.. موتو .. موتو الكُل و خلولي خوياَ .

ڨَـــالو علياً بنياَ عاصية ولدياً ..

ما يعرفوش إلي بياً ..

ليومة ثنين و عشرين سنة و خمسة اشهر ناقصة ليلا .. عمريٍ من نهار لي ولدتنيِ اميِ ..

أمي المُناضلة .. و موش باش نحكي عليهاَ .. منعرفش نحي عليهاً ..

لـــــكن تراه في سجل طفولتي لي ما عشتهاش و إلا مراقتي لي درا كيفاش تعدات ,, ثماش راجل وضيفتو الحياتية يكون "اب " ..

باباَ ..

تراه آرجع معايا و أنا صغيرة و قلي  .. تعرف ريحتي القارصة بعد اللعب و الفاوحة بعدالدوش ؟

باباَ تعرف لون بشرتي ؟

باباَ تعرف معلمتي لي نبزتني خاطر رغم إني متفوقة في قرايتي مازلت ما زرتش المدرسة و مازالو ماتعرفوش عليك .. ؟

باباَ تراه شنية أحلى ماكلة أنا نحبها .

شنية لوني المفضل ؟

و أنا صغيرة تولدت مراًضة ,  تراه شنية سبب وجاعي ؟ من شنية نعاني ؟

بابا وقتاش تولدت أنا ؟

بابا , في أما ليسي قريت أنا و كيفاش علاقاتي مع صحابي ؟

باباَ هيا نرجعو لطفولتي و قلي .. وقاش شريتلي حاجة أنا نحبها ,, تي حتى منحبهاش .. ؟

باباَ , نرجعو لـــ ليالي الصبيطارات و الدوايات و الطبة لي ما سالتهمش عليا و الفرملية لي ماوصيتهاش عليا و وقفتك لي ماصارتش قدام الباب الكبيـــر تاع الأنعاش لي سكروه عليا ..

باباَ شنية قريت أنا ؟

شنيــة هواياتي , بخلاف الحاجات لي تشوف فاها أنت موش صحيحة و حرمتها عليا ..؟

باباڨداش عندي من عام ملي بطلت القراية و قداش رڨدت ليل و نهار في غيبوبة من الستراس و الروتين و الدبريماسيون , ڨدًاش ؟

باباَ شنية عطلني في حياتي باش هكاَ ليومة حالي ؟

بابا يا سندي و يا ظهري و يا قدوتي و يـــآ حتى حاجة ملي سميتهم émoticône smile .

باباَ , زقتاش آخر مرة بستني و عنقتني ؟

باباَ علاه ما دللتنيش و إلا الريق هذا ما يواتينيش ؟

باباَ علاه ما حملتنيش وقت نطيح و متقومليش قايمة ؟

باباَ وين كنت وقت أنا في صبيطارات الدولة مطيشة ؟

باباَ مستقبلي ضاع , زعمة إنت توة فرحان ؟

باباَ يا عمريِ لي ضاع بلا بيك .

باباَ يا صُغريِ لي منتفكر منو شيئ ..

باباَ يا راجلِ أمي الغريبْ الأطوار ..

باباَ ياَ سبب في إلي انا فيه توة .)

باباَ عمة وقت زرڨتلي لحمي ليلتها جاك نوم ؟

باباَ زعمة نهار لي جاك ولد الناس و اهلو و خليتها بيا و جيت عڨاب الليل ليلتها شحسيت روحك ؟

باباَ يا سكوت مررلي حياتي .. يا غُموض ضيعني .. يا لامبالات عذبتني ..

باباَ يا إهمال مستحيل يتعوض ..

باباَ يا ظهري المكسر ..

بابا قلبي المعدوم .

باباَ علاش خليِــتها بياً ’’

علاش هديتني و خليتني ليومة هكا ؟؟

ناقمة يا  باب الدار و سقفها ..

ناقمه و نكره بنيِ جنسك .

ناقمه و قلبي جمِـــــــــــــــد ..

ياَ باباَ تمنيتك يوم تقليِ "يا بنتي" و تتلهى بياً ..

باباَ مانجمتش نتاقلم مع حد ..

منجمت نعيش مع حد ..

يا بابا راني كبرت وحدي راجل و مرى ..

شخصيتي و روحي و كراكتاري و كلي  .. كلي صنعتو وحدي ..

نكره العرس و الرجال و الدار و المستقبل و العيشة كــَ كٌل منك ..

ياَ بابا نقلك حاجة و متغشش .. ؟

ماكش أول راجل دخل لـــــڨلبي ..

ماكش إنت حب حياتي ..

باباَ سمحني خٌنتك ..

تي صبرت لين تعبت و جاَ الياقوت و الألماس و الحب الكلُ .. الحب ليِ بلاَ بيه كان هو نموت ..

موتو .. موتو الكُل و خلولي خوياَ

يزيك

___________________

الحقيقة توجع لكنها تبقى حقيقة