ستمر بك لحظة تذهلك فيها سهولة التخلي و التجاوز عن امور اعتقدت بشراسة انها مصيرية ''

الكلنا عندنا القدرة إنو نتجاوزوا الفترات الخايبة و الصعوبات اللي نتعرضولها، لكن اللي يخلّينا نضيعوا برشا وقت و اخلي طريقنا طويل  هو الشكّ متاع " اللي نعمل فيه  صحيح ؟ "

في كل مرة يمشي في بالنا ما نجموش تتخلاو على انسان و نخافو  لا الدنيا  تاقف بعدو  الوقت يثبتلنا العكس .. ونلقاو رواحنا تخلينا على برشا حاجات كانت غالية عنا نهار  و نلقاو رواحنا نكملو في حياتنا عادي مع شوية وجيعة على ذكرايات مزيانة بش يقعدو ماضي ..

الصعيب في الحكاية انك تاخو الخطوة اللولى و تقرر تكتب النهاية لحكاية ماكش بش ترجعلها مرة اخرى .. اما اكون قرار حقيقي نابع عن قناعة خاصة  مش جرد كلام تقال في لحظة غش بش يوفى بعد اول كلمة تتقال مالحد اللي نحبوه ..

بنادم نساي ..

ديما نخافو لا نتنساو .. لكن في الحقيقة حتى احنا زادة ننساو ..

كي خرجنا من كروشات اماتنا لقينا رواحنا نتنفسو وحدنا .. قلبنا ادق وحدو .. ما غير ما كان معانا كالحد اللي ماشي فيبالنا تو اللي الهوا بش يتقطع بلاش بيه ..

الوقت ديما يثبت العكس .. الوقت يثبت انو رحيل حد من حياتنا ماهوش النهاية !! الشمس بش تقعد تزرق بعدو .. النجوم ماهاش بش تتحرك من بلاصتها ..  الارض بش تقعد ادور كي عادتها .. الاكسيجان ماهوش بش يوفا مالدنيا ..

احتمال انو نموتوا لمجرد رحيلو احتمال بعيد برشا ..

تقلي ماهوش ساهل ننساو .. اي مش ساهل اما في اللخر ننساو ..

تقلي مستحيل .. النسيان حقيقة لازمة في حياة بنادم .. يمكن ما ننساوش ذكريات مزيانة اما انو تقلي ما نجمش ننسى شخص بحد ذاتو نقلك القلب ما عليه كان يبرد !!

بنادم ماللحظة اللي يحل فيها عينيه تتولد معاه فكرة الفقدان ..

فكرة انو يفقد امو .. بوه .. خواتو .. في اي لحظة تنجم الدنيا تفكهم منو !! و حتى اغلى الناس في حياتو ، فقدانهم اللي يوجع ما يعنيش نهاية العالم و الا نهاية حياتو و يلقا روحو بالوقت

اكمل في حياتو و يتعلم يتنفس يضحك يفرح بلا بيهم .. اي الوجيعة تقعد اما تبرد و الوقت اداوي .. و تقعد فما حقيقة وحيدة في الدنيا '' بنادم نساي '' ..