قهوة الحومة العربي معبية كالعاده اليوم ثمه ماتش دربي سخون و الخدمة فيه تزيد ، تسمع كان يا حمة حمة ويني القهوة ..حمة زيدني ولعة ..حمة مشي كان تاي يرحم بوك .... قهوة الحومة العربي من اقدم لقهاوي تعدات من جد حمة للبو لين وصلت لحمة حمة ... شاده بعضها بالخدمة مركزين مع الماتش الناس الكل على أعصابها .

دخل زياد للقهوة يصيح : يا حمة اجري

حمة : آش ثمة شبيك ؟

زياد : ولد منجية عامل عركة و راكحين فيه ضرب ولاد حومة السوق ..

خلطو للبلاصة يلقاوها لاحمه 3 اولاد متحامين في فاروق دخلو فيهم ضرب من غير ما يفهمو حتى شنوة لحكاية ولا علاش تعاركو ، كلام زايد و صياح و عياط و ناس تلمت يحبو يتفرجو

هوما هكاكا و كرهبة الحاكم جات حبو يهربو منجموش حصروهم و هزوهم الكل لمركز الحومة

وصلو هبطوهم اللي يدخلوه ياكل خف على كرايمو ، صفوهم بجنب بعضهم ..رئيس المركز في بيروه يتفرج فيهم مالبلار غزر لعون واقف بجنبو : شبي***** هاذومة شنوة حكايتهم

العون: عاملين عركة و راكحين ضرب في بعضهم

الرئيس: إي وعلاش تجيبو في **** ناقصين تكسير راس

العون : والله سي أنيس خفنا تكبر الحكاية و تولي تكسير و حرق و يطلعولنا بعد ثوار ...

أنيس قرب لشباك قعد يثبت في الوجوه لين وقف عند حمة حمة ...