اول مرة قريتلها قبل عامين.. كنت خارجة من اول قصة حرب فاشلة في حياتي.. نقصد حب..

و كنت عايشة الدور كيما اي طفلة ماشي فيبالها الدنيا بش تاقف بعد ما اخليها الراجل اللي  تحبو.. كنت قاعدة نحاول نعيش طقوس الفراق و النسيان.. موزيكا متع دمار.. شكلاطة.. و باكو بابي مشوار و النبي مولاك..

لقيت ارتيكل اسمو '' النسيان '' و كنت كي لغريق اللي احاول اشد في قشة قلت بالك نلقى فيه وصفة سحرية  تخليني ننسى و شدتني اول جملة ''وحدة بوهالية في الفايسبوك اسمها فاطمة الشريف ''  يا وخيتي كان انت بوهالية مالا انا شنو ؟ كل كلمة كتبتها كنت نحب نقولها  الفرق اللي هي كتبتها و انا ما نجمتش ننطقها.. ما بنها الوجيعة و مزينها كي تتكتب بالتفاصيل هاكم الكل..  و انا طفلة نعشق التفاصيل اما ما نعرفش نحكيهم كيفها ..

انا نامن اللي الكتيبة وجيعة قبل ما تكون موهبة على هاكا كان القلم و الورقة هوما اللي كنت نهرب معاهم مالدنيا اما ما نعرش نكون بالقوة هاكي.. انا الغنايات الحزينة ما نحلش الشباك و نطيشهم كيفها نسمعهم حتى لين يطلعو من خشمي و حتى كان ما عندي شي يبكي نخلقلهم سبب بش نبكي..

انا الكتاب اللي يعجبني نقراة اكثر من 10 مرات كيما ارتيكلواتها و ما اهونش عليا نطيشو تي حتى المنيكير الاحمر اللي بش نتظاهر بيه قدامو و  قدام العباد  بالقوة ما نعرفش نعملو كل ما نحاول نعمل ايد تتبلبز الايد الاخرى و كانك عال مية فرنك انا دوبا اطيح في ايدي دورو نجري نشري بيه شكلاطة حتى كي تلقاني متوحشتو.. ناكل الشكلاطة و بعد نقعد نبكي و نتغبن مالوحش.. على ذكر الشكلاطة مرا كي فاطمة منين مصنوعة ؟

انا  نامن اللي العباد اللي تكتب بالبنة هاكي الكل كيفها و كيما الغراب.. عباد مصنوعين مالشكلاطة.. اي نعم الشكلاطة اللي قد ما ناكلوها ديما نحبوها و اللي قد ما تكلها تزيد تتغرم بيها.. و رغملي الكاكو مر هو اهم عنصر،في صنع الشكلاطة يمكن هي زادة تعدات بحكايات في حياتها مرة خلاتها تكتب بالبنة هاذي الكل..

و رغملي اليوم تجاوزت وجيعة عامين ونسيتها و حبيت من جديد مازلت نقرالها كل حاجة تكتبها قديمة و الا جديدة كايني اول مرة  نقراها..

بقلم رحمة خْليل