قلت ننسى
و شمّرت على ذراعي
و كفّنت هل قلب
بين أضلاعي
و الذهب مهما رخص
باقي غالي
وقد ما وطيّت راسي
ديما عالي

ومصيري نفوت
و الماضي
نكفنو في لحود
و مهما تعذّبت
تي محسوب
شكون قادر
يغيّر المكتوب
و حسبة ربّي
تعب التّعب من تعبي
والباين مل هم
شطرو مخبّي

لقيتني كفّنت روحي
وندا صوتي ليك
مازال في بلحوحي
و دموعي السّاكبه
تفحّمت بسوادها
دابغه في حروفي

ومازلت
نترجّى رجاك
و نعادي
ناصحي ننساك
وباقي نقول
طريقي طريقك
و مصير دعوات
لمّيمه تجيبك
مهما كان
كنت نهار حبيبك
ومهما لمعو
في سماك نجمات
غير ضي هلالي يعيبك

و يا لندرى توّه وينك
ومازلت على بالك
حتى كان تحل
عقادي في حبالك
ساولتك بالله
كان قلبك صافى غيري
ما تقلّو أنا بنتك
و إنت صغيري

وما تودّو
بالسّر في ضحكاتك
و نحبّك
الناطقه في سكاتك
وما تودّو بحضن يدّك
و تسلّها كي تنز بعرقك
وبكلمة معزّك و مبنّك
خلّيلي حتّى كان
كل شي وفى
وخبّيت شطر إلّي تحكى
شويّه للحلمه منّك