Zaineb S. - زينب س

توا هكا مريم مش ناوية تحضر معانا التدشين..لا والله حمة مرسي رزرفيت سايي...عفاف :رد بالك على روحك و سلم على عمي ..اوكي يبلغ ..عيناها بالدموع سلمت عليهم واحد بالواحد..كيف وصلت لحمة ..وشوشتلها..

حمة باش تعمل اللي قوتلك عليه..ههه تي إي اكيد نستنا فيها لحكاية هذي ليا برشا ..غزرتلها غزرة كلها وجيعة مسحت دمعة هبطت على خدها ..جبدها فاروق من كتافها .. تي سيبها مشبعتش بيها ..حملها ..مريومة أختي رد بالك على روحك و عمي ..عمك يسلم عليك و قليك تنجم تجي بحذايا و تعيش معايا في اي وقت ..

قربت منها حمة و شدتو من يدو.. باللهي مريومة ناوية تهزلي الرويجل ..أنا وصلتلو اللي قالو بابا و هو حر ،هيا خليني نمشي وقيت ..لحظات الوداع صعيبة ..ما يزيهاش فراق أنيس كان لازمها تعدي زادة وجيعة فراق ناس عاشرتهم و شافت معاهم لحلو و المر ... آخر نداء لصوت طيارتها .. بش اطير و تبعد على أنيس .. أنيس اللي توا قاعد يستنى فيها ..يستنى في جوابها ..

كانت مترددة مش عارفة شنوة تعمل تجازف و ترجعلو.. ترجعلو و هي مش متأكدة إذا كان بش ينسى ماضيها و يغفرلها ..و هي بش اتنجم تغفرلو ماضيه و كيفاش تخون ثيقة حمة فيها .. كيفاش تحط عينها في عينين حمة و تقولها نحب انيس و بش ناخذو ، صعيبة ..منين ادورها تلقاها صعيبة.. علاش الدنيا معقدة هكا ..علاش كل انسان ميعيشش مع اللي يحبو ..لازم لعذاب يا ربي لازم لوجيعة هذي الكل ..طلعت فالطيارة ..رمات عيناها مالشباك .. تشوف في تونس مالفوق ..مزينها و محلاها بلاد صغيرة و فيها سر كبير ..جوها ، ريحتها ،ناسها .. اللي يعيش فيها و يفهمها يصعب عليه فراقها... أنيس فالدار يستنى على نار ..اليوم وعدتو باش يسمع اجابتها ..فالوقت اللي تفاهمو فيه ناقوس الدار يصوني ..نقز من بلاصتو يجري باش يحل ..حل و اللي لقاها قدامو ما كانتش مريم .. كانت حمة ..عينيه وساعت باهت قعد يثبت فيها مصدوم .. كاينو نساها ..دقيقتين عينيه في عيناها ..

حمة اتفضل آش تعمل لهنا..قلبها يدق بالقوي ..أنيس عندي منقولك ..حمة ما ضاهرلي مازال بيناتنا كلام أنا نسيتك أنساني انتي زادة..قدمت خطوتين ..حطت عيناها في عينيه .. هذي هي اللحظة اللي تستنى فيها عندها برشا ..ليوم اطفي نارها و تاخو بثارها ... باقي في غرورك أنيس ما تربيتش ..ما كانش عندو وسع بال ليها و مش فاهم اصلا شنوة اللي مفكرها فيه تفكيرو الكل في مريم خايف تجي و تلقاها عندو ..قول اللي تحب عليه و امشي فيسع عندي رونديفو مهم..فاتتو ودخلت ..ههه رونديفو مع مريم مش هكا ...صدمتو كانت واضحة في عينيه .. م مريم شكون مريم ظ. قعدت عالفوتاي و حطت ساق على ساق في استفزاز واضح ..مريم اللي تستنى فيها توا بش اتقولك تعرس بيك ولا ..مريم اللي تعشقها و تموت عليها ..خلط عليها يمشي بالسيف مالصدمة ..منين تعرفها مريم و ويني توا ..وقفت قدامو وجها في وجهو عيناها في عينيه تواجه فيه ..مريم انا اللي بعثتهالك انيس ..انا اللي صنعت حكايتكم و كتبتها على كيفي أنا اللي خلقت في حياتك كذب و وهم اسمو مريم ...

ترمى عالكرسي حط راسو بين يديه ..كملت و هي تتذكر كل لحظة وجيعة عيشهالها ..مريم سمعت حكايتي معاك و قررت تعاوني باشننتقم منك و انرجعلك الصاع صاعين ..هز راسو مش مصدق ..مريم تعمل هكا منصدقش لا امبوسيبل ..قام و هز يدو في حركة تهديد ..انتي وحدة كذابة و معقدة في حياتك عرفت راجل قعدت موقفة حياتك عليه ..ساقط زايد ساقط ما تتبدلش ذوق أنيس ماله مالكاس اللي شربتهولي ...اللي تحكي فيه مش صحيح و انا نمشي لمريم و نفهم منها لحكاية الصحيحة و انتي ما اندمك عالنهار اللي تولدت فيه ...

ههههتسخف انيس مريم طيارتها طارت عندها ساعتين توا أكيد وصلت دور راسو يمين و يسار ينفي فاللي تقول فيه ..لا مش صحيح هز المفتاح و خرج ..طاير فالثنية و الكراهب تزمر ..يكلم فيها نومروها مسكر وقف قدام لوتيل اللي ساكنة فيه ..دخل يجري لرسيبسيون ..سأل عليها ..سامحنا مسيو ما عناش كليونت بالاسم هذا ..زيد ثبت يعيشك ...لا مسيو مثبت ما هبطت عنا حتى كليونت بالاسم هذا..خرج مخنوق الدنيا دارت بيه ..في لحظة ضيع حب حياتو ..حس الدنيا بوسعها ضياقت عليه ..مستعد يطلب السماح من حمة و كل مرا وجعها و لعب باها في حياتو المهم ترجعلو مريم ... مستعد يبيع الدنيا و يشريها .. دموعو هبطو ..هو أنيس اللي قلبو حجر و يلعب بقلوب النساء لعب دموعو هبطت على خاطر حب حياتو اللي طلعت وهم و كذبة كبيرة ...حمة..حمة اللي تعرف كيفاش ينجم يوصللها ..حمة هي الامل الوحيد اللي بقالو ..مستعد يطلب السماح في عوض المرة الف المهم توصلو لمريم ...