ماكنتش نفهم ..صغيرة دلولة محلاها بين الاهل شكون رضا عليه و يهناها .. صغيرة حتى من جيرانهم يموتو علاها .. مازلت متعرفش الدنيا و ماتفهم منها شيئ .. كانت جارتهم تقول لامها خليها تلعب بحذايا انا عندي كان الاولاد و كبار يخدمو .. نقلق وحدي خلاها تونسني ..

تمشي امها و تخليها عند الجارة و احد من اولادها يسمع كن ورى الباب ..جا قلها امي خليني نلعب بيها بربي الصغرونه قداش نحبها .. محلاها بيضه تقول فرماج الصباح ..يهزها لبيتو تلعب معاه .. لعبت العرايس .. تتوجع و تفد و متحبش اللعب هذا لكنها معندهاش سلطه على روحها ..

و بعد ما يتعداو سوايع يظهرلو فد منها تي شبيها بكايا هالفرخه ياسر تعبتني هزها عليا .كبرت الصغرونه الدلوله و سنه اول عام في المدرسه .. هي ياسر تحب القرايه و الكتب و المدرسه .. تحب تمشي في الزنقه مع صحابها تحب الدروس و تتلهى في القسم ..لككن كان ثمه حصه في الجمعه معندهاش اسم منهجي في قانون المدرسه .. حصه الراحه داخل القسم .. سيدي المعلم هذا لي يحفظهم القران هذي مهمتو ..

كان يعمللهم راحه بين الساعه و الساعه ..يقلهم توة نسكرو الشبابك الكل و نسكرو الباب و نلعبو شواية و يحط زوز اعرض ولاد في الباب يعسو على سيدي المدير ..أما يا لولاد انتما رجال تلعبو وحدكم و انا نلعب مع اللبانا خاطرهم مايفهموش ..نلعبو عريس و عروسه ..كبرت شوايه الصغرونه ولات صبيه و كيما يقولو وليا .. طول و عرض و بيوضيه .. عيون ماشاء الله و ضحكه تهز العقل .. شعر حرير طويــل و العقل زادها في زينها ..كبرت و مشات تقرى في ليساي .. اول عاو سنه سابعه اساسي .. صبيه و تمشي و تجي وحدها تعمل على روحها معندها كان العالي ربها يحيمها ..طريق الليساي واعرة خاليا ..في طريق المشي و الجاي برشا أفلام تاع عراس قدام عينيها صارو ..في الكار الشيباني يتعب تقوم تخليلو الكرسي باش يقعد ..

يقلها أقف قدامي ظلل عليا الشمس عيش بنتي .. و يرشق العينين .. المتعدي يمد يدو .. و إلي يتقلق من الضيق في الكار يجس ب بدنو ..هذي موش افلام مصرية ز إلا أفلام ايباحيه .. هذا واقع ..الصغرونه الدلوللا القراية لي جيرانهم يحبوها لي تحامي على روحها و عاشت بين المكلبه وحدها .. عاشت في غابه قانونها الي على نيتو يموت و الي مايفهمش الخمج يتعفس ..و إلي ما تلقاش شكون عس وراها تتقصف ..هي كبــر ت برشا برشا أكثر من عمرها ..لـــكن قعدت مكسرة من جواججيها .. في عينيها الرجال الـــكل ذيوبه جواعه .. الرجال كلهم ' مرضى بالجنس ' ..قدام غرائزهم يوليو حياوانات ..

كبـرت و فهمت لي ولد جارتهم و سيدي المعلم و اولاد لي طريق الليساي و الراجل لكبير لي في الكار .. كلهم يصبو في نفس الخابيه لي إسمها ' التحرش الجنسي ' ..لي تسعين بالميه من النسى في تونس يتعايشو معاه .. يومياً ..نفهمك خويا كي تقولي موش الرجال الكل كيف كيف .. نعرف رجال معدنهم ذهب .. لكن ما تغطيوش عين الشمس بالغربال ..لـــكن عاونونا نحن المغصوبيـن من عينين المرضى ..عاون امك و اختك و بنت اهلك و المرى لي تحبها و بنتك ..كلهم كان تحطهم في قفص بلاَر .. موش باش يسلمو من المراض لي في الشارع و في التراكن الكل .. لي في الحومه و في العايلا و في اقرب الاقربون .. ..بالذمه باش نتابع تعاليقكم في صمت .