برشاَ كﻻم مضمونو مﻻم و سب و بوس و تعنيق و شتمان .

برشاَ غصرات و وجيعات موش عارفه وين نخبيهم نهار لي تجي العينْ في العين ..

تعرفني منعرفشْ نخبي .

و وجهي يسبق صوتي و عيوني فضيحه ..

تعرفني منخبيش الي نحسو و منعرفش نأجلوووو ..

مصيبة هالطبيعه الحرفة الي فياً ، أما تو شوفلي حل شنعمِلْ فيك و فياً و في وجيعتك لي هديتهالي في طبق من ذهب .. و ڨتلك رآني تاعبه مهدودة موش ناقصه عصب ..

حكيتلك شبيا و عﻻش و كيفاشْ قبلك صار فياً ..

بكيتلك .

و غصيت بالدمع و انا نكتبلك باش نڨلك : " والله الي ﻻ تمن بيه ﻻ يستنا فيك تؤمن بيه ، توحشتكْ "

توحشتكْ وقت كنت ليا .

توحشتكْ وقت كنت ليا تسهر و تقوم و معايا تنسى الهموم ..

وينك ليوم ؟

مشيت ماغير ما تڨول .. ﻻ كلمة ﻻ حتىّ حرف مرسول ؟

مشيت بالسكات و شويتني بالعوينات الي في آخر مرة شفتهم مالقيتش روحيِّ فيهم ..

نسيتني ؟

هو انت م لول اصﻻ حبيتني ؟

ياخي تعرف تحب ، كيما تعرف توجع بالسكات ؟

كنت من دون الناسْ نفهمك و انت تحكي بالعين ..

نصغى لصوت عيونك و نحسك ..

كنت نحس روحيِّ قوية بيك* ، بيك قوية كيما قمة جبل و اخر قطرة عسل و اول تعنيقه في اكا المحل ..

نسيتني ؟

موش ڨتلي الي انت ديماَ معاياَ قريب حتىّ كان غلبتك الضوروف ؟

موش ڨتلي الي انت معايا في الغصرة تمحي علياَّ الخوف ؟

كذبت علياَّ ؟

بعد و أكثر من هكا .. كنت تمثل علياَّ ؟

ياخي بالرسمي ماعلبالكش بيا ؟

باهي عﻻش كنت نرى فرحه في عينيك بوجودي ؟

عﻻش كنت نرى روحيِّ نسوى عندك بﻻصة م الدنياَ ؟

بعد هذا الكل ، موش مهم .

المهم " توحشتكْ ، نحب نوشم مثلث فيه دويرة صغيرة و زوز سطور على جنب ، نحب نترمى على الأرض نغزر للنجوم في شونك ، نحب نلون شعري بلون جديد على ذوقك ، نحب نقوم صباح

نجيك نعمل قهوة معاك و نلعبو  candy .. نحبْ نعنقك قدام عينيهم اكا الناسْ الي في بالك و نڨلهم غيرك ما يحﻻلي ، نحب نكتب نصي الجاي عليك نحكيلهم كيفاشْ رجعت فياً الروح بعد ما

رجعت نعرفك .. نحبْ نتصور معاك في تليفونك قبل ما يعاود يفسد و نحطو تصويرة عالانستا ، نحب نحبك أكثر و أكبر و ماغير حتىّ كادروات ، نحب تظﻻم الدنياَ و تصب مطر و نراك .."

" المهم نحب نوشمك في رنت خلخالي رابط في القدم و عاقد في جاشي .. و توحشتكْ "

و مازلتْ باش تسكت .

لكن ما ڨتليش " كيفاشْ نسكت كيف تجي العينْ في العين " ؟؟

_______

هذا موش نص .. موش ارتيكل يتحط في الليستا هذا واقع

يوجع بكل حب .. هذا دنياَّ يومين معاياَ و الباقي ساكت و مايحبش يحكي في الموضوع .

نحبك .