Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
Au pays des merveilles
May Messelmany - مي المسلماني
توحشت تمشيتنا في زناقي المدينة ...
و في غفلة تحصرني في بلاصة كنينة ...
تطبعلي بوسة و تعلي في عصرة يدينا ...
و ننساو العباد و نحس روحي بين النسمات نوارة في جنينة ...
توحشتك ...
و توحشت تشدني من يدي و أنا نتبع الجرة ...
تدور بيا من ربط لربط و تقلي إنت لعيني قرة ...
تجمعلي الفل و الياسمين و تعملي منهم صرة ...
نخبيها في شوني و نشم ريحتها كان توحشتك في مرة ...
توحشتك ...
و توحشت عينيك كيف تقابل عينيا ...
في وسط دسة بنار غرامنا مكوية و توشوشلي نحبك يا بليتي المبلية ...
توحشت ناقفوا على حرف الشط و نبعدوا على البرور ...
يدي في يدك نتمايلو على نغمات أزنافور ...
و تدنديناتك معايا تدور و تدور ...
و تزيد تقلي بصوتك الشداي ...
Emmenez moi au pays des merveilles ...
يا سمرة يا مولاة القد الغناي ...
توحشتك يا ريدي يا قطعة من وريدي ...
يا ضحكات مسروقة من سما عيدي ...
يا تصويرة ربيع مصورة بصوابع ايدي ...
يا نار تذوب جليدي ...
توحشتك يا نجمة مضوية السما ...
يا نسمة دافية بعد برودة شتا ...
يا حنانة قطرة ندى ...
و يا قلب عليك حفى و بيك دفى...
توحشت نحكيو على دنيتنا و مشتاقة لدويرتنا ...
الي سقفها غرام و قرمودها حلمة من الاحلام ...
جنانها فدان و التراب من نوارها مايبان ...
توحشت نخرجوا من السطر ...
نتناقرو و يضوي ضو الخطر ...
و في قالب خزرة يعلى الضو و من الغرام نهبطوا الزوز مطر ...
نغمزك و نقلك ... ساعة شيطان و حضر ...
توحشت اتكيني عندك و تقرالي من قواعد العشق الأربعون ...
تلعبلي بخصلات شعري و تقلي يا ليلى قيسك بعشقك مجنون ...
نضحك .. نغزرلك و نحيرلك قلبك الممحون ...
تتشغشب ..تسكر الكتاب و تقول مفتون بخزرة عينيك مفتون ...
توحشت نمشيو على سكة الغرام و ماننعتوه بالملعون ...
فنحن المهتدون و هم الظالون ...
توحشت نعيشو بلا قانون ...
هم الحقيقة و نحن الحالمون ...
توحشت نكدسوا الالوان و نلونوا سما هالكون ...
فهم البقايا و نحن لأملنا و على أملنا باقون
نص مي المسلماني
Website Design Brisbane
Tags: