Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

الزنزانة

changer-tempsMay Messelmany - مي المسلماني

لا عاد انت انت ...

و لا عاد انا انا ...

ضعنا الزوز في وسط هالزنزانة ...

لا عاد خزرتك تمهمشني ولا ضحكتك مزيانة ..

لا عاد لمستك تذوبني ولا كلماتك في وذني رنانة ...

لا عاد نحسك، لا نسمعك ، لا نراك ...

سكتت و تنازلتلك على لقب الخرنانة ...


لا عاد انت هو ..

و لا عاد انا هي ...

و ضيعنا الزوز الثنية ..

و لا حد لقى الآخر .. و لا يمكن راه و ماطاقش المستنية ..

لا عاد حروفنا راوية و مروية ..

و لا عاد دمعتنا على بعضنا سخية ..

أرضنا بور شايحة بنار قلوبنا الباردة مكوية ...

ورقها مشتت و اشجارها محنية ...

و مهما دارت عليها الشتوية

مادام الدموع شايحة ماتكون مسقية. ..


لا عاد انت هو ..

و لا عاد انا هي ..

و حكايتنا تكتبت في ورقة متهرية ..

و ماززاتش بش تكمل ..

و بقات في صندوق مطوية ..


لا عاد انت تشبهلي ...

و لا عاد انا كيفك ..

لا عاد فاهمة شتائم من صيفك ...

و لا عاد هاممني تقليبات خريفك ...

و ملي كنت من إمالي الدار صبحت اليوم من ضيفك ...


لا عاد انت الريشة ..

و لا عاد انا الحبار ..

و كل حد كتب لروحو خنار ..

لا عاد العين توقد شرار ...

و لا عاد القلب عليك حزار ...

بدلنا الثنايا .. و كل حد خذا لروحو فنار ...

لا عاد ... و لا عاد ... و لا عاد ...

لا عاد تكملني و لا نكملك ..

و لا عاد في نص الكلام ندسك و نحملك ..

لا عاد تسردلي و لا نعلمك ...

و لا عاد تمسيني و لا نكلمك ...

و لا عاد انت انت ...

و لا عاد انا .. انا ..

و قعدنا الزوز في هالزنزانة ...

مي المسلماني

الزنزانة
Tags:

Vous pouvez lire aussi