الحاجات القوية ما تصيرش بالساهل..

اما كل حاجة قوية مالها الا تصير..

تشق الظلام و تمشي عالماء..

الحاجات القوية تصير..

كي ممثل جديد اول مرة يطلع عالمسرح..ترشقت فيه العينين و صفقت عليه اليدين..

كي راجل أول  ما قابل مرا بينو و بين روحو خذا عهد انو يعمل المستحيل بش هالمرا تكون ليه..

و نمّن انو المحبّة مالحاجات لي لازمها قوّة بش تصير..

انا هكة نمن..و يمكن على هاكا في حكايتي معاك انت اخترت اني نربّع يديا و نتفرج هالحكاية وين بش ترصّي..و أمنت ملول انو كان محبتنا لبعضنا قوية..بش تتحقق المعجزة لي تخليني انا وياك ننساو الفروقات لي بيناتنا و ناقفوا على طرف الأرض لي يتلاقى فيها العالم متاعك بالعالم متاعي..ويسامح ربي شيطانك و يطلع من سابع أرض و تهبط ملايكتي تلوّج عليه..و ملّي شفتك تتخبط و تبلبز.. تمشي و تجي.. وتدور و ترجعلي..خذيت عهد على روحي بش ما نعمل حتى خطوة تقرّبني ليك لا و الله بعدت برشا مرات عليك.. انا لي فيبالي مسأللة وقت و نرخ و نهزّ الراية البيضة و نسلّملك مفاتح قلبي..انا لي كنت خايفة لا تزيد تقربلي و نحبك و خايفة لا انا نحبك قبل ما انت تعطي الفو فار لقلبك بش يحبني..ذاب الخوف و تنحى كي سحابة الصيف دوب ما لقيتك اانت بيدك تشجع فيا بش ما نحبكش..من نغير ما تشعر.. و تنحالي الخوف وقت قربتلي علخر و وقت وضاحت التصويرة قدامي  و عماتلي عينيا الحقيقة..حقيقة اني مستحيل نحبك..

حسبتك انت اخرة الشقا و هدية العمر..

قسمت معاك كل شيء تحت مسمى صحاب..كنت تكذب على روحك و عالعباد و تخليلي ليا الاعترافات المغلفة بالتفدليك..عشت في حلمة انك تنجم تكون الراجل لي نستنى فيه..راجل العمر...و محبة تنسي في وجيعة السنين.. تخيلتك برشا مرات تستنى فيا مروحة و محضرلي مقرونة..و مزلت نأمن انو مافما حتى راجل يعرف كيفاه المقرونة لي انا نحبها غيرك انت..عطيتك مفاتحي الكل و حليتلي  انت قلبك على فردتين و الشيء لي تقال بيناتنا عمرو لا يتقال بين زوز عباد عاديين..نحنا سعات روح وحدة...كي تبكي انت نبكي انا و كي نتوجع انا تتوجع انت...و كي مايفهمونيش العباد تفسرلهم انا اش حبيت نقول..و كي توحل الفكرة على طرف لسانك و انت تحكي نكملهالك انا..و تترشق فينا العينين..و يكذبنا كل واحد نقولوا الي نحنا مش معرسين...

معرسين ههههه

في لول كانت تظهرلي حلمة بعيدة ما تتحققش..و تو تظهرلي حاجة خايبة نحمد ربي لي منعت منها

انت لي عييت تبوس في كفوف يديا و تدفي فيهم من برد الشتا..معرفتش تدفي قلبي و تذوّقو مطعم الهنا..انت الي لعبت كل دور ينجم يلعبوا راجل في حياة مرا..ماعرفت تملى حتى بلاصة..و لا عرفت تفرح و لا عرفت تززّيني..
انا نحبك برررشا...اما مهاش محبة مرا للراجل لي بش تقسم معاه حياتها..بش تقعد عبد نحبو و ذكرياتو معبّيتلي تراكن قلبي.. ذكريات من نوع الليلة لي سهرنا فيها عالشط للصباح نحسبوا في النجوم و نلعبوا  بالرمل..و نحكيو في الحكايات لي منجموا نحكيوهم لحد.. بش نحكي عليك لأولادي و بش نقلهم كان فما في حياتي راجل يعرف يفرّحني...

اما مكش انت الراجل لي يعرف يملاني..ما مليتش الفراغات لي في روحي الكل..و ما تعرفش تلقفني قبل بشوية ما نتطرشق بالبكا.. و ماتعرفش تخليني من غير حشمة  ننحّي على أفكاري الحجاب.. و ما تعرفش تقرى من

عينيا الشيء لي منجّمش نقولوا..و الا راك فهمتني نهارة الي غزرتلك غزرة قتلك فيها كل شيء..

و يمكن كنت نجّم نكتبلك جواب نقلّلك فيه الي انا قابلتّـك كيما انت و نحبّك بأخيب خايب فيك..و ما نخافش منك اما نخاف عليك...و نفهمك وقت تحبّ تاخو كونجي من كل شيء حتى منّي..و نحبّها كرشك لي مقلّقتك و ما يهمنيش ياسر اذا ماعرفتش تلبس ألوان منسّقين..

يكمن كنت ننجّم  نكتبلك كان جيت تعرف كار الكتيبة و بنّة انو مرا تكتب لراجل..و يكن كنت نقلّك  اذا كنت تفهم ذهب المعاني..و قيمة الكلام..

و يمكن كنت ننجم نعدّيلك هذا الكل.. اما شفتك برشا مرات و انت تتخبط و انت تكذّب و تنسّي و انت تقنع في روحك لي انا مانيش ليك..ياخي اقتنعت بنفس الفكرة انا زادة اما مش لنفس الاسباب..

انا مش ليك..و كي تجيبلي مالسما نجمة..و كي تكب عليا و تكركلي جنينة ورد...و كي تشريلي انواع الشكلاطة لي في السوق الكل.. قلبي خذا القرار و فضّ الجلسة في وقت لي حضرة جناب قلبك مزال حتى ماعترفتش..و مزال يعسّ على روحو اش يقول..و مزال اذا زلق يقلبها تفدليكة..اما اذا لسانك شدّ روحو..عينيك فضحوك.. و من غير ما تتعب روحك..

انا ماناخوش راجل يخمم فيا الف مرة...الراجل لي بش نعطيه عمري هو لي بش يفكّني فكك و يمدّ يديه و ياخو حاجتو و يضرب عليا بالبونية و يقنعني بميات حجة انو هو الوحيد لي يستحقني..ياخذني على غفلة و يكرفطني بزربة و ندوخ كي نعرف لي انا نحبّو و ما نفيق كان بروحي  انا وياه مسكّرة علينا بيت وحدة..و لامتنا سما وحدة..و واقفين على نفس الارض..بلاش مشاكل بلاش عقد...راجل كي نغزر لعينيه نرتاح..و كي يعنّقني ماعاد نخاف من شيء..راجل يلقف عثراتي و يعرف يقراني وقت تخونّي معاني الكلمات..راجل نعرّيلو افكاري قبل ما نعريلو بدني...وفي لخّر يملكهم الزوز..

مشاعرك عمرها ما كانت حاجة قوية و عمرها لا نجمت تخليك تنحي الخوف..و نضحك كي نشوفك خايف مني..كي تخاف تكلمني و انت سكران..لا يزلّ لسانك بكلمة..و تخاف صحابك يقولوا عليك حاجة متع بلادة قدامي..نضحك عليك كي تخاف لا صورتك عندي تتهزّ.. و نرى الخوف في عينيك في اللحظات لي تستنى فيهم بعد ما تسألني اش راييك فيا..عمرك لا نجمت تنسى لي انا نصلي و انت تسكر..و خلاف المرة الي قتلي فيها انا قاعد نخسر فيك..عمرك لاستعرفت بالخايب لي تعمل فيه معايا..

الحاجات القوية في لخر تصير...و منعرفش اذا عندك ليا محبة قوية تنسيني في هذا الكل.. اما نعرف لي مانيش بش نضيّع وقتي مع راجل ما يعرفش يفكّني..