Zaineb S. - زينب س الجزء السابق

حبيت تقابلني و تجري ورايا جمعة كاملة تفضل هاني جيتك..قاعد مقابلها في كامل اناقتو شبوبيتو كيف العادة لاكن وجهو كان تاعب ..عينيه لمحوقة ..لحيتو الهايجة..تحكي عالليالي اللي يعديهم ساهر يشرب و يخمم في معشوقتو اللي عدا عمرو الكل يلوج فيها و في لحظة ضيعها جبد سيقارو حطو في فمو ..

نفخ دخانو بغزول ..سكت شوية كاينو يكابر ..متردد بش يقول حاجة صعيبة عليه ..فهمتو ..تعرف طبيعتو حفضتو اكثر من روحو.. أنيس كان عندك حاجة قولها مكانش خليني نمشي كان يراني خطيبي تولي مشكلة ..طفى السقارو و عقد يديه قدامو عالطاولة ..قعد يثبت فيها ..

حمة علاش عملت معايا هكا ماكنتش نتصور غلط معاك لدرجة هذي ..غزرتلو في عينيه ..رجعت أشهرة لتالي ...تفكرت كل لحظة عاشتها معاه ..لاكن مش بنفس القوة مش بنفس اللهفة ..حستها مجرد ذكريات ..أنيس كان تعرف قداش حبيتك قداش تمنيتك ..نبات ليالي نحلم بيك ..مشى في بالي حبيتني طلعت ماعندكش قلب استغليت قلة خبرتي و ضعفي ..حب يتكلم ..حميدة أنا ..أسكت و اسمعني ..عديت ليالي نستنا فيك ماكنتش نتصور اللي الانسان ينجم يكذب في مشاعرو لدرجة هذي كنت نبكي لين نعيا و نرقد و انت شايخ عايش حياتك بالطول و العرض حبيتك اتحس اللي حسيتو بعثتلك مريم و انت طحت فالمنداف..قص عليها ..حميدة انتي عجبتني بالرسمي اما انا كنت ساقط معاك و اللي باش انقولهولك مش ساهل عليا ..كيف حبيت مريم فهمتك و حسي باللي عملتو معاك سامحني حميدة جيت اليوم نحبك تسامحني و تفهمني ...

كان ذليل قدامها يطلب فالسماح حاسة قلبها برد عليه..لاكن صدمتها لكبيرة كانت و هي تسمع فيه يحكيلها عاللي صار بينو و بين مريم ..عرفت اللي مريم حصلت و حبتو و عطاتو قلبها و روحها و بدنها ..عرفت جانب مالحكاية كان متخبي عليها ..حطت راسها بين يديها ..توا فهمت علاش مريم روحت على غفلة ..توا فهمت علاش كانت تبكي ..انا السبب ..حرام عليك أنيس حتى مريم ما سلمتش منك ..لا حميدة لا مريم انحبها نحب انعرس بيها لازم تعرف اللي صاحبتك اللي ستعملتها انتي بش تنتقم مني موجوعة توا اكثر مني ..

حميدة لازم تسامحني و تعاوني بش نوصللها ..باهتة تسمع فيه حست بذنب كبير ..هي اللي دخلت حمة في لعبة ما عندها حتى ذنب فيها ..هزت ساكها و قامت ..وين ماشية ..يزي اللي سمعتو اليوم و رد بالك تعاود ادور بيا.. حبيبي شبيك فاش سارحة ..لا شي عزيزي ..الليلة التدشين نحبك أحلى وحدة ...هههه اتهنى..متكية على كتفو ..هزت راسها و حطت بوسة على خدو ..فاروق ..وي ..سامحني .. دارلها وهزلها راسها و حط عينو في عيناها ..على شنوة ..سامحني عالبريود اللي فاتت الكل نعرف اللي كنت مقصرة معاك ..حملها بالقوي..و انا انجم منسامحكش... قدام لمرايا تعمل في روج...تحب تطلع أحلى وحدة كيفما يحبها فاروق ..غزرت لروحها فالمراية ..قداش تبدلت يا حمة من داخل و مالبرا ..

نظرة اعجاب و ثيقة في عيناها ..هي حميدة ..هي اليوم أقوى و أحلى و أشهى ..لمرا لقوية الواثقة من روحها و أنوثتها ماعادش تخاف من شي ..ليوم قادرة تواجه الدنيا و الناس و تتجاوز وجايعها الكل ..فالقهوة كانت عايلتها الكل ملمومة أمها ..خواتها رجالهم و ولادهم ..عفاف ..منجية حماتها ..ولاد و بنات الحومة ..وخاصة فاروق اللي واقف بجنبها و ما خلهاش لحظة يدو في يدها حاسة بأمان كبير معاه ..كان فخور بيها و بزينها و بحبها ..يا جماعة عندي حاجة نحب انقولهالكم ..سكتو الكل يستناو فيه ..حمة قعدت باهتة..آش ثمة فاروق ..عدا يدو ورا كتفها و ضمها ليه..نحب تعرفو اللي الكل مستدعين لعرسي انا و عشيرتي و حب حياتي بعد شهر ..دارتلو مفجوعة ..فاروق فاش تحكي .تبسملها ..طبس باسها من جبينها ..

بديت فالتحضيرات سايي يزي ما ستنينا ..حبيبي مثبت اللي نخلطو..نخلطو و كل شي مريقل اتهنى..قامت امها و امو يزغرطو و صحابهم جاو يهنيو فيهم و يباركو ..احاسيس برشا حستها فرحة و خوف و حب.. كانت تشوف فالناس اللي تحبهم الكل دايرين بيها و شنوة احلى انك تكون محاط بناس يحبوك و يتمناولك الخير ..كانت ممتنة ..فرحانة ..الليلة نسات الماضي و مواجعو ..انيس ما عاد يعنيلها شي .. تجربة قاسية لاكن بدلتلها حياتها و خلاتها اقوى و اتجاوزت عقدة الانوثة اللي كانت عايشتها ..

جبدت التلفون و كتبت ميساج ..مريم عزيزتي نعرف اللي كانت نيتك تعاوني و حبو ما كانش على بالك ..نعرف اللي خترت صحبتنا و ما بدلتنيش رغم لوجيعة اللي عشتها ..انيس ما عاد يعنيلي شي انا اليوم عندي حاجات اهم مالماضي انخمم فيها ارجعلو مريم و عيش حياتك و اتأكد اللي بش نقعد ديما انحبك..سكرت التلفون و اتبسمت ..حست بحمل كبير و انزاح..عرفت اللي لنتقام مش حل يتعب مولاه قبل ما يتعب لعدو واللي قلبو صافي و ضميرو حي مينجمش يعيش بأحاسيس سلبية كيف الحقد و الكره..مالاحسن تعيش متصالح مع روحك و مع الناس اللي دايرين بيك ..تعيش لروحك و تتفكر اللي كل نهار يتعدا و ما تعيشوش انت اللي خسرتو .

..حياتك أهم من انك تضيعها على ناس مش حاسة بيك ..هذا اللي فهمتو حميدة بعد تجربتها مع انيس ..ليوم هي عروسة.. دار مليانة زغاريط و فرحة حنتها في يدها و حبيبها بجنبها ..مريم اتحضر في فاليزتها ...واللي يعرف تونس ينجم يبعد عليها ..باش ترجعلو ..كيفما يرجع الفرططو لنار اللي تحرقو ..الحب حاجة قوية ..حاجة مش بيدينا ..قداش نتمناو تكون عندنا قدرة بش نختارو الناس اللي نحبوهم ..لاكن كيف الصغير ما يختارش والديه الحب زادة قدر و مكتوب .. و انيس قدرها ..عندها امل اللي ينجمو يتجاوزو ماضيهم و وجايعهم ..حميدة زادة تجاوزتو و قدرة الغفران عندها غلبت حبهة للانتقام .. .. لا تتذكري منه الا ما كان جميلا ً و استثنائيا ٌ بينكما .. توقفي عند روعة البدايات .. ودعي له بشاعة النهايات .. عندها .. ستصبحين أجمل .. وسيمكنك حينها ان تحبي من جديد .. بـسـعـــادة أكــبــر