تسخايلني مرتاحه ؟حتى أنا ڨلبي واجعني على روحي .... حتى انا مليت من الماسك تاع المرى القوية .. تعبت نحب نبكي و نصيح .. نحب كتف صحيح نتكى عليه و صدر حنين نبكيلو .. أي و عﻻش ﻻ ؟

ماني بشر آ خلق ربي .. إنسانه .. و أكثر من انسانه ..مرى .. مرى ضعيفه و خوافه و حشامه و مراضه و بريئة و قرايه و مڨدية .. مرى تخمم متين مرة قبل ما تتكلم .. لكن تكتب ماغير ﻻ تشعر ..مرى صغيرة و روحها شابت ..تحكي تحكي تحكي و ما تسكتش .. تبكي تبكي تبكي و تبكي و متضحكش .. مرى كئيبه .. نفسيتها مريضه ..عندها إنفصام في كل شيء حتى في مخها ..

مرى تولدت بقلب مريض عندو الهوى في جنابو و فيه ثغرات تسرب الهوى .. بالوقت برد جمد ..مرى تعرفش تمثل .. لكن حقيقتها مقنعه ..تعرف تكون جريئة و متعرفشع تكون حد آخر ..

أنا إنسانه .. عﻻش تصدقونيش !و كان صدقتوني عﻻش هذا الأساس ما عاملتونيش ؟أنا بشر لحم و شوايه دم مسخ بالجراثيم ..عﻻش مصدقتوش حقيقتي .. و مازلتو تلوجو فيها !

أنا هذي الكائن الضعيف .. فيسع نبكي و فيسع نرضى و فيسع نفرح فيسع نتغشش .. فيسع نحبك فيسع نملكك فيسع نفد منك .. فيسع نمشي و نخليك .. فيسع ترجع تلوج عليا غيسع نعاود نقبلك .. فيسع تضرب تغدرني في نص قلبي فيسع تمشي . فيسع نقعد نستنى فيك ..فيسع .. ')

أنا الفيله الصغيرة السوده في ألواني ..البيضه في صيفاتي ..أنا المرى الوحيده لي متبراش مني و منبراش منك ..ﻻ نريحك مني ﻻ نرتاح منك ..مرى متعبه ..باسر متطلبه ..مرى غامقه برشا ..

أنا الباندا الكئيبة ..لي نقوم الصبباح باش نشرب القهوة و نشد فيرشي في ليل باش نكمل نشرب قهوتي باش كيف نقوم غدوة نشرب قهوة ..

أنا البانده الوحيده ..لي كيف نقوم م نووم نحظر قهوتي وحدي باش نشربها وحدي باش نعدي نهار كامل وحدي باش نرقد في بيتي وحدي في فرشي البارد وحدي .. باش نرقد و نعاود نقوم نعود نهار آمس لي عندو سنين محبش يوفا وحدي ..

أنا الباندا الفنانه ..نكتب كﻻمي لي عمري ﻻ قررت نكتبو .. نقراه وحدي و نحسو وحدي .. يوجعني و نزيد نوجع بيه روحي .. حتى نتخدر و معاش نحسها روحي وحدي ..

أنا الباندا اليتيمة ..لي نعيش في دارنا مع عائلتي وحدي ..نعرفش حنانة البو عندو سنين دفني و مقاش وقت باش يقرى عليا فاتحه و أمي معندهاش وقت ليا ..تجري ع الدنيا و المصروف و السترة و برشا حاجات تنجم تلقا بيناتهم وقت باش تقلي *شنحوااك * لكن متجي البالها ..بين خو هزو طريق كل يوم يزيد يقرب لنهايتو و انا كل يوم نموت بسكاتي عليه .بين أخت ربي يسترها و يقوييها .

أنا الباندا لي حضنها بارد و يديها ثلجت ..الراجل لي حبيت عليها ممكن ميعرفش ثنيتي ممكن ضيعني ممكن ﻻهي شوايه ..ممكن معطوهش فرصه يقربلي .. ممكن خايف .. ممكن موجود و منحبش نقول عليه ..ممكن لي نحبو لتوة حب عليا و اﻻ لتوة ﻻ شاف عينيا و اﻻ كتره الصفات لي فيا ..ااراجل لي نحبو ممكن لتوة ﻻ روح من السفر .. مشى يجيبلي في المستقبل الجميل ..ممكن ﻻهي مع مرى مزيانه ..ممكن انا مخبيتو على العينين ..ربي يحفظو وين ما كان .

أنا الباندا الي كتبت هذا الكﻻم .. هذا الاعتراف و الواقع ..

أنا فاطمه لي يمكن يجي نهار و كﻻم يشيح و معاش يتقرى ..