فاش قاعدين تعملو هوني ؟ ايا لموا شلاقاتكم وملاقاتكم وروحوا

_____

شكونك انت و شبيك تحكي هاكا !

بالك في داركم باش طردنا !

_______________

حاكم معاك ، انتي الي شكونك ؟ وشبيك تحكي هكة ؟ ايا الدوة الزايدة لا

__

اي ولو حاكم باما حق تحكي معايا اكايا ..

تفضل شنية المشكلة الي صارت !

ياخي ثمه شكاية و اﻻ اي حكاية صارت باش تجي تدخل بﻻ حتىّ حق و تتصرف هكا ؟

_______________

حق ؟ شكونك باش تحكس عالحق ؟ ايا عااد ماعناش وقت زايد باش نعديوه معاكم ، دبشكم و روحوا ، واصلا شكونكم وعلاش متلمين ؟ فاش تخططوا

____

نخططو لدنيا جديدة مافيهاش ناس كيفك .. نخططو نبنيو تونس بالحب .. نحن في أرضنا و نمارسووو في حياتنا بطريقة عمرها ل ضرت حد ..

نخططو نحيو الغل و الحقد من ڨلوبكم على غيركم الي ترا فيهم اقل منكم ..

انت سلطة علياَّ ؟ انت في خدمة الشعب !

و نحن الشعب ، نحن الأرض و الزراعتها .. نحن خلفاء الأجداد و المستقبل النضيف ..

نخططو نحببوكم في بعضكم مهما كنتم و مهما باش توليو ..

نحلمو ب تونس يد وحدة ضد الي يعادينا موش انتم تتقةاو على الضعيف و تقمعونا ..

نحن جيل موش جديد برشا عدنا الشحمة و القدر و متخلقين ..

لمتنا قانونية كان شتجيبها قانون ..

لمتنا رخضتلنا فيها حرية التعبير و الديمقراطية ! ا ماﻻ و اﻻ الفايدة في الكﻻم ..

نحن الزواولة و ثوار و العمال و الطلبة و الجاهلين و العايشين بعرق الجبين ..

جايين نبيعو في ااحب علة حافة الطريق .. نحن الي يتسمو علينا الخراف و الحكواتي و الشاعر و الموجوع الي يحكي بﻻ ما يقيس كﻻمو .. نحن من نملك الشارع خاطر تونس لينا نحن ..

نحن نصنع الفرح ننتج الفن ..

و انت مرحب بيكْ كان فهمتني .. تفضل بحذانا

________

كلامك صعيب ، كلامك جديد علي عمري ما سمعتو قبل ..ماعنديش مشكل شخصي معاكم اصلا انا كنت على روحي نخدم وقالولي برا شوف فما شكون ملمومين طردهم ، تقلي شكون ؟

ماعنديش الحق نجاوبك ما انجم نقلك كان "الي اقوى مني" ، هكة تعلمنا ، قعدنا بين لمطرقة و السندان ، كان طردنتكم تقولوا شبيك اتطرد فينا وكان خليتكم نولي نعصي في الأوامر الي

جاية من الفوق و نخسر قوتي وقت صغاري.....

______________________

انت كيفي تحب تعيش لكن نعرف ما خلوكش .. إنت كيفي تحب تستمتع بالدنيا تتفرج و تسمع و تسهر و تغني و تكتب و تشطح و تمشي للمسرح و تساهم في نشاطات ..

نعرف و هذا الي نحب نفهمهولك الي كلنا تحت نفس الايطار لكن كل منا دورو ..

عروفاتك في اول غصرة يلموك و ي صدروك للكرطوش تموت و يلوحوك ينسوك .. لكن انا نحبك و هما يحبوك و نخاف عليك نحبش يد الغدر تطغى عليك ..

ايجا بحذانا و اسمعنا و افهم منا ..

نحن زادة امن و امان .. احنا شبر من هالبﻻد ..

______________

وصغاري شكون بيهم كان طردوني ؟

________________

في الحقيقة ما يطردك حد .. نحن أقوى قوة في الدنياَ .. نحن الشعب و هما الأقلية .. منحبوش نكونو أعداء

خلي لل مودة مكان فيهم برشاَ كيفك رجال و الباقي ما يتتراوش حتىّ بالعين ..

نمشي معاك نصفي الوضعية و خلي البقية يتممو الحلمة .

_______________

ما نجمش نكون معاكم ، اما خليكم انتوما تكملوا الحلمة ، سامحوني كان كنت كي العصا في عجلتكم ، وبالك نهار اخر ربي يكتب نعيش الدنيا زينة...وللحلم بقية