نخاف. .نخاف  مالدمعة لتاقف  في شطر الثنية. .شطرها غصة و شطرها تنهيدة. .نخاف مالكلام  البلاع لحروف. .الدفان لمعانيه. ..و نخاف مالكلمة البوحرفين لتزيدها حرف و شدة..والشدة تتسرسب في حوش القلب..تبني مسارب عشقة مشدودة بعرق الجاش. .

و نخاف مالليالي لتتكب فيهم المحبة مالمغرب. ..و نجومها معادش تضوي. ..و نخاف منك كي توشم كلامك على بدنك و تنحي لحاف سكاتك. .و تجيني تضوي قمرة كنيني. .تشعل لهيبها في الفجاري. ..نخاف مالشمس الحراقة. .و الدموع السيالة. ..

و نخاف من الشدة مالصغرى و مخيبها شدة الكبر...

مخيبها شدة الكبر كي تشدلك ضلوع الإحساس و القلب و تكبش. .تولي شهوة. ..دفى. .حياة و نفس...

نخاف من تبديل الحروف من عسلامة إلي في لحظة تولي بسلامة..ووديان القلب كي تفيض وجايع ردامة. ..

نخاف مالدور من صغري نكره الدور و كل حاجة تتسكر. .كنت كل وين نصور دورة نخليلها فضاء محلول. .نطيح من. .نطير. .ناقف. .ومانرجعيش مالاول و نكره الآخر. ..نكره الدور لماعندها وين توصل. .و توا نخاف من دورة الدنيا و نكره الثنايا لكيف بعضها. ....

نخاف مالحلمة لتفيقني في عز النومة. .نتنفس بالسيف. .مخدتي مبلولة حزينة. .واطرافي عاكشين. .صوتي هارب والغصة ساكتة سكوت الموتى....

نخاف مالبحر الهايج والعومان مع موجة الغدارة. ..الكذابة. البهناسة. .تكسر الحجر و تردم الرمل. .نخاف ماليدين الي ماتعرش التعنيق بالقوي. .والشفايف لتبوس من غير رعشة في القلب...
نخاف مالتبديل. .تبديل موت بلاش جنازة..قلب خايخ الساس. . نخاف مالاعوام لتخلخل الزروس و الأيام لتشيح لعروق كينها شوش ورد ذبل. .رحل...

ومن سوايع الفجر لتيبس الجلد كينها أرض بلاماء. ..و نخاف من شمس الشتاء خاطرها باردة ساردة. .ومن سحابة الصيف خاطرها فارغة جهامة بلاروح. ..و نخاف ...