Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
خنار
May Messelmany - مي المسلمانيتوسدت قمرتي و دورت بيا نجوم لياليا ...
مديت يدي للخابية و طلعت تسلطينة زمنية ...
ترخيت، غمضت عينيا و مديت بدني على غيمة متعدية ...
هزتني لسرحة مخلطة بنغمات صوتك الفتية ...
العين مغمضة، الفم ساكت و القلب يصيح : « يا فناري ... يا ضي مساري .. »
نسمع في تدنديناتك و نفسي تحوم في الصحرا و البراري ....
«يطفي ناري***لو كان مش الصبر
يطفي ناري***لو كان مش الصبر
يطفي ناري***راهي الدنيا لاهبة بشراري***لو كان مش الصبر »
يا خناري ... يجعل الصبر الي صبرك يحلي مراري ...
يبرد ليعتي و يطفي ناري ...
يالي عاملة مغناني ...
خليلك نتقلى الوحش كلاني ...
نستنى .. و لا نفس منك شفاني ...
حن عليا .. البعد كواني ...
كبرت .. و الوقت فناني ...
و انت في كل سرحة تزيد في تدندينك قول عاملة بالعاني ...
صوتك يقوى و صوتي يعلى ، نخرج و نصيح بين الناس : يا وخياني ...
«يا وخياني يا وخياني يا وخياني ربي يستر ... »
و انت باقي لقلبي تنحر ...
متلفتة لغرامي تنفر ...
ياخي في بالك ولا مافيبالكش ؟
النجمة و القمرة ماعلمتكش ؟
و بسرحاتي بيك ماخبرتكش ؟
و عالنار الي ساكنة جاشي ماسردتلكش ؟
في بالك الي انت ضي لدحسة لياليا ...
و في بالك الي قلبك مخبى اسراري و مابيا ...
و في بالك الي نفسك هو هوا رواريا ...
و دمعاتك مية عينيا .. و تبسيمتك سبب بلاويا ...
تي بالك ولا مافيبالكش !! و كيف نحكي معاك اغزرلي في عينيا ...
في بالك الي قربك جنة و بعدك نار ...
الي شدتك بنة و ضحكتك خنار ...
الي صوتك رنة و خزراتك شرار ...
تي في بالك ولا مافيبالكش الي محبتك سر و العشق فيك جهار ...
في بالك الي انت المفر و بعدي حرمت عليك الزيار ...
و مهما يصير و بلي صار ...
بش نقعد عالعهد نستنى ليل على نهار ...
نستنى في خزراتك ، تداويلي قلبي الحزين ...
تنفظ عليه الغبرة الي كلاتو توا سنين ... و خلاتو رزين ... و هو بالسوايع ينين ...
نستنى بش نخرج بين الناس و مايهمني وين .. و فين ...
و نزيد نصيح و نقووول :
«اليوم قالتلي يازين الزين**
اليوم قالتلي يازين الزين**
الليلة نتلاقو * الليلة نتلاقو * الليلة نتلاقو في العين * الليلة نتلاقو في العين * »
مي المسلماني
Website Design Brisbane
Tags: