اي نحبها بالصوت العالي و نتعالى عل المتعالي و الي ينبش من تالي..

اي نحبها و نضحك علي يحب يزعزع جبال محبتنا وناسي انو بكلمة منها نقلع بوقرنين و نغرسو في جنينتنا ..

اي نحبها و نضحك علي يخربش بقلم و يصور الهم على تصويرتنا.. ويشرب من كاسنا و يعاشر في ناسنا و يتبسم اذا شافتنا و يقول حليلتنا ..

اي نحبها ورواني شهد ريقها و الملح في دموعها و السكر في قهوتها و حليبها , و نضحك علي يشعل النار و يتخبى في رمادها و يضحك على دموعها و يغرو سكاتها, وسكاتها قوة أمها عليها ربيتها..

اي نحبها و نغير حتى من التراب اذا لامسو ظلها.. ونحضنها بكلها من راسها ﻷطراف ساقيها و إذا عطشت من عروقي نسقيها. عمركشي ريت عنبة سكرت بماء صغيرها ؟..

اي نحبها و تضيع كلماتي كل ما تودني بضحكتها و تسهرلي و تمل الليل وما يملها وتتمنى في عشقة في ليلة مطر والا دوليشة على حد لبحر في  الحلمة موجو يبلني وما يبلها.. زعبانة و نحبها