Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

احكيلها عليا !

jalousie-amourFatma Omri - فاطمة عمري
علاش سكتت ؟

احكيلها عليا !
عشرتنا الكببرة و حبنا القوي . سهرنا و تصبيحنا ، كلامنا و سكاتنا خرجاتنا و هبلتنا ..

احكيلها عليا بالتفصيلة

قللها الي انا هزيتلك راسك نهار كسرت ظهرك .. انا لي خبيتك عندي نهار لي دنيا تلوج عليك .. انا لي  بتت للبرد و غطيتك ، انا لي في مرضك تحت راسك نبات ندادي .. انا لي لا نهار عشتو ل روحي ، على فرضية انك انت روحي ، هو كي تجي تشوف انتَ قبيلة تاع ملح ساكنه جروحي ..

احكيلها عليا

قلها انا لي نهار المطر خرجت نجري معاك كالغشاشر ماهو نهارتها انت شارد و الروح عنك ضليله و انا وحدي الخليلة ..

علاش سكتت ؟

احكيلها علياّ قداش من مرة خليتني وحدي في حاجتي ليك بحجة انك مزاجك خايب و تحب تكون وحدك ، وحدك مع الدنيا الكل الا انا ..

احكيلها عليا ما تنزعنيش ..

انا لي كونتك كبرتك ، انا لي ستنيتك تربيّ الريش و عشت معاك ايامتك المرة بالحلاوتي بالي يجي و ما يجيش ..

انا لي صنعتك من فراغ ، علمتك تحب ، تسهر و تخمم و تحسّ ..

احكيلها علياّ ما ترمينيش كي الضنا تاع "إنتِ مرتيِ ، نحبك ، منسلمش فيك " ..

احكيلها علياّ متغطيش عين شمسي بغربالك ما عاد فيبالك الدنيا بكلها تحكيلها علينا كان انت تلف بالك ..

احكيلها عليا

بالكذب و قللها لي انتَ سيد الناس بياّ و عمرك في حياتك لا باش تكون غير ليا ..  

احكيلها علياّ و قلها لي انتَ ولدي كي كبرتو من صحت بدني لي كبرتو على يديا و لميتو في حضني و ضرب و وجيعت الدنيا الكل جات فياّ ..

و ميسالش احكيلها اسرارك و على الحزن لي متكوم قدام باب دارك و سهر ليلك و دخاّنك .. دركك و دموع كلماتك ،

أ ، تعرف تقرى ماهي هي ؟

اعطيها تقرى كلامك اليّ كتبتو لياّ و فرجها في عيون الناس الي حسسدتك علياّ ..

احكيلها علياّ ، جيبها عرفها بياّ

جيبها تشوفك في عينيا تو تفهم الي بياّ ..


خوذلنا موعد متخليش الدنيا تجمعنا صدفه  ..

و الا خبيها بعيد ما تخليش الدنيا تجمعك بيا معاه ، متخليهاش تشوفك مربوث نرعش لونك مخطوف ..

متخليهاش تشوفك ملهوف في عيونك وحشة كبيرة كان جات تفهم كي تشوف ..

متخليهاش تلمسك من يدك قدامي باش ما نحسش دمك كي يغلي من خيالي يكفي بركا تشم ريحتي تتبهذل تنسى روحك و تجيني تترمى عندي ..

ردبالك تركزّ معايا كسرت الروح الي فيا نزعتها يَ وجعي و جيتك قوية كي عادتي كي نحارب عليك ..

علمتك تكون صيد متصدّر ورى اللبهّ و انشاءالله يثمر فيك ، كي من دور عليك الدنيا و تشوف خوفك في عينك شنيا باش يكون رايها فيك ؟

خليها بالشوية تكتشف المطباّت لي ماكنه و معششه فيك ، تجرّب تصبر عليك و تستحملك في خرمك الكل و تكملّ معاك ماتمشيش و تخليك ..


انا لي كنت نحبّك كي تكره روحك ، نسهر سنين نداوي في جروحك و نرمم في كسرة روحك و اول ما صحيتْ مشيت ..

آه ي ذيل الكلب .
احكيلها علياّ و كي تواتي جيبها ليا فسرها كيفاش تتعامل معاك نعملها فورماسيون في ايتيكات التعامل مع الحيوانات النرجسية لي في شقف ذكر متخبية ..


-----
فاطمه.ع
احكيلها عليا !