قعد يثبت في حمة كاسكات لتالي عينين كبار شفايف كيفاش مليانين وجه من غير ماكياج حواجب هايجة مريول واسع و فوقو جاكات سرفيتمون و في الساقين سبادري متاع اولاد دار أنيس للعون و غمزو : اه أش قولك في المزه ..هههه ..

قرب العون لشباك .. وين ترا فيها المزه .. هذيكا اللي قاعدة بحذا الطفل اللي لابس بالأزرق ... العون : هذيكا مزه يا سي أنيس تي انا ماشي في بالي عزري شادينها فالعركة معاهم ... أنيس : أسكت أسكت ما تفهمش في السلعة الممو ...

العون : تي أنا قلت هذي مالجماعة اللي يحبو النساء أنيس: أتو نشوفها شنوه حكايتها نموت أنا على التبربيش ههههه ... أسمع برا ناديلها إنت إكبس و أنا نرخف فهمتني .... ههههه تهنى سي أنيس عندك كان الرجال خرج العون خزر لحمة : إجى انتي ... شدها من مرفقها بالقوي : إمشي إتحرك .. دخلو للبيرو و أنيس متكي على حافة البيرو و عاقد يديه قدام سدرو خزر أيمن العون :شنوة إسمك .. حمة حمة.. حل فمك و إكبس روحك إسمك الصحيح مش إسمك الحركي .. إسمي حميدة الناجي .. أنيس باقي يتفرج ما قال شي ... أيمن : شنوة تعمل في الشغب ؟ ... هز يدو أيمن جا بش يضربها ...سكر دين ***** فمك ..حميدة خبات وجها بيدها .. ادخل أنيس شدلو يديه ... شبيك هبلت ممنوع الضرب و زيد تضرب في طفلة هذي رجولية ... أيمن عمل روحو داخل بعضو ... سامحني سي أنيس أما هاي اتكركر فيها علينا أنيس: برا أخرج شوف خدمة اخرى خلينا وحدنا خرج أيمن و سكر الباب وراه ... حميدة قلبها يضرب في 100 صحيح قليب و عايشة عزري و ديمة مع الرجال اما من صغرتها تكره الحاكم و تخاف منو و مش مستانسه تتعرض للإهانة و متنجمش ادافع على روحها.. وجها حمار و ريقها انشف ... أنيس: ايا حميدة خوذ أعمل شربة ماء و هاو كرسي اقعد ارتاح ... قعدت و هي مش فاهمة يحكي برسمي ولا بش يغدرها بكف لا يقرى لا يكتب أنيس: ايا حميدة متخافش أسمع باين فيك رجله مش بش تكذب عليا نحبك تحكيلي سبب العركة و نوعدك انخرجك منها انقول هزوها بالغلط معاهم حميدة: ما ثمة حتى عركة صحاب يفدلكو مع بعضهم (هكة تفاهمو ولاد الحومة باش اقولو الكل ) ولاد الحومة العربي ما يعطوش بعضهم و يسلكوها مع الحاكم و يخرجو يكملو عركتهم البرا ما كانش يقعدو منعوتين بالصبع أنيس قرصها من خدها تصدمت : أيا عاد خليني باهي معاك منحبش ندوان ... حميدة : كان جيت نعرف راني قتلك .. أنيس شد روحو بالسيف عليها قام يدور حك لحيتو ... شاده صحيح ...هبطت راسها ..... أنيس قال في قلبو : هذي طلعت كاسحة شويه نورمال مصيرها اطيح ... ايا قوم برا روح ... حميدة تصدمت هزت راسها : انا ...انروح ؟؟ ..انيس : هههه اي شنوة عجبتك القعدة بحذايا ؟ كان عليا انا ميقلقنيش طفلة مزيانة كيفك تقعد بحذايا  ..حميدة قعدت باهته مش فاهمة فاش قاعد يقول شبيه هذا .. انا حمة حمة مش حميدة مش قاعد يشوف في اللبسة ...اول مرة راجل يغزرلها مرا اول مرة تسمع كلمة حلوة غزرتو لبدنها كلامو لخلخها و ما فهمت شي تتذكر الي ما نجمت تقول كان: اي و صحابي بش يروحو ... ههههه علاش تسال عليهم فاهم صاحبك ؟ تكلمت فيسع كاينها تنفي في التهمة على روحها : لا لا نسأل خاطر منحبش نخرج كان انا ... أنيس : آه فهمتك هذي لغت ولاد الحومة باش ما تبانش انت اللي بعتهم إتهنى يباتو الليلة نكبسوهم شوي و يخرجو غدوة اما كان يطلع عندك صاحب فيهم مزمرة عليك هههه... حميدة تبسمت منغير ما تشعر و بعد هبطت راسها و خرجت تجري ....

روحت حميدة للحومة خلات ولاد الحومة يكبسو فيهم كيفما قال رئيس المركز سي أنيس ، هكا سمعت البوليس صاحبو يناديلو.. أنيس ملي خرجت ممشاش من بالها حبت تخمم في حاجة اخرى تقنع روحها اللي ماهيش تخمم فيه عاركت روحها و لاد حومتها بايتين متمرمدين و هي بايتة في فرشها تتقلب النوم هرب. مله ليلة كلبة ، اختها بجنبها فالفرش جبدت الغطاء خلاتها عريانة اكهو ناقصة هي مش لازم ترقد بطبيعتها مش جاييها النوم ،هبطت مالفرش خرجت للفيراندا هزت عينها لسماء ليلة دافية و سماء صافية حتى هو الربيع دخل . سارحة و التلفون صونا جبدت تلقاها منجية أم فاروق اوه شنوة باش تقلها هذي ..هزت ..ألو اهلا خالتي منجية لباس؟ ..منجية : يا بنيتي منين لباس هكه يا حمة فاروق وخيك يشدوه و ما تجيش تحكيلينسمع من عند الروج الصانع متاعك .. الروج صار هو زايد نعرف ما يشدش فمو لباس خالتي منجية ولدك راجل غدوة يروح.. زعمة يا حمة .. تهنى بري ارقدي غدوة يكون عندك كلمة ..يهنيك يا حمة يهنيك سكرت معاها تفكرت العركة كيف خرجت و روحت للحومة سألت على سبب المشكلة طلعو تعاركو على الدربي مخها وقف كيف سمعت الروج هكا يحكيلها تمرمدو و وصلو للحاكم على ماتش كورة . تعرف فاروق ولد حومتها متربين مالصغرة مع بعضهم ما يتفارقوش ما عندوش الزايد اما مع الكورة و جمعيتو ما يفهم شي يتسكر و يبدى يسخن و يبرد و ما يحملش ..

فاروق عشير عمرها يعرف عليها اللي ما يعرف حد يعرف حكايتها الكل ،هي حميدة شهيرا حمة حمة بوها الحاط الهادي هكا سماها جاتو بعد خمسة بنات ..مسمينو بو البنات كل مرة يقول هالمرة بش اجيني ذكر بش انجيب راجل اللي يهز اسمي و يحمي عايلتو أمو و اخواتو بعد منام عيني و كيف كل مرة يطلع صغيرة أنثى ،لحكاية عملتلو عقدة أمها قتلو : يا حاج اللي عطانا ربي فيه البركة شبيهم البنات زينة الدار و هوما اللي يشيلو فالكبر ..و القهوة قهوة الجدود لشكون انخليها للانساب يبيعوها و يفكو فلوسها .بعد 5 بنات قال الحاج :المرة هذي حاسو بش يجيني الذكر حظرلو بيتو حوايجو و حتى الاسم حاضر حمة و جات بنية أنثى مقبلش لحكاية قعد أيمات ما حبش يشوفها و لا حتى يبوسها و لا يقربلها .عاركوه جيرانو و ناسو :شبيك يا راجل ملايكة شنوة ذنبها كبدتك هذاكا اللي حب ربي مش كاتبلك اتجيب ذكورة بالك فيها خيرة ، حن قلبو ضمها ليه اما منجمش يقبلها طفلة عاملها كينها ذكر لبسها حوايج الاولاد و كان يهزها معاه للقهوة و كيف يسألوه الناس عليها يقلهم حمة ولدي.. نحا لبلاكة البرانية و حط بلاكة جديدة مكتوب عليها مقهى حمة .. قيدوها فالاوراق الرسمية حميدة قالولو في البلدية ممنوع يا حاج تسميها حمة و خالها مخلهوش اما حميدة تربات حمة تربات بين طواول القهوة..

بدات حمة تكبر و صدرها بدا يظهر نهار هبطت منها قطرات دم عرفت اللي هي بلغت و ولات صبية كيفما ما قالت امها و ماللي تبلغ الطفلة حياتها تتبدل عيش بنتي آش عندك في بوك ما تسمعش كلامو انتي راك بنية و البنية مالها الا دارها رجلها و صغارها إستحفظ على روحك .. ما فهمتش علاش هالخوف الكل على قطرتين دم هبطو منها شبي فاروق ولد جيرانهم ما يمرضش كل شهر و علاش يسموه مرض زعمة يداوى هالمرض هههه هكة خمت و هي صغيرة ياما تلحم بين أمها و بوها على مشيانها للقهوة أما أمها مسكينة كيفها كيف النساء الكل ضعيفة قدام راجلها و ما عندها وين توصل معاه الكلمة كلمتو في الاخر.. تعلمت بالوقت تخبي الطفلة اللي فيها تكبس صدرها للي ماشي و يكبر و يدور تلبس حوايج واسعه و متاع أولاد تحكي بلغة لولاد و تصدم معاهم في العرك و المشاكل تعلمت الخدمة و بطلت لقراية على بكري كيف مرض بوها و ماعادش ينجم يمشي برشا للقهوة شدتها هي و بوها غلبو لمرض و مات خلالها أم و 5 بنات في رقبتها اللي ما صبروش برشا عالعرس و قعدت كان أختها صابرة عرسها في الصيف..