Zaineb S. - زينب س

حمة في القهوة كالعادة صباح بكري تسربي فالجماعة اللي قاصدين ربي لخدمهم و اللي مزالو كيف روحو ، و يدخل فاروق ، حطت من يدها كاس القهوة و مشاتلو : اه فاروق حمدلله عليك عشيري الحي يروح .. فاروق هاز خشمو عليها : سربيلي وحيده إكسيبرس و ماتحكيش معايا برشا ..شبيك إدز على صباحك يا ربي .. فاروق: إنتي اللي شنوة حكايتك الناس الكل تشدت سيبوك كان انتي آش حكيت الداخل .. حمة ضربتو في كتفو .. آه صحوبه شبيك شاك فيا متع هذا أحنا هاو ظهورلو باش ايقولي روح شنعمل... امممم باهي باهي أحنا مزالو كيف سيبونا أسمع منجية في بالها ؟..

تي في بالها وهي ثمة حاجه تتخبا فالبلاد هذي... فاروق: إهه برا عاد على التنقنيق و المرج .. حمة : و إنت لباس في راسك عامل عركة على خاطر الكورة.. فاروق: أوه حمة متبداش إنتي زادة سيبلنا الجمعية تعرفني مهبول في راسي و أولاد حومة السوق تفدليكهم ماسط أكهو ما حملتش .. حمة: ايا باهي إترص إنكمل الخدمة و انجيك ..

قعدو حمة و فاروق يشربو في قهوتهم و يضحكو عالعركة متع البارح و كيفاش الكلها نكرت قدام الحاكم و خرجو حبيبات ... حميدة قعدت ساعتين تسأل و اتبتبت علي صار بعدها فرحانة و هي تسمع فيه يحكي على رئيس المركز شنوة قلهم و كيفاش سيبهم ...فاروق كان يحكي عادي أما هي كانت فرحانه و تسجل في كلمة تقالت عليه من غير ما تشعر حمة: هيي و امبعد شنوة صار ..

فاروق: آآ سيبنا عاد باش تولي ألف ليلة و ليلة أكهو هذاكا هو كلينا خفوف باهين يهلكو اكا العون مكبرو الصرفاق اللي عندو كرايمي حاسها بش تتقلع ...

حمة: هههههه تكبر و تنسى ..

فاروق : أيا سيبني توا خلي انطير لمنجية انكمل نسمع من عندها كلمتين عسل و نتخمد نرقد ..

حمة: مش قلت ماشي تلوج في خدمة ..

فاروق: خلي غدوة محسوب كيف ما نمشيش ليوم باش تضيع عليا الخدمة ههه تي معروفة بش اندور اندور و نروح ..

حمة: مو قتلك عشيري اجى اخدم معايا في عوض الروج الصباب طارتلي منو ..

فاروق: ههه و تولي عرفي مرا لا إسماح ..حمة رمات عليه دبوزة ماء فارغة لقاتها بجنبها فوق الطاولة .. يا كلب وين ترا فيها النساء ..

فارق بعد يجري: هههه هاو البارح قالولي جايب نساء تحامي عليك اه حمة براس أمك لا عاد تخلط عليا في حتى عركة راك فضحتني وسط الرجال ..

حمة: ما يثمرش فيك برا تخمد متورنيش وجهك .... كمل نهار خدمة كيفو كيف النهارات الكل الدنيا ظلامت و القهوة فرغت و حتى الروج روح سكرت حمة الحساب لمت الغلة متع نهار حسبتهم باست يديها وجه و قفا يا ربي ليك الحمد هزت لمفاتح هبطت الريدو و جات بش اتسكر و ترا في شكون حط ساقيه تحت الباب باش يوقفها متسكروش وخرت لتالي خبات الساك و جبدت بالوقت وحدة غاز مخبيتها في جيبها للاوقات هذي هي جات باش تفش في وجهو و هو جبدها ليه لوالها يدها و نحالها الدبوزة ...

حمة: إي سيب سيب يا كلب .. جاها صوت تعرفو : و كان منسيبش شنوة يصير .. جمدت في بلاصتها بلعت ريقها مش فاهمه شي تحب تستوعب مزالت خافة و مفجوعة... حبت اتسيب روحها كبس عليها حمة: شكونك انت شتحب من عندي ...

نحب على قهوة هكة تستقبلو كليوناتكم ..رخف يديه عليها نجمت تفوك روحها و باقي مكبشة في الساك اه وليدي مع لفلوس اللعب لا ...مزالت تتنفس بالسيف يدها على صدرها : سي أنيس والله لعرفتك سامحني سكرنا توه .. أنيس قرب منها هز الريدو حل الباب و شعل الضو و هي باقي باهتة في بلاصتها بعد شوي رجعلها شاهد لعقل خلطت عليه و هو دار ورا الكنتوار و بدا يلوج بش يعمل قهوة قعدت تغزرلو محلاه لابس شميز في الابيض فوقها فاست خفيفة في الاكحل ، أبيض حرجو في الاكحل و عندو بوسة خال تحت عينيه ليمين قعدت تثبت فيه محلاه و هو يدور و يصول في قهوتها جاها قعدها على كرسي : أقعد أرتاح شبيك كابسه روحك فجعتك مش هكه هههه ...

حمة: مشى في بالي سارق ..

أنيس: و انتي كيفاش طفلة صغيرة و مزيانة كيفك قاعدة وحدها لعقبات الليالي في قهوة

مصدومة تسمع فيه مش مستانسه بالكلام هذا ولا عمرهة خممت فيه و علاش باش تخمم أصلا ما ثماش شكون يقولهولها....

أنيس : حميدة حميدة أوهه تسمع فيا ... حميدة هذي زادة جديدة عليها هي حمة حمة مش حميدة ..

حميدة: نسمع فيك سامحني سرحت .. دار جاب زوز قهاوي في يديه حطهم فوق الطاولة و قعد بجنبها .. يترشف فالقهوة و يغزرلها مش عارفة شنوة تعمل ولا شنوة تقول هي حمة حمة اللي مسيرة قهوة رجال وحدها تعدي نهار كامل بيناتهم ماشيه جايه و لا نهار حشمت و لا خافت شنوة حكايتها معاه علاش يصير فيها هكا شنوة اللي قاعده تحس فيه مش فاهمة تتلعثم فالكلام راسها فالفنجان ...

أنيس فهمها و بخبرتو الطويلة مع النساء عارف فاش إتخمم عرف اللي هي خام مازالت طرية وردة ملقاتش شكون يسقيها و أكيد بش تتفتح على يديه النوع هذا عمرو ما ذاق منو نوع جديد متخبي ورا إسم و حوايج رجال أما هو يعرف كيفاش يخرج لنثى اللي فيها هالحوايج الواعين المتخبية وراهم مش بش يغش رما عينوعلى بدنها الكل و هي تحمار و تخضار

أنيس: في بالك ملي ريتك مانجمتش انحيك من بالي .. حميدة: علاش ؟ .. أنيس: أسأل روحك شعملت فيا ما تسألنيش أنا فيبالك صحابك سيبتهم على خاطرك .. البوهالية جدت عليها .. يعطيك الصحة سي أنيس ..

أنيس: سيبنا عاد حميدة من سي أنيس هذي ..

قرب الكرسي لقدام قرب منها .. أنيس قول أنيس .. أنيس .. الله الله أول مرة يعجبني إسمي هكا بش تهبلني راك يا طفلة ... ضحكت من غير ما تشعر قاعدة قدامو كيف طفل صغير اللي قاعد يتعلم في نطق كلمتين على بعضهم ما قالتهمش ..

أنيس كمل ترشف آخر فم فالقهوة .. أيا قوم إمخر عليك مذبيا معادش تقعد للوقت هذا ميساعدنيش .. جبدها من مرفقها خرجها طفا الضو سكر الباب دنيا ظلام ما ثمه حد قرب منها جمدت في بلاصتها حست أطرافها بردو طبس عليها باسها من خدها بعضها ما عرفتش تفرح ولا تضربو و لا شنوة تعمل ضحك عليها ... أنيس هههه يا حشامة