Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
البلية
May Messelmany - مي المسلمانيلمحتك بين خطواتي المتعثرة
في كدس اوراقي المنثرة
بين تخربيشاتي الي كانت فيك متجذرة
و في كل مرة نلمح طيفك نتفكرك ..
نتفكرك مع كل قطرة مطر ..
مع كل وقفة في اخر سطر ..
مع كل شهقة كان الدمع هطل ..
يا وحلة .. يا بلية .. يا ليعة القلب الي حصل و في جرايرك عطل ..
يا فرحة بالاكداس و يا غصة ماتبان بين الناس ...
يا ليالي سرد غطاها السكات
يا خرافة تدفنت و ماتحكات
يا حلمة بتكشبيرتك مشات شتات
و بضحكتك تلمت و تبنات ..
يا تقشعيرة بعد بوسة في عروقي دبات ...
و يا شيخة بعد سكرة للراس سرات ..
يا تدحنيسة دافية للروح حاذات ..
و يا دنيا بهواك حيات ..
و بضي عينيك حلات ..
خبيتك في دغاغشي المنسية
فماش ماننساك يا بلية و مبلية ..
ياخي عملت من طريق غرامك ليا ثنية ..
و مشيت و ماطاقني صبر .. ماني كيفك نكره المستنية ..
فماش مانوصل قبلك و نعرضلك اخر طريقك .. و نقلك .. انا هي
الي منك و بيك مدعية ..
ايجا .. ايجا يدي في يدك و نبعدو على هرج هالعيشة ..
نترما عندك و نطيرو في مهب الريح ريشة ..
ايجا نسكنك و نتروا من ما عينيك ..
نتوسد صدرك في ليالياو نكمي الهوا من رواريك ..
نترشف شفايفك و نغفى على خديك ..
ايجا نشوف حلاوة الدنيا فيك و كون ليا مرايا ..
ايجا كونلي النوتة و اندندنك في غناية ..
ايجا كونلي اقلام الزينة و نلون بيك سمايا ..
ايجا كونلي النغمة و خليني نشطح لين يصحى شتايا ...
ايجا .. ايجا كونلي الحبار و نكمل بيك بقية الحكايا ...
حكاية البلية الي معششة في الراس ..
الغرام الي سكن الجاش ..
و القلب الي من بلاك ماعياش ..
لنسيانك ماباش و منك مابراش ...
مي المسلماني
Website Design Brisbane
Tags: