عﻻه كان انا نهار عرسي هكا تعملو فيا .. دزيتها بعدتها عليا و مشيت لصحباتي نصيح فيهم .. قالو كلمة فهموها قلها راو حرام تقتلولي فرحتي

في نهاري ..

انت انت ماك ديما تقولي- ايه ي فاطمه نهار عرسك نعملو الي ماعملو حد .. -هذا حد عمايلكم معايا ..

بعدت و صوت صياحكم و بكاهم غلبني ..

و امي وحدها ترجع تقلي ي بنيتي يزي ..

"ي بنتي الدنياَ مكاتيب و هو موش مكتوبك .. ي بنتي ارضي ب قدرك .. انسيه ابكي و انسيه .. هذا ثالث يوم ليه بعد عرسوو و انت من نهارتو تلبسي و تزيني و تستنيه و مايجيش خاطرو

في العسل مع وحدة أخرى ..

ي بنتي فيقي يزي ما عملتي في روحكْ .. شوفي الناس هاهم بحذاك من نهارتها يستنو فيك تفيقي و طمنيهم عليك ..

ي بنيتي ارحمي روحك عﻻش هاكا صاير فيك

لي خلقة خلق غيرو ، الدنياَ ما تاقفش على حد و هو عايش و انت تحبي تموتي بالعرق ؟

ي بنتي ..."

الفم يتحرك و العيون تدمع لكن ماسمعتهاش ما فهمتهاش ما حسيتهاش و مخي بدى يدووور يدووور دار بيا بااصحباتي بأمي و اادار و الحيوط ..

برشا حس برشاااا حس و منفهم في شيء حتى عيوني ظﻻمت و فجأة بردت و ذبلت ﻻ عاد صوت ﻻ صورة ..

وينها روبتي البيضا مكياجي و عريسي لي ماهوش يستنى ..

وينها فرحه عمريٍ ..

ويني من بعد هاك الغصرة ماعاودتش سمعت صوت امي و ﻻ شفت عيونها ..